បន្ទាប់ពីបោះជំហានចូលប្រឡូកសិល្បៈជាថ្មីតាមរយៈតារាកំប្លែងជើងចាស់ នាយកុយ អនុញ្ញាតិឱ្យចូលលេងក្នុងក្រុមវិញនោះ ពេលនេះតារាកំប្លែងអ្នកនាង រ៉េន សុធារី ហៅ នាង ឃ្មឹប ស្រាប់តែលេចចេញនូវដំណឹងថ្មី និង ល្អចំនួន ២ ក្នុងពេលតែមួយ ។
បើតាមការឱ្យដឹង បច្ចុប្បន្ននេះតារាកំប្លែង នាង ឃ្មឹប ហាក់មានទីផ្សារសិល្បៈគួរឱ្យកត់សម្គាល់ឡើងវិញ ក្រោយប្រឡូកក្នុងវិស័យនេះបានត្រឹមមួយរយៈខ្លីមក ។ មិនត្រឹមតែទទួលបានប្រជាប្រិយភាពតាមរយៈលេងកំប្លែងវិញទេ នាង ឃ្មឹប ក៏ហាក់ត្រូវបានផលិតករ និង អ្នកធានាមួយចំនួននៅក្រៅប្រទេសចាប់អារម្មណ៍ផងដែរ ដោយកាលពីពេលថ្មីៗនេះមានដំណឹងថា នាងទើបនឹងទទួលបានការងារធំៗដល់ទៅពីរក្នុងពេលដំណាលគ្នា ។
បើតាមព័ត៌មានច្បាស់ការបានឱ្យដឹងថា តារាកំប្លែងនាង ឃ្មឹប មានអ្នកធានាចង់បាននាងឱ្យចេញទៅសម្តែងនៅប្រទេសអូស្ត្រាលី ស្របពេលដែលដំណឹងមួយទៀតគឺនាងទើបតែបានចុះកិច្ចសន្យាថតរឿងឱ្យផលិតកម្មមួយដែលត្រៀមធ្វើពិធីក្រុងពាលីនៅថ្ងៃទី ១៩ ខែមិថុនាខាងមុខផងដែរ ។ តាមរយៈនេះដដែលគេក៏បានឱ្យដឹងបន្តទៀតថា ចំពោះការងារទាំងពីរដែលនាង ឃ្មឹប ទទួលបាននេះគឺមិនជាន់ពេលវេលាគ្នាទេ ដោយការចេញទៅសម្តែងនៅក្រៅស្រុកនោះនៅមានរយៈពេលយូរទៀតទើបអាចចេញដំណើរបាន ពោលគឺរហូតដល់ជិតចូលឆ្នាំខ្មែរឯណោះ ។
ជាមួយនឹងព័ត៌មានថា តារាកំប្លែងនាង ឃ្មឹប មានការងារធំៗពីរក្នុងពេលតែមួយនេះដែរ បើតាមសារព័ត៌មានក្នុងស្រុកមួយក៏បានឱ្យដឹងដូចគ្នានេះដែរ ហើយចំពោះអ្នកនាង ឃ្មឹប ផ្ទាល់ក៏មិនបានបដិសេធនឹងព័ត៌មាននេះដែរ ដោយអ្នកនាងថែមទាំងបាននិយាយថា អ្នកនាងបានរំពឹងខ្ពស់លើការងារថ្មីទាំងពីរនេះ ព្រោះវាអាចនឹងជួយយិតយោងប្រជាប្រិយភាព ព្រមទាំងសេដ្ឋកិច្ចគ្រួសាររបស់នាងបានមួយកម្រិតផងដែរ ៕ សាកល
ប្រភព៖ pmhotnews