អ្នកអង្កេតការបោះឆ្នោតអង្គការខុមហ្វ្រែល (Comfrel) បានអះអាងថា មានគណបក្សមានអាសនៈសភាធំពីរ បានបើកយុទ្ធនាការឃោសនាឃោសនា បោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៤ នាខេត្តព្រះសីហនុ ដោយមានដំណើរការរលូន។
គណបក្សទាំងពីរដែលបើកយុទ្ធនាការឃោសនា និងហែក្បួន មានលក្ខណៈទ្រង់ទ្រាយធំ នៅតាមមូលដ្ឋាននានា ទូទាំងខេត្តព្រះសីហនុ កាលពីព្រឹកថ្ងៃសៅរ៍ ទី២០ ខែឧសភាមាន៖ គណបក្សប្រជាជនកម្ពុជា និងគណបក្សសង្គ្រោះជាតិ ។
លោកស្រី ជៀប សុធារី អ្នកសម្របសម្រួលសមាគមអាដហុក (Adhoc) និងជាមន្ត្រីតំណាងអ្នកអង្កេតការបោះឆ្នោតអង្គការខុមហ្វ្រែល (Comfrel) ប្រចាំខេត្តព្រះសីហនុ ដែលតាមឃ្លាំមើលយុទ្ធនាការឃោសនា បោះឆ្នោត ឃុំសង្កាត់អាណត្តិទី៤នេះ។ លោកស្រី ឲ្យដឹងថា ថ្ងៃចាប់ផ្តើមបើកយុទ្ធនាការឃោសនាបោះឆ្នោតដំបូងនេះ ឃើញសកម្មភាព របស់គណបក្សនយោបាយនីមួយៗ បានអនុវត្តតាមច្បាប់បោះឆ្នោត ឬស្របទៅតាមការកំណត់ របស់ស្ថាប័នរៀបចំការបោះឆ្នោតបានដាក់ឲ្យអនុវត្ត។
លោកស្រី សុធារី ឲ្យដឹងថា សកម្មភាពឃោសនា និងការហែក្បួនឃោសនាបោះឆ្នោតនេះ ក្បួនហែ របស់គណបក្សនយោបាយនីមួយៗ គឺបានធ្វើសកម្មភាពនៅតាមមូលដ្ឋានរៀងៗខ្លួន និងស្របទៅតាមការចង្អុលបង្ហាញ របស់ស្ថាប័នរៀបចំពាក់ព័ន្ធ មានថ្នាក់ខេត្តព្រះសីហនុជាដើម។ ជាងនេះ ក៏ឃើញមានកម្លាំងនគរបាល តាមការពារសន្តិសុខ និងសណ្តាប់ជូនថែមទៀត។
មន្ត្រីដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ប្រចាំខេត្តព្រះសីហនុ ទាំងថ្នាក់ខេត្ត ក្រុងស្រុក រហូតដល់ថ្នាក់ឃុំសង្កាត់នានា បានផ្ញើរសារតាមមធ្យោបាយបន្លឺសំឡេងផ្សេងៗ ទាំងនៅទីស្នាក់ការបក្ស និងនៅតាមក្បួនហែ តាមផ្លូវសាធារណៈនានាទាំងទីប្រជនជន រហូតដល់ទីជនបទ នៅទូទាំងខេត្តព្រះសីហនុ។
លោក ជាម ហ៊ីម ប្រធានគណបក្សប្រជាជនកម្ពុជា និងជាប្រធានសមាជិកក្រុមប្រឹក្សា ខេត្តព្រះសីហនុ ឲ្យដឹងថា ថ្ងៃចាប់ផ្តើមដំបូង នៃយុទ្ធនាការឃោសនាបោះឆ្នោតឃុំសង្កាត់នេះ ក្រុមការងារជាថ្នាក់ដឹកនាំ របស់គណបក្សប្រជាជនកម្ពុជា នៅតាមមូលដ្ឋាននីមួយៗ បានធ្វើពិធីជួបជុំ និងហែក្បួនឃោសនាទ្រង់ទ្រាយធំ នៅថ្ងៃដំបូងនេះ។
ការឃោសនានេះ គណបក្សប្រជាជនកម្ពុជា បានផ្ញើរសាររំលឹកដល់ប្រជាពលរដ្ឋ ជាម្ចាស់ឆ្នោត ឲ្យបន្តបោះឆ្នោតជូនបក្សប្រជាជនកម្ពុជា ឲ្យឈ្នះជាមេឃុំចៅសង្កាត់ទាំង ២៩ឃុំសង្កាត់ នៅទូទាំងខេត្តព្រះសីហនុ សម្រាប់អាណត្តិទី៤នេះ ដើម្បីឲ្យគណបក្សនេះអាចបន្តដឹកនាំមូលដ្ឋាន និងសង្គមជាតិ ឲ្យមានសុខសន្តិភាព និងមានការរីកចំរើនទាំងសង្គមជាតិ ក៏ដូជារីកចំរើនទាំងសង្គមគ្រួសារ របស់ប្រជាពលរដ្ឋ នៅទូទាំងប្រទេសទាំងមូល។
