រឿងរ៉ាវរវាង នាងខ្ញុង និង នាយ ពែកមី បានស្ងប់ស្ងាត់មួយរយៈពេលមកហើយ ដោយឡែកកាលពីពេលថ្មីៗកន្លងមកនេះ ស្រាប់តែលេចឮពត៌មានសាជាថ្មីម្តងទៀតថា អ្នកទាំងពីរបានបង្កាត់ភ្លើងស្នេហ៍ជាមួយគ្នាឡើងវិញ ក្រោយពីឃើញភាពស្និ្ធទ្ធស្នាលគ្នាខុសប្រក្រតី ។
ស្របពេល ដែលមានព័ត៌មាននេះ នាងខ្ញុង បានបង្ហើបប្រាប់ពីអារម្មណ៍ពិតរបស់ខ្លួនថា នាងក៏ចង់រៀបការមានគូស្រករថ្មីដូចគេឯងដែរ ប៉ុន្តែក្នុងចំណោមបុរស ដែលចូលខ្លួនមកសុំស្នេហ៍នាងនោះ គឺគ្រាន់តែក្នុងន័យលេងសើចតែប៉ុណ្ណោះ ដូច្នេះនាងមិនយកខ្លួនបៀតឡើយ ចំពោះបុរសប្រភេទនេះ ។ ហើយម្យ៉ាងវិញទៀត នាងត្រូវតែមើលឱ្យគ្រប់ជ្រុងជ្រោយជាមុនសិន មុននឹងសម្រេចចិត្តយកបុរសណាម្នាក់មកធ្វើជាគូរគ្រង ព្រោះខ្លាចជាន់ដានចាស់ ។
នាងខ្ញុងកម្រនឹងទៅណា មកណាជាមួយបុរសប្លែកមុខណាម្នាក់ណាស់ ភាគច្រើនគឺនាងទៅណាមកណា ជាលក្ខណៈក្រុម ហើយនាងក៏មិនមានគម្រោងនឹងផ្តើមស្នេហ៍ជាថ្មីដែរ ដោយសារស្នាមរបួសចាស់មិនទាន់ជាស្រួលបួលផង ។ ពេលជួបជាមួយនាងខ្ញុង កាលពីពេលថ្មីៗនេះ គេចាប់អារម្មណ៍ឃើញថា នាងកាន់តែស្រស់ស្អាតគួរឱ្យស្រឡាញ់ នាងបានបញ្ជាក់ប្រាប់ថា រវាងនាង និង លោកពែកមី គ្រាន់តែជាការរាប់អានគ្នាក្នុងនាមមិត្តរួមការងារតែប៉ុណ្ណោះ បើនាងចង់យកប្តីមែន ក៏មិនយករបស់អ្នកដែលមានម្ចាស់រួចហើយដែរ ។
នាងខ្ញុងថែមទាំងបានសារភាពថា អ្នកតាមស្រឡាញ់នាងគឺមានច្រើនណាស់ មិនថាអ្នកក្នុង ឬ ក្រៅប្រទេសនោះទេ អ្នកខ្លះបានផ្ញើសម្ភារៈជាច្រើនដល់នាង ដូចជាទឹកអប់ក្រេមម្សៅជាដើម… ។ ប៉ុន្តែឱ្យស្រឡាញ់ម៉េចកើត បើមិនដែលបានស្គាល់មុខគ្នាផងនោះ ។ ខ្ញុងចង់បានស្នេហាមួយត្រឹមត្រូវ ដោយបុរសម្នាក់នោះ ត្រូវតែជាអ្នកនៅលីវមិនថា កំលោះ ឬ បុរសពោះម៉ាយនោះទេគឺនាងមិនប្រកាន់អ្វីទាំងអស់ សំខាន់ឱ្យតែមានចិត្តស្មោះ និង មានការងារសមរម្យមួយគឺគ្រប់គ្រាន់ហើយ ។
កាលពីពេលថ្មីៗនេះ នាងខ្ញុងបានបង្ហើបប្រាប់ពីរឿងរ៉ាវពិត ដែលធ្វើឱ្យនាងឈានទៅដល់ការលែងលះជាមួយអតីតស្វាមីរបស់ខ្លូនថា ចំណុចសំខាន់ ដែលនាងមិនអាចទទួលយកបានគឺមនុស្សប្រុសមានស្រីផ្សេង នៅចំពោះមុខខ្លួន និង យកមកឡើងផ្ទះ ចេញមុខ ចេញមាត់ តើមាននារីណាទ្រាំបាន ? បើចង់បានបែបនេះមានតែវិធីម្យ៉ាងគឺលែងលះគ្នាទៅ ដើម្បីកុំឱ្យជាប់ជំពាក់ជំពិនគ្នាវែងឆ្ងាយ នាំតែឈឺចាប់ ។
នាងខ្ញុងបានបន្ថែមទៀតថា « ខ្ញុំពិតជាចង់រៀបការមានគូស្រករថ្មីនឹងគេឯងក្នុងពេលឆាប់ៗនេះដែរ តែពិបាកនៅក្នុងការរកមនុស្សម្នាក់មកធ្វើជាគូណាស់ ភាគច្រើនគឺគេមកត្រឹមតែលេងសើច ។ ដូច្នេះហើយទើបខ្ញុំមិនចង់យកខ្លួនបៀត បើប៉ះបុរសដែលមានចិត្តស្មោះមានការងារត្រឹមត្រូវ មិនថា អ្នកសិល្បៈ អ្នករកស៊ី ឬ អ្នកធ្វើការគឺខ្ញុំមិនប្រកាន់នោះទេ ធ្វើយ៉ាងណាសូមកុំមានម្តង ២ ឬ បីគឺស្អប់នឹងស្មាលាមិនចង់ក្បែរឡើយ» ។
ថ្វីត្បិតតែនាងខ្ញុងមិនទទួលស្គាល់ការពិតថា មានអ្នកជាទីស្រលាញ់រួចហើយក្តី តែតាមប្រភពព័ត៌មានពីអ្នកសិល្បៈបានបង្ហើបប្រាប់ថា នាងខ្ញុងកំពុងមានទំនាក់ទំនងស្នេហ៍ជាមួយបុរសអ្នកមានទ្រព្យម្នាក់ នៅក្រៅប្រទេស តែដោយសារស្នេហានោះ ពុំទាន់ច្បាស់លាស់ ទើបនាងមិនទាន់បង្ហាញប្រាប់ទស្សនិកជនឱ្យបានដឹងឮ ។
នាងខ្ញុងមានគម្រោងនឹងចេញទៅសម្តែង នៅសហរដ្ឋអាមេរិកសាជាថ្មីម្តងទៀត នៅក្នុងខែសីហា ខាងមុខនេះ រួមជាមួយដៃគូរបស់ខ្លួនគឺនាយពែកមី ទោះបីជាមានព័ត៌មានថា អ្នកទាំងពីរកំពុងទាក់ទងគ្នាក្តី សម្រាប់នាងខ្ញុងមិនចាប់អារម្មណ៍ចំពោះព័ត៌មាននោះឡើយ ដោយនាងបាននិយាយថា នរណាចង់និយាយអ្វីឱ្យគេនិយាយទៅ យូរៗទៅ គេនឹងឈប់និយាយដោយខ្លួនឯងហើយ ។
ទោះបីជាពេលនេះនាងខ្ញុងនៅមិនទាន់ទទួលបានទិដ្ឋាការក្នុងការចេញទៅសម្តែងនៅសហរដ្ឋអាមេរិកក្តី តែនាងសង្ឃឹមថា គម្រោងចេញទៅសម្តែងនៅអាមេរិកលើកនេះនឹងរលូនទៅតាមគម្រោង ដែលខ្លួនបានគ្រោងទុក ពីព្រោះនាងធ្លាប់ចេញទៅទីនោះម្តងរួចមកហើយ ថែមទាំងបានវិលត្រឡប់តាមពេលវេលា ដែលបានកំណត់ ដូច្នេះគ្មានរឿងអ្វីដែលទូតមិនព្រមផ្តល់ទិដ្ឋាការឱ្យនាងនោះទេ ៕ អាលីណា
ប្រភព៖ pmhotnews