ថ្មីៗនេះ នៅមជ្ឈមណ្ឌលសង្គ្រោះសត្វ Villalobos Rescue Centen នាប្រទេសអេស្ប៉ាញ គេបានទទួលដំណឹងពីឆ្កែញីអនាថា១ក្បាល ។ ពួកគេប្រញាប់ចុះទៅពិនិត្យ ក៏ឃើញវាជាមេឆ្កែទើបបង្កើតកូនរួច ។
កន្សោមដោះរបស់វាតឹងណែន បញ្ជាក់ថា វាពុំបានបំបៅកូនមួយរយៈហើយៗ តាមស្មាន វាដើរទៅតំបន់នោះ ប្រាកដជាកូនៗរបស់វាស្ថិតនៅក្នុងផ្ទះណាមួយដែលវាពុំអាចប្រាស្រ័យបាន ។
តាមការស្រាវជ្រាវប្រមូលព័ត៌មានដ៏លំបាក ទើបដឹងថា ឆ្កែនេះជាកម្មសិទ្ធិរបស់បុរសម្នាក់ ដែលថ្មីៗនេះត្រូវបានចាប់ខ្លួនដាក់ពន្ធនាគារ ហើយអ្នកដែលជ្រកក្រោមដំបូលផ្ទះជាមួយ ពុំចូលចិត្តចិញ្ចឹមឆ្កែ ។
ពួកគេបាននាំវាទៅកាន់ផ្ទះនោះ តែម្ចាស់ផ្ទះពុំព្រមឲ្យចូល ធ្វើឲ្យពួកគេបង្ខំចិត្តបញ្ចុះបញ្ចូលមេឆ្កែ (តាមបច្ចេកទេស) ដើម្បីយកវាទៅកាន់កន្លែងពួកគេសិន រង់ចាំរិះរកមធ្យោបាយបញ្ចុះបញ្ចូលឲ្យអ្នកផ្ទះនោះប្រគល់កូនឆ្កែឲ្យមេវាវិញ ។
ចុងក្រោយ ម្ចាស់ផ្ទះក៏យល់ព្រមប្រគល់កូនឆ្កែឲ្យ ក្នុងនោះមានឆ្កែ២ក្បាលសុខភាពមាំមួន ព្រោះបានអាហារគ្រប់គ្រាន់ និង២ក្បាលទៀត ដែលអ្នកផ្សេង (ក្នុងផ្ទះ) នេះចិញ្ចឹម តែស្គមស្គាំងព្រោះគ្មានអាហារគ្រប់គ្រាន់ ។
គ្រាន់តែឃើញភ្នាក់ងារសង្គ្រោះ នាំកូនៗរបស់វាមកដល់ភ្លាម ឆ្កែញីទ្រាំពុំបានស្ទុះស្ទាររត់សំដៅកូនភ្លាម ហើយប្រញាប់ឲ្យកូនៗរបស់វាបៅ ។
ទិដ្ឋភាពនេះ ធ្វើឲ្យមនុស្សដែលនៅចិតនោះ រំភើបចិត្តឡើងស្រក់ទឹកភ្នែក ។
ពួកគេថាៈ «អ្នកទាំងឡាយគួរគប្បីយល់ថា ទោះបីពួកវាជាសត្វតិរច្ឆានក្តី តែវាក៏មានមនោសញ្ចេតនាដែរ! ហើយមនោសញ្ចេតនាម្តាយ-កូន ត្រូវបានធម្មជាតិតាក់តែងឡើងពុំសំរាប់តែមនុស្សទេ!» ៕