ថ្លែងនៅចំពោះមុខសមាជិកគាំទ្រ ក្នុងពិធីជួបជុំបើកយុទ្ធនាការឃោសនាដំបូងនាខេត្តព្រះសីហនុ មេដឹកនាំគណបក្សប្រជាជនកម្ពុជា នៅតាមមូលដ្ឋាននីមួយៗ បានហៅបក្សខ្លួនថា ជាគណបក្សឈ្នះឆ្នោត ដែលដឹកនាំកសាងសង្គមកម្ពុជា ពីមានសង្គ្រាម មកឲ្យមានសន្តិភាព និងជំរុញឲ្យប្រជាទេសជាតិទាំងមូលមានការរីកចំរើនមកទល់សព្វថ្ងៃនេះ។
មេដឹកនាំគណបក្សប្រជាជនកម្ពុជា ប្រចាំខេត្តព្រះសីហនុ អំពាវនាវដល់ម្ចាស់ឆ្នោត ឬប្រជាពលរដ្ឋ មានសិទ្ធិបោះឆ្នោត ត្រូវបោះឆ្នោតជូនគណបក្សប្រជាជនកម្ពុជា ឲ្យបានទាំងអស់គ្នា ដើម្បីឲ្យគណបក្សនេះបានឈ្នះជាមេឃុំចៅ-សង្កាត់ បន្តដឹកនាំមូលដ្ឋាន នានាឲ្យរីកចំរើន និងជួយដោះស្រាយ នូវទុក្ខកង្វល់ប្រជាពលរដ្ឋជាបន្តទៀត នាថ្ងៃបោះឆ្នោតថ្ងៃអាទិត្យ ទី៤ ខែមិថុនា ឆ្នាំ២០១៧។
នាឱកាសនេះដែរ លោក សុខ សាវ៉ាត ប្រធានប្រតិបត្តិគណបក្សសង្គ្រោះជាតិ និងជាសមាជិកក្រុមប្រឹក្សា ខេត្តព្រះសីហនុ នៃគណបក្សសង្គ្រោះជាតិ បានអះអាងថាគណបក្សនេះមានមេដឹកនាំមានចំណេះដឹងខ្ពស់ និងមានចិត្តស្អាតស្អំ ដោយមានឆន្ទៈពិតប្រាកដ ជួយគិតគូរពីសុខទុក្ខពលរដ្ឋ និងតំកល់ផលប្រយោជន៍ជាតិជាធំ។ លោកថា បើគណបក្សនេះ ឈ្នះបានដឹកនាំជាមេឃុំចៅសង្កាត់អាណត្តិទី៤នេះ នឹងជំរុញលុបបំបាត់អំពើពុករលួយ បក្សពួកនិយម ជាពិសេសជួយដោះស្រាយកង្វល់ពលរដ្ឋ នៅពេលពួកគេមកស្នើសុំកិច្ចអន្តរាគមន៍លើបញ្ហាអ្វីមួយ ពីមេឃុំចៅសង្កាត់ឈ្នះឆ្នោត របស់គណបក្សសង្គ្រោះជាតិនាថ្ងៃខាងមុខ។
បន្ថែមលើនេះ លោក សុខ សាវ៉ាត ក្នុងមានមេដឹកនាំគណបក្សសង្គ្រោះជាតិ ប្រចាំខេត្តព្រះសីហនុ បានស្នើឲ្យប្រជាពលរដ្ឋ ជាម្ចាស់ឆ្នោត ត្រូវបោះឆ្នោតជូនបេក្ខជនមេឃុំចៅសង្កាត់ របស់គណបក្សសង្គ្រោះជាតិ ឲ្យបានទាំងអស់គ្នា នៅថ្ងៃអាទិត្យ ថ្ងៃទី៤ មិថុនា ឆ្នាំ២០១៧។
ប្រតិទិនគណៈកម្មាធិការជាតិរៀបចំការបោះឆ្នោត ឬហៅកាត់( គ.ជ.ប.) បានបង្ហាញថា កាលបរិច្ឆេទ នៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ មានរយៈពេល ១៤ថ្ងៃ ដោយចាប់ពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧។
ការបោះឆ្នោតនេះ នាមូលដ្ឋានខេត្តព្រះសីហនុ មានគណបក្សនយោបាយចំនួន ៥ បានចូលរួមប្រកួតប្រជែង ការបោះឆ្នោតឃុំសង្កាត់ អាណត្តិទី៤នេះ ដែលនឹងចាប់ផ្តើម នៅព្រឹកថ្ងៃអាទិត្យ ទី៤ ខែមិថុនា ឆ្នាំ២០១៧។
លោក ហួត ផុន ប្រធានលេខាធិការដ្ឋានរៀបចំការបោះឆ្នោត ខេត្តព្រះសីហនុ មានប្រសាសន៍ថា ការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៤នេះ មានគណបក្សនយោបាយចំនួន៥ បានឈរឈ្មោះប្រកួតប្រជែងរួមមាន៖ គណបក្សប្រជាជនកម្ពុជា គណបក្សសង្គ្រោះជាតិ គណបក្សហ៊ុនស៊ិនប៉ិច គណបក្សខ្មែរួបរួមជាតិ និងគណបក្សសម្ព័ន្ធ ដើម្បីប្រជាធិបតេយ្យ។
លោក ហួត ផុន ឲ្យដឹងថា ខេត្តទេសចរណ៍ជាប់ឆ្នេរសមុទ្រមួយនេះ អ្នកមានសិទ្ធិ និងបានចុះឈ្មោះក្នុងបញ្ជីបោះឆ្នោតសរុបមានចំនួនជាង ១១ម៉ឺននាក់៕ ដែន សីមា
