តុលាការអន្តរជាតិនៅទីក្រុងឡាអេបានសម្រេចឲ្យប្រទេសហ្វីលីពីនឈ្នះក្ដីលើប្រទេសចិនជុំវិញជម្លោះសមុទ្រចិនខាងត្បូង។
យោងតាមសេចក្ដីរាយការណ៍របស់សារព័ត៌មាន Inquirer របស់ហ្វីលីពីនបានរាយការណ៍ថា តុលាការមជ្ឈត្តកម្មអន្តរជាតិនៅទីក្រុងឡាអេ នៅថ្ងៃអង្គារនេះបានចេញសាលក្រមមួយ ដោយសម្រេចថាដែនទឹកសមុទ្រហ្វីលីពីនខាងលិច ស្ថិតក្នុងសមុទ្រចិនខាងត្បូង គឺជាកម្មសិទ្ធិស្របច្បាប់របស់ហ្វីលីពីន។
ចំណែកសារព័ត៌មាន Channel News Asia បានផ្សាយថាតុលាការនេះបានបញ្ជាក់ក្នុងសាលក្រមនោះថា ប្រទេសចិនពុំមានមូលដ្ឋានផ្លូវច្បាប់សម្រាប់អះអាងសិទ្ធិជាម្ចាស់លើធនធាននៅសមុទ្រចិនខាងត្បូងនោះឡើយ។ តុលាការនេះក៏បានរកឃើញថាចិនបានបំពានលើសិទ្ធិនេសាទរបស់ហ្វីលីពីននៅក្នុងដែនទឹកមានជម្លោះនោះ។
តុលាការនេះបានបន្តថាចិនពុំមានសិទ្ធិជាប្រវត្តិសាស្ត្រទៅលើដែនទឹកនៅសមុទ្រចិនខាងត្បូងទេ ហើយប្រជុំកោះស្ព្រាតលី ក៏មិនមែនជាតំបន់សេដ្ឋកិច្ចផ្ដាច់មុខរបស់ចិនផងដែរ។
តុលាការនេះបាននិយាយថា ចិនបានបង្កការខូចខាតដល់ប្រព័ន្ធអេកូឡូស៊ីនៅប្រជុំកោះប៉ប្រះទឹកនៅស្ព្រាតលី។
ប៉ុន្តែប្រព័ន្ធផ្សព្វផ្សាយចិននៅមុននេះបន្តិចបានចាត់ទុកតុលាការនេះជាតុលាការរំលោភច្បាប់ ហើយនិយាយថា សាលក្រមនោះគឺជាការសម្រេចមិនត្រឹមត្រូវ៕
ប្រភពៈ VOD