អូស្ត្រាលី​ជំរុញ​កម្ពុជា ​ទទួល​យក​ក្រុម​គ្រួសារ​ជន​ភៀសខ្លួន

ភ្នំពេញ: រដ្ឋាភិបាលអូស្ត្រាលីកំពុងជំរុញឲ្យសមភាគីកម្ពុជាអនុញ្ញាតឲ្យក្រុមគ្រួសារជនភៀសខ្លួនទាំង ៣ នាក់មកប្រទេសកម្ពុជាក្នុងពេលឆាប់ៗជាការអនុវត្តទៅតាមកិច្ចព្រមព្រៀងស្តីពីការតាំងលំនៅថ្មីដ៏ចម្រូងចម្រាសដើម្បីមកជួបពួកគេនៅក្នុងព្រះរាជាណាចក្រកម្ពុជា។ នេះបើតាមមន្ត្រីក្រសួងមហាផ្ទៃបានឱ្យដឹងកាលពីថ្ងៃចន្ទ។

ប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃលោក តាន់ សុវិជ្ជា បានថ្លែងថាបុរសជនជាតិប៉ាគីស្ថានម្នាក់អាហ្វហ្គានីស្ថានម្នាក់ និងស្រីលង្កាម្នាក់ដែលពួកគាត់ទាំង ៣ នាក់សុទ្ធតែមានអាយុលើស ៥០ ឆ្នាំត្រូវបានអនុញ្ញាតឲ្យមកតាំងលំនៅក្នុងប្រទេសកម្ពុជារួចរាល់ហើយពួកគាត់នឹងមកដល់ក្នុងខែនេះ ទោះបីជាមានសំណើជាបន្តបន្ទាប់ពីអូស្ត្រាលីដែលនៅជាប្រធានបទស្ថិតក្នុងការពិភាក្សាក្តី។

លោក សុវិជ្ជា ថ្លែងថា៖ «រដ្ឋាភិបាលអូស្ត្រាលីចង់រៀបចំឲ្យគ្រួសាររបស់ពួកគាត់មកជួបគ្នានៅទីនេះប៉ុន្តែភាគីកម្ពុជាមិនទាន់បានពិភាក្សាឲ្យបានស៊ីជម្រៅនៅឡើយទេលើបញ្ហានេះ។ ពួកគេមិនបានបញ្ជាក់ថានឹងមាន [សមាជិកគ្រួសារ] ប៉ុន្មាននាក់នោះទេគឺពួកគេគ្រាន់តែចង់ឲ្យមានការជួបជុំគ្រួសារមួយប៉ុណ្ណោះ»។

លោក សុវិជ្ជា បានឱ្យដឹងថាសំណើគឺថាសុំមកសួរសុខទុក្ខ។

លោកថ្លែងថា ប្រសិនបើសមាជិកគ្រួសារណាម្នាក់ចង់ស្នាក់នៅក្នុងប្រទេសកម្ពុជាពួកគេត្រូវតែដាក់ពាក្យស្នើសុំជាជនអន្តោប្រវេសន៍។

នៅឆ្នាំ ២០១៤ ប្រទេសកម្ពុជាបានយល់ព្រមទទួលយកជនភៀសខ្លួនដែលប្រទេសអូស្ត្រាលីឃាត់ទុកនៅលើកោះ ណូរុ ជាការប្តូរយកជំនួយចំនួន ៤០ លានដុល្លារអូស្ត្រាលី។

លើកិច្ចព្រមព្រៀងនេះអូស្ត្រាលីក៏បានផ្តល់ប្រាក់ចំនួន ១៥ លានដុល្លារអូស្ត្រាលីផងដែរសម្រាប់ចំណាយលើការតាំងលំនៅថ្មីហើយវាក៏ជាផ្នែកមួយនៃគោលនយោបាយជនភៀសខ្លួនដ៏តឹងរ៉ឹងរបស់ក្រុងកង់បេរ៉ាដែលមានបំណងដើម្បីព្យាយាមរារាំងមិនឲ្យមានជនភៀសខ្លួនចូលមកកាន់ដែនសមុទ្ររបស់ខ្លួនតាមទូក។

គម្រោងនេះត្រូវបានរងការរិះគន់យ៉ាងខ្លាំងហើយមានជនភៀសខ្លួនតែប្រាំនាក់ប៉ុណ្ណោះដែលបានសម្រេចផ្លាស់មករស់នៅក្នុងព្រះរាជាណាចក្រកម្ពុជាហើយបួននាក់ក្នុងចំណោមអ្នកទាំងប្រាំនោះនៅទីបំផុតបានសម្រេចវិលត្រឡប់ទៅប្រទេសកំណើតរបស់ពួកគេវិញ។

មាត្រា ២៤ អនុស្សរណៈនៃការយោគយល់បានជួយគាំទ្រដល់កិច្ចព្រមព្រៀងស្តីពីការតាំងលំនៅថ្មីនៅកម្ពុជាដែលធានាសិទ្ធិជនភៀសខ្លួនឲ្យមានសមាជិកគ្រួសារចំណុះនៅក្នុងប្រទេសកម្ពុជាក្នុងនាមជាជនភៀសខ្លួនតាមច្បាប់។

ប៉ុន្តែលោក សុវិជ្ជា បាននិយាយថាខណៈដែលក្រុមគ្រួសាររបស់ជនភៀសខ្លួនអាចធ្វើដំណើរមកប្រទេសកម្ពុជាបានដោយសេរីប្រសិនបើពួកគាត់មានធនធានហិរញ្ញវត្ថុដែលការជួបជុំគ្រួសារនេះមិនស្ថិតនៅក្រោមការចំណាយរបស់កិច្ចព្រមព្រៀងនេះទេហើយលោកនិយាយថាមានរឿងជាច្រើនទៀតដែលចាំបាច់ត្រូវធ្វើការពិភាក្សាគ្នាបន្ថែម។

សម្រាប់ការចំណាយលើការផ្លាស់ប្តូរលំនៅលោកថ្លែងថា៖ «ខ្ញុំមិនដឹងថាតើប្រទេសអូស្ត្រាលីនឹងចេញប្រាក់ឬអ្វីនោះទេ»។

វាមិនច្បាស់នូវអ្វីដែលជាតួនាទីរបស់ក្រុមគ្រួសារពួកគេដែលចូលរួមនៅក្នុងការសម្រេចចិត្តជាក្រុមដើម្បីទទួលយកកិច្ចព្រមព្រៀងនេះទេ។

ស្ថានទូតអូស្ត្រាលីនៅរាជធានីភ្នំពេញមិនអាចផ្តល់ការឆ្លើយតបបានទេពីម្សិលមិញ។

តាមរយៈអ៊ីមែលអ្នកនាំពាក្យនាយកដ្ឋានការពារជនអន្តោប្រវេសន៍ និងព្រំដែនរបស់ប្រទេសអូស្ត្រាលីបានថ្លែងថាលោកមិនធ្វើអត្ថាធិប្បាយលើករណីបុគ្គលនោះទេប៉ុន្តែលោកបានបន្ថែមថា៖ «ប្រទេសអូស្ត្រាលី និងកម្ពុជាបានប្តេជ្ញាចិត្តក្នុងការរៀបចំដើម្បីផ្តល់ឲ្យជនភៀសខ្លួននូវការគាំទ្រដែលពួកគេត្រូវការដើម្បីឲ្យពួកគេសម្របខ្លួនចូលទៅក្នុងសហគមន៍កម្ពុជា និងកសាងជីវិតរស់នៅថ្មីមួយ»។

កាលពីថ្ងៃអាទិត្យកន្លងទៅនាយករដ្ឋមន្ត្រីអូស្ត្រាលីលោក Malcolm Turnbull បានប្រកាសពីការពង្រឹងបន្ថែមទៀតពីជំហររបស់ទីក្រុងកង់បេរ៉ាក្នុងការធ្វើច្បាប់ថ្មីដើម្បីហាមឃាត់មនុស្សពេញវ័យទាំងអស់ដែលបានបញ្ជូនទៅមណ្ឌលជនអន្តោប្រវេសន៍ក្នុងឈូងសមុទ្រនៅលើកោះណូរុ និងកោះ Manus នៅ ប៉ាពួញូហ្គីណេ ដោយមិនអនុញ្ញាតឲ្យចូលទៅក្នុងប្រទេសអូស្ត្រាលីឡើយទោះបីក្នុងនាមជាភ្ញៀវទេសចរ ឬទៅដើម្បីប្រកបអាជីវកម្មក្តីដោយមិនគិតថាតើពួកគេជាជនភៀសខ្លួនឬក៏អត់នោះទេ។

ថ្លែងនៅវិទ្យុ ABC ក្នុងប្រទេសអូស្ត្រាលី លោក Peter Dutton រដ្ឋមន្ត្រីក្រសួងអន្តោប្រវេសន៍បាននិយាយថា រដ្ឋាភិបាលអាចជួយគ្រួសារដែលរស់នៅដាច់ឆ្ងាញពីគ្នាឲ្យទៅរស់នៅកន្លែងផ្សេងដើម្បីលើកទឹកចិត្តជនភៀសខ្លួនឱ្យទទួលយកការតាំងលំនៅថ្មីនៅក្នុងប្រទេសទីបី៕

ប្រភព៖ ភ្នំពេញប៉ុស្តិ៍