តំបន់ដែលយន្តហោះយោធារបស់ មីយ៉ាន់ម៉ា ជួបគ្រោះថ្នាក់ស្ថិតនៅពុំឆ្ងាយពីទីតាំងដែល MH370 មានវត្តមានចុងក្រោយលើរ៉ាដា មុនពេលបាត់ស្រមោលមកទល់បច្ចុប្បន្ននេះ ។
យន្តហោះយោធា Y- 8F-200 របស់មីយ៉ាន់ម៉ា ដែលផ្ទុកមនុស្សជាង ១២០ នាក់ បានបាត់ខ្លួននៅថ្ងៃទី៧ មិថុនា លើសមុទ្រ Andaman ខណៈពេលកំពុងហោះហើរពីប្រជុំជន Myeik ភាគខាងត្បូង មីយ៉ាន់ម៉ា ទៅកាន់ទីក្រុង Yangon ស្ថិតនៅប៉ែកខាងជើង ។ កងទ័ពមីយ៉ាន់ម៉ា ឲ្យដឹងថា ទីតាំងយន្តហោះបាត់ទំនាក់ទំនងស្ថិតនៅចម្ងាយពីទីក្រុង Davei ប្រមាណ ៣២ គីឡូម៉ែត្រ ទិសខាងលិច ។
AP ឲ្យដឹងថា តំបន់ដែលយន្តហោះ Y-8F-200 បាត់ទំនាក់ទំនងស្ថិតនៅចម្ងាយប្រមាណ ៧០០ គីឡូម៉ែត្រ ទិសខាងជើង ដែលជើងហោះហើរ MH370 របស់ម៉ាឡេស៊ី មានវត្តមានលើរ៉ាដាចុងក្រោយ មុនបាត់ស្រមោលទល់បច្ចុប្បន្ន ។
គួររំលឹកឡើងវិញថា MH370 ផ្ទុកមនុស្ស ២៣៩ នាក់ បានបាត់ស្រមោលតាំងពីថ្ងៃទី៨ ខែមីនា ឆ្នាំ២០១៤ ខណៈពេលហោះហើរពី Kuala Lampur (ម៉ាឡេស៊ី) ឆ្ពោះទៅកាន់ទីក្រុងប៉េកាំង ។ គេបានបើកយុទ្ធនាការស្វែងរកវាអស់រយៈពេល ៣ ឆ្នាំ តែពុំមានលទ្ធផលជាវិជ្ជមាន ។
ថ្ងៃនេះ មីយ៉ាន់ម៉ា ប្រកាសថាបានរកឃើញសាកសពមួយចំនួន នៅចម្ងាយពីប្រជុំជន Launglon ប៉ែកខាងត្បូងប្រមាណ ៣៥ គីឡូម៉ែត្រ ។ គេក៏នៅបានរកឃើញកង់មួយរបស់យន្តហោះ Y-8F-200 ផលិតដោយចិន អាវពោងសង្គ្រោះ និងរបស់របរមួយចំនួនទៀត ។
ក្រៅពីការបាត់ចេញពីរ៉ាដានៅគោលដៅកៀកគ្នា (៧០០ គីឡូម៉ែត្រ ពុំជាឆ្ងាយប្រៀបនឹងល្បឿនយន្តហោះទេ) នោះ អាកាសធាតុពេលយន្តហោះទាំងពីរជួបគ្រោះថ្នាក់ក៏ល្អប្រសើរ ពុំមានព្យុះភ្លៀងទេ ។
អ្នកវិទ្យាសាស្ត្រកំពុងចោទសំណួរថា មានអ្វីស្ថិតនៅពីក្រោយគ្រោះថ្នាក់ទាំងពីរលើកនេះ ដែលក្នុងនោះ MH370 គឺបាត់ស្រមោលសូន្យឈឹងតែម្តង ៕
