បុរសម្នាក់នៅក្នុងប្រទេសថៃ ត្រូវបានខ្សែភ្លើងឆក់ស្លាប់ភ្លាមៗនៅនឹងកន្លែង នៅពេលគាត់ព្យាយាមទាញយក «រង្វាន់» ពីប៉េងប៉ោងមួយដែលបានជាប់គាំងនៅលើខ្សែភ្លើងដែលមានតង់ស្យុងខ្ពស់ ស្ថិតក្នុង Kabinburi ។
តាមប្រភពព័ត៌មានបានឲ្យដឹងថា បុរសម្នាក់ឈ្មោះ Natawut Panompha អាយុ ២០ ឆ្នាំ បានឃើញផ្នែកនៃក្រណាត់ផ្សាយពាណិជ្ជកម្មមួយ ដែលបានរសាត់អណ្តែតនៅលើខ្សែភ្លើង ។ គាត់បានឮមុននោះថា មានមូលនិធិមួយបានបង្ហោះប៉េងប៉ោល ក្នុងគោលបំណងសំរាប់ជនណាម្នាក់បានស្វែងរកឃើញ និងអះអាងថាមានលុយភ្ជាប់នឹងវាផងដែរ ។
ពាក្យពេចន៍នៅលើក្រណាត់នោះ បានបញ្ជាក់ថា នៅក្នុងថង់តូចមួយភ្ជាប់ទៅនឹងការផ្សព្វផ្សាយពាណិជ្ជកម្ម នឹងមានលុយចំនួន ៩,៩៩៩ បាត ។
ប្រភពបន្តថា បុរសរងគ្រោះនោះ សូម្បីជួលរថយន្ត ២,០០០ បាត ដើម្បីជួយគាត់ទាញយកសាច់ប្រាក់នោះពីខ្សែភ្លើងដ៏គ្រោះថ្នាក់បំផុតទាំងនោះ ។ ប៉ុន្តែ នៅពេលបុរសនេះកំពុងលយក្បាលចេញ ដើម្បីទាញ «រង្វាន់» ស្រាប់តែត្រូវខ្សែភ្លើងឆក់ បណ្តាលឲ្យធ្លាក់ដីស្លាប់ភ្លាមៗតែម្តង ។
ក្រោយហេតុការណ៍នេះកើតឡើង ខាងអាជ្ញាធរអគ្គិសនី Kabinburi បានមកដល់ និងទាញយកលុយពីក្រណាត់ និងថង់នោះដោយសុវត្ថិភាព – ដែលក្នុងថង់នោះមានលុយចំនួន ៩,៩៩៩ បាត ។
តាម Thai Rath មនុស្សគ្រប់គ្នានៅកន្លែងកើតហេតុ បានយល់ព្រមថា លុយទាំងនេះគួរតែត្រូវបានប្រគល់ឲ្យគ្រួសារជនរងគ្រោះ ដើម្បីធ្វើបុណ្យ ៕
