ទើបរៀបការបាន១ខែសោះ តែភរិយាលោក ជិញ នៅវៀតណាម បានឡើងទម្ងន់បន្ថែម ៨ គីឡូក្រាម ធ្វើឲ្យទ្រលុកទ្រលន់ជ្រុល ។ ដោយបារម្ភពេក ពុំដឹងធ្វើដូចម្តេច ក៏សម្រេចបបួលភរិយាធ្វើកិច្ចសន្យាមួយ ។ តាមនោះ បើភរិយាបញ្ចុះទម្ងន់ធ្វើយ៉ាងណាឲ្យរង្វង់ចង្កេះនៅត្រឹម ៦០ សង់ទីម៉ែត្រ នឹងទទួលបានរង្វាន់ ៥០០០ ពាន់ដុល្លារ ។
លោកបានសរសេរនៅលើទំព័រ Facebook របស់ខ្លួនថាៈ ពួកគេរៀបការនៅខែឧសភា ហើយ១ខែក្រោយប៉ុណ្ណោះ ប្រពន្ធលោកបានកើនទម្ងន់ពី ៤៣ គ.ក្រ ដល់ ៥១ គ.ក្រ ធ្វើឲ្យចង្កេះឡើងមូលក្លំប៉ុន «ពោះ» ទោះបីពុំទាន់មានកូនម្នាក់ក៏ដោយ ។
លោកក៏បានចែករំលែកបន្តថាៈ មុននេះ ភរិយាលោកបរិភោគអាហារបួស ទើបនាងស្វែលតែត្រឹម ៤៣ គ.ក្រ ប៉ុណ្ណោះ ហើយកំណើនទម្ងន់មួយផ្នែកក៏ដោយសាររូបលោក ព្រោះ «តាំងពីស្រឡាញ់គ្នា ខ្ញុំតែងបបួលនាងទៅបរិភោគអាហារឆ្ងាញ់ៗ »ទើបទម្ងន់លោតលឿន ។ ម្យ៉ាងទៀត ក្រោយពេលរៀបការ ខ្ញុំក៏តែងធ្វើម្ហូបក៏ដូចជាបំរុងទុកចំណីឆ្ងាញ់ៗដែលនាងពុំអាច «ទប់ចិត្ត» បាន ។
លោកថាៈ ក្រោយចុះកិច្ចសន្យា ភរិយារបស់លោកបរិភោគភាគច្រើនផ្លែឈើជំនួសបាយ ទោះបីជាលោកប្រឹងចម្អិន និងលើកអាហារដាក់ពេញតុក្តី ។
ចំណែកភរិយាក៏ឲ្យដឹងថា នាងប្តេជ្ញាចាប់យករង្វាន់ឲ្យបាន ។ ម្សិលមិញ ខ្ញុំហូបផ្លែប៉ោម ខណៈពេលប្តីខ្ញុំគាត់ហូបសាច់ ។ ឃ្លានណាស់! តែត្រូវប្រឹង ។
យ៉ាងណាក៏ដោយ លោក ជិញ ប្រាប់ផងដែរថា ទោះភរិយាធាត់ ឬ ស្គម ក៏គាត់នៅតែស្រឡាញ់ដែរ គ្រាន់តែបារម្ភខ្លាចធាត់ នាំឲ្យមានជំងឺដង្កាត់ ទើបនឹកឃើញធ្វើបែបនេះ ដើម្បីជំរុញទឹកចិត្តប៉ុណ្ណោះ ៕
