មកទល់ពេលនេះក្នុងពិភពសិល្បៈគេសង្កេតឃើញថាទើបតែមានអតីតសិល្បការិនីខ្មែរ ២ រូប ដែលមានភព្វសំណាងខ្ពស់បានស្វាមីជាឧកញ៉ា និង ទទួលបានការស្រឡាញ់ថ្នាក់ថ្នមពីស្វាមីខ្លាំង ។
គេអាចចាត់ទុកថា ជំទាវ ម៉ៅ ចំណាន គឺជាអតីតសិល្ប:ការិនីខ្មែរមួយរូបមានវាសនាខ្ពស់ក្នុងចំណោមជំទាវៗមួយចំនួននៅលើពិភពលោកជាភរិយារបស់មហាសេដ្ឋី-ថ្នាក់ដឹកនាំកំពូលៗមួយចំនួនដែលសុទ្ធតែមានប្រភពចេញមកពីអាជីពអតីតសិល្ប:ការិនី ក្នុងនោះរួមមាន ជំទាវជាភរិយារបស់លោក ស៊ី ជីនពីន ប្រធានាធិបតីប្រទេសចិន លោកជំទាវភរិយា លោកហូឡង់ ប្រធានាធិបតីបារាំង និង លោកជំទាវរបស់លោក ដូណាល់ត្រាំ ប្រធានាធិបតីប្រទេសអាមេរិក ជាដើម ព្រមទាំងជាភរិយារបស់មហាសេដ្ឋីជាច្រើនទៀត ។
ម៉ៅ ចំណាន ហៅ ស្រីតូច ចំណាន គឺជាអតីតតារាចម្រៀងម្នាក់ និង បានរៀបអាពាហ៍ពិពាហ៍ជាមួយលោកឧកញ៉ា គិត ម៉េង អគ្គនាយកក្រុមហ៊ុន Royal Group និង កាន់កាប់ក្រុមហ៊ុនជាច្រើនទៀត ដូចជា ទូរស័ព្ទចល័ត Mobitel 012 , ទូរទស្សន៍ CTN , ទូរទស្សន៍ CNC, ទូរទស្សន៍ MyTV , សេវា Internet EZECOM… ព្រមទាំងជាប្រធានសភាពាណិជ្ជកម្មកម្ពុជាដ៏ល្បីឈ្មោះ កាលពីថ្ងៃទី ២០ ខែមីនា ឆ្នាំ ២០១៥ កន្លងទៅ បន្ទាប់ពីបានរួមរស់នៅជាមួយគ្នា ទទួលបានចំណងដៃស្នេហាកូនប្រុស-ស្រីចំនួន ៤ នាក់ ។
លោក គិត ម៉េង ដែលគេស្គាល់ដំបូងថា ជានាយកក្រុមហ៊ុន Royal Group បន្តវេនពីបងប្រុសរបស់លោកឈ្មោះ គិត សុផាន់ នោះ បានទទួលការតែងតាំងជាឧកញ៉ាដោយព្រះរាជក្រឹត្យលេខនស/រកត/០៣៩៦/១៧ ចុះថ្ងៃទី ១៣ ខែមីនា ឆ្នាំ ១៩៩៦ ។
ដោយឡែកលោកស្រី លី យ៉ាណា គឺជាអតីតតារាបង្ហាញម៉ូដ និង ជាម្ចាស់ជ័យលាភីលេខ ២ នៃកម្មវិធីប្រឡង Super Models របស់ស្ថានីយទូរទស្សន៍ប៉ុស្តិ៍លេខ ៣ កាលពីអំឡុងឆ្នាំ ២០១១ ។ បច្ចុប្បន្ន លោកស្រី លី យ៉ាណា ត្រូវបានគេស្គាល់ថា គឺជាភរិយារបស់លោកឧកញ៉ា ហុង ពីវ អគ្គនាយកក្រុមហ៊ុនអចលនទ្រព្យបុរី ពិភពថ្មី ដ៏ល្បីឈ្មោះ ហើយបានទទួលចំណងដៃកូនស្រីម្នាក់មានអាយុជាង ១ ឆ្នាំ ខណៈគេមិនបានដឹងថា លោកឧកញ៉ា ហុង ពីវ និង លោកស្រី លី យ៉ាណា បានរៀបអាពិពាហ៍ពិពាហ៍តាំងពីពេលណានោះទេ ។
រីឯលោក ហុង ពីវ នាយកក្រុមហ៊ុនអចលនទ្រព្យបុរី ពិភពថ្មី ទទួលបានការតែងតាំងជាឧកញ៉ាដោយព្រះរាជក្រឹត្យលេខនស/រកត/១១០២/៣២៦ ចុះថ្ងៃទី ២៨ ខែវិច្ឆិកា ឆ្នាំ ២០០២ ៕ ដេវីត ប្រភព៖ ប្រជាប្រិយ
