អាមេរិកសាកល្បងស្ទាក់បាញ់គ្រាប់មីស៊ីលដោយជោគជ័យ តែកូរ៉េខាងជើងព្រមានបាញ់គ្រាប់មីស៊ីលជាថ្មី

May 31, 2017, 6:12 pm

≫ Next: សាលាក្រុងភ្នំពេញមិនអនុញ្ញាតឱ្យបក្សប្រឆាំងប្រមូលផ្តុំនៅថ្ងៃឃោសនាបោះឆ្នោតចុងក្រោយ

≪ Previous: អ្នកវិភាគ៖ សមរភូមិក្នុងហឹបឆ្នោតដ៏តានតឹងគឺនៅភ្នំពេញ

សហរដ្ឋអាមេរិកបានប្រកាសឲ្យដឹងនៅថ្ងៃអង្គារ ទី៣០ ឧសភាថា ខ្លួនបានធ្វើការសាកល្បងស្ទាក់បាញ់កម្ទេចគ្រាប់មីស៊ីលអន្តរទ្វីបប្រកបដោយជោគជ័យ។ នេះជាជោគជ័យលើកទី១ របស់កងទ័ពអាមេរិកក្នុងការស្ទាក់បាញ់កម្ទេចគ្រាប់មីស៊ីលអន្តរទ្វីប និងក៏ជាសញ្ញាព្រមានដល់កូរ៉េខាងជើង ឬមួយក៏ប្រទេសផ្សេងទៀតដែលតែងតែបន្តផ្គើនសហគមន៍អន្តរជាតិតាមរយៈការបាញ់សាកល្បងគ្រាប់មីស៊ីលអន្តរទ្វីប។

ម្យ៉ាងទៀត ជោគជ័យនៃការសាកល្បងនេះក៏ជាការធានាសន្តិសុខទឹកដី និងពលរដ្ឋអាមេរិកឲ្យគេចផុតពីគ្រាប់មីស៊ីលអន្តរទ្វីបរបស់សត្រូវអាមេរិកដែរ។

បន្ទាប់ពីកងទ័ពអាមេរិកបានប្រកាសឲ្យដឹងពីការសាកល្បងស្ទាក់បាញ់កម្ទេចគ្រាប់មីស៊ីលអន្តរទ្វីបប្រកបដោយជោគជ័យនៅថ្ងៃអង្គារ ទី៣០ ឧសភា កូរ៉េខាងជើងចេញមុខឆ្លើយតបវិញដោយព្រមានបាញ់សាកល្បងគ្រាប់មីស៊ីលអន្តរទ្វីបជាថ្មីទៀតនៅថ្ងៃពុធ ទី៣១ ឧសភា។ កាសែតផ្លូវការនៃរបបកុម្មុយនិស្តកូរ៉េខាងជើងបានបញ្ជាក់ច្បាស់ៗថា កងទ័ពបានត្រៀមខ្លួនរួចជាស្រេចដើម្បីបាញ់គ្រាប់មីស៊ីលអន្តរទ្វីបទៅកន្លែងណាក៏បាន នៅពេលណាក៏បានក្រោមបញ្ជាផ្ទាល់របស់លោកគីម ជុនអ៊ុន។ កាសែតផ្លូវការកូរ៉េខាងជើងដដែលបានបន្ថែមដោយរម្លឹកដាស់តឿនអាមេរិកថា កូរ៉េខាងជើងអាចកម្ទេចអាមេរិកឲ្យទៅជាផេះជាមួយនឹងអាវុធនុយក្លេអ៊ែរ និងថា សម្តីរបៀបនេះមិនមែនជាសម្តីខ្យល់ទេ។

គេអាចមិនចាប់អារម្មណ៍លើសម្តី និងការព្រមានរបស់ព្យុងយ៉ាង តែចូរកុំភ្លេចថា គ្រាន់តែក្នុងរយៈពេល ៣សប្តាហ៍កន្លងទៅ កូរ៉េខាងជើងបានបាញ់សាកល្បងគ្រាប់មីស៊ីលអន្តរទ្វីបចំនួន ៣ដង និងមានចំនួន ១២ដង បើគិតតាំងពីដើមឆ្នាំ ២០១៧។ ម្យ៉ាងទៀត ទោះបីជាគ្រាប់មីស៊ីលអន្តរទ្វីបដែលកូរ៉េខាងជើងបានបាញ់កន្លងមកទទួលបរាជ័យ ឬជោគជ័យដោយផ្ទុះលើអាកាស ធ្លាក់ចូលទឹកសមុទ្រ ឬមួយក៏មិនធ្លាក់លើទឹកដីអាមេរិកាំងក្តី ក៏វាជាសក្ខីកម្មមួយដែលបញ្ជាក់ពីមហិច្ឆតាជាក់ច្បាស់របស់របបកុម្មុយនិស្តក្រុងព្យុយ៉ាងក្នុងការបំពាក់អាវុធនុយក្លេអ៊ែរ និងគ្រាប់មីស៊ីល។

គឺនៅក្នុងន័យនេះហើយបានជាអាមេរិកតែងបានធ្វើការសាកល្បងស្ទាក់បាញ់កម្ទេចគ្រាប់មីស៊ីល។ កន្លងមក កងទ័ពអាមេរិកធ្លាប់បានសាកល្បងស្ទាក់បាញ់កម្ទេចគ្រាប់មីស៊ីលចម្ងាយជិតចំនួន ៣ដង តែទទួលបរាជ័យទាំង ៣ដង។ គឺទើបតែការសាកល្បងនៅឆ្នាំ ២០១៤ ទេដែលទទួលបានជោគជ័យ។ ចំណែកការសាកល្បងលើគ្រាប់មីស៊ីលអន្តរទ្វីប ឬគ្រាប់មីស៊ីលចម្ងាយដែលទើបធ្វើនៅថ្ងៃអង្គារ ទី៣០ ឧសភាបែរជាទទួលបានជោគជ័យភ្លាមៗតែម្តង។

ប្រព័ន្ធមីស៊ីលប្រឆាំងមីស៊ីលអន្តរទ្វីបរបស់អាមេរិកនៅមានកម្រិត

ជោគជ័យរបស់កងទ័ពអាមេរិកក្នុងការសាកល្បងស្ទាក់បាញ់កម្ទេចគ្រាប់មីស៊ីលអន្តរទ្វីបពេលនេះ ជាការព្រមានកូរ៉េខាងជើងផង និងក៏ដើម្បីការពារអាមេរិកផងដែរ នោះបើទោះបីជាលោក Jeff Davis អ្នកនាំពាក្យក្រសួងការពារជាតិអាមេរិកបានបញ្ជាក់នៅថ្ងៃអង្គារ ទី៣០ ឧសភាថា ការសាកល្បងស្ទាក់បាញ់កម្ទេចគ្រាប់មីស៊ីលអន្តរទ្វីបមិនមែនធ្វើឡើងដើម្បីឆ្លើយតបនឹងទង្វើបាញ់សាកល្បងគ្រាប់មីស៊ីលអន្តរទ្វីបរបស់កូរ៉េខាងជើងនាពេលថ្មីៗនេះក៏ដោយ។ តែលោក Davis បាននិយាយជាលក្ខណៈទូទៅ និងបន្ថែមថា កូរ៉េខាងជើងអាចជាហេតុផលមួយដែលបានបង្ខំអាមេរិកឲ្យបំពាក់ប្រព័ន្ធមីស៊ីលប្រឆាំងមីស៊ីលអន្តរទ្វីបនៅពេលនេះ។

តាមលោក Davis ក្រុងព្យុងយ៉ាងបានបន្តបាញ់សាកល្បងគ្រាប់មីស៊ីលអន្តរទ្វីប ដូចដែលកូរ៉េខាងជោងបានធ្វើនៅចុងសប្តាហ៍កន្លងមក ព្រមទាំងបានប្រើពាក្យសម្តីព្រមានកំញើញដ៏គ្រោះថ្នាក់ដែលអាចបញ្ជាក់ពីការដែលកូរ៉េខាងជើងមានលទ្ធភាពអាចវាយប្រហារអាមេរិកដោយប្រើគ្រាប់មីស៊ីល។ គួរជម្រាបជូនថា នៅពេលចូលកាន់តំណែងក្នុងខែមករាកន្លងទៅ លោកប្រធានាធិបតីដូណាល់ ត្រាំធ្លាប់បានសន្យាធ្វើការអភិវឌ្ឍន៍លើវិស័យការពារជាតិ ពិសេសក្នុងប្រព័ន្ធមីស៊ីលប្រឆាំងមីស៊ីលដើម្បីប្រឈមទប់នឹងការគំរាមកំហែងដោយគ្រាប់មីស៊ីលអន្តរទ្វីបពីកូរ៉េខាងជើង និងពីប្រទេសអ៊ីរ៉ង់។

តែក្រុមអ្នកជំនាញបានមើលឃើញថា ប្រព័ន្ធខែលមីស៊ីលប្រឆាំងមីស៊ីលអន្តរទ្វីបរបស់អាមេរិកពេលនេះនៅមានកម្រិតនៅឡើយ។ នៅមានកម្រិតក៏ដោយសារថា ក្នុងករណីដែលមានសង្រ្គាមនុយក្លេអ៊ែរផ្ទុះឡើងដោយមានការចូលរួមពីរុស្ស៊ី ឬពីចិននោះ អាមេរិកគ្មានខែលមីស៊ីលប្រឆាំងមីស៊ីលអន្តរទ្វីបគ្រប់គ្រាន់ដើម្បីស្ទាក់បាញ់កម្ទេចគ្រាប់មីស៊ីលទេ។

ទ័ណ្ឌកម្មថ្មីប្រឆាំងកូរ៉េខាងជើង?

គេសង្ឃឹមថាក្នុងសប្តាហ៍នេះ នឹងអាចមានសេចក្តីសម្រេចចិត្តថ្មីមួយទៀតពីក្រុមប្រឹក្សាសន្តិសុខដើម្បីថ្កោលទោសកូរ៉េខាងជើងពីបទបានបាញ់សាកល្បងគ្រាប់មីស៊ីលអន្តរទ្វីបនាចុងសប្តាហ៍កន្លងទៅ។ តាមការបញ្ជាក់របស់លោកស្រី Nikki Haley ឯកអគ្គរដ្ឋទូតអាមេរិកប្រចាំអង្គការសហប្រជាជាតិ អាមេរិក និងចិនបានចរចាគ្នាអស់ជាច្រើនសប្តាហ៍មកហើយលើសេចក្តីសម្រេចចិត្តថ្មីមួយដែលអាចដាក់គំនាបបន្ថែមលើកូរ៉េខាងជើង។ តែមកទល់ពេលនេះ នៅមិនទាន់បែកធ្លាយព័ត៌មានណាមួយស្តីពីខ្លឹមសារ ឬមួយក៏វិធានការដែលមានចែងនៅក្នុងសេចក្តីសម្រេចចិត្តនោះទេ។

គួររម្លឹកជូនថា ក្រុមប្រឹក្សាសន្តិសុខបានចេញសេចក្តីសម្រេចចិត្តថ្កោលទោសកូរ៉េខាងជើងច្រើនរាប់មិនអស់ តែលើកណាក៏ដូចជាលើកណា កូរ៉េខាងជើងមិនឈឺក្បាល និងបន្តធ្វើអ្វីស្រេចតែទំនើងចិត្ត។ នេះក៏ដោយសារថា សេចក្តីសម្រេចចិត្តទាំងអស់នោះមិនមានលក្ខណៈបង្ខិតបង្ខំ និងដោយមានរុស្ស៊ី រួមទាំងចិនជួយការពារ។ នៅលើកនេះ និងជាងពេលណាៗទាំងអស់ ចិនបានទទួលគំនាបកាន់តែខ្លាំងឡើងៗ ពិសេសពីលោកដូណាល់ ត្រាំដែលព្រមានដុសក្អែលលោកគីម ជុនអ៊ុនដោយខ្លួនឯង។

នៅថ្ងៃចន្ទដើមសប្តាហ៍នេះ ពោលមួយថ្ងៃក្រោយកូរ៉េខាងជើងបាញ់សាកល្បងគ្រាប់មីស៊ីលអន្តរទ្វីបជាថ្មី លោកដូណាល់ ត្រាំបានយល់ឃើញថា កូរ៉េខាងជើងព្រហឺងណាស់មិនគោរពចិនបន្តិចណាសោះ។ ចំណែកលោកនាយករដ្ឋមន្រ្តីជប៉ុនស្ហ៊ីនហ្សូ អាបេបានគូសបញ្ជាក់ជាថ្មីម្តងទៀតពីតួនាទីសំខាន់ខ្លាំងណាស់របស់ចិននៅក្នុងបញ្ហាកូរ៉េខាងជើង។ ឃើញថា ចិនបានទទួលគំនាបពីគ្រប់ទិសទី តែប៉េកាំងហាក់មិនទាន់បានត្រៀមខ្លួនទះសម្ព័ន្ធមិត្តកូរ៉េខាងជើងមួយកំផ្លៀងនៅឡើយទេ និងបានឆ្លៀតរម្លឹកជាថ្មីថា អាទិភាព គឺកិច្ចចរចាមិនមែនទ័ណ្ឌកម្មទេ៕ ប្រភព៖ RFI

↧

សាលាក្រុងភ្នំពេញមិនអនុញ្ញាតឱ្យបក្សប្រឆាំងប្រមូលផ្តុំនៅថ្ងៃឃោសនាបោះឆ្នោតចុងក្រោយ

May 31, 2017, 6:15 pm

≫ Next: អង្គការលើកលែងទោសអន្តរជាតិរិះគន់ធ្ងន់ៗលើប្រព័ន្ធ«តុលាការអយុត្តិធម៌‍»របស់កម្ពុជា

≪ Previous: អាមេរិកសាកល្បងស្ទាក់បាញ់គ្រាប់មីស៊ីលដោយជោគជ័យ តែកូរ៉េខាងជើងព្រមានបាញ់គ្រាប់មីស៊ីលជាថ្មី

គណបក្សប្រជាជនកម្ពុជា និងគណបក្សសង្គ្រោះជាតិ គ្រោងដឹកនឹងសំញ៉ែងក្បួនដង្ហែមនុស្សរាប់ម៉ឺននាក់នៅថ្ងៃឃោសនាបោះឆ្នោតចុងក្រោយទី០២ មិថុនាខាងមុខ មុននឹងការបោះឆ្នោតចូលមកដល់នៅថ្ងៃទី០៤ មិថុនា។ ប៉ុន្តែសាលារាជធានីភ្នំពេញមិនអនុញ្ញាតឱ្យបក្សប្រឆាំងជួបជុំគ្នានៅទីលានប្រជាធិបតេយ្យចាស់នោះទេ។ យ៉ាងណាក៏ដោយ គណបក្សប្រឆាំងនៅតែបន្តផែនការរបស់ខ្លួនដដែល។

សាលារាជធានីភ្នំពេញនៅព្រឹកថ្ងៃទី៣១ ឧសភានេះ មិនអនុញ្ញាតឱ្យគណបក្សសង្គ្រោះជាតិរបស់លោកកឹម សុខា ជួបជុំគ្នានៅទីលានប្រជាធិបតេយ្យចាស់នោះទេ។ នេះគឺជាលទ្ធផលនៃកិច្ចប្រជុំរវាងគណបក្សសង្គ្រោះជាតិ គណៈកម្មការរៀបចំការបោះឆ្នោតក្រុង។ ប៉ុន្តែលោក ម៉ន ផល្លា ប្រធានគណបក្សសង្គ្រោះជាតិនៅតែអះអាងថា គណបក្សប្រឆាំងរបស់លោក នៅតែបន្តជួបជុំអ្នកគាំទ្រ១០ម៉ឺននាក់តាមគម្រោង។ សាលារាជធានីភ្នំពេញ បានលើកឡើងពីមូលហេតុសន្តិសុខដែលអាជ្ញាធរត្រូវការពារនៅពេលដែលក្បួននៃគណបក្សទាំងពីរហែឆ្លងកាត់គ្នា។

សម្រាប់គណបក្សសង្គ្រោះជាតិ ហេតុផលរបស់អាជ្ញាធរមិនអនុញ្ញាតឱ្យមានការជួបជុំនេះមិនអាចទទួលយកបានទេ។ សូមបញ្ជាក់ថា គណបក្សសង្គ្រោះជាតិគ្រោងនឹងរៀបចំកម្លាំង១០ម៉ឺននាក់សម្រាប់ជួបជុំប្រគុំតន្ត្រីពេញមួយព្រឹកថ្ងៃទី០២ មិថុនា រួចទើបដង្ហែក្បួនធំនៅពេលរសៀល។

គួរបញ្ជាក់ថា នៅថ្ងៃចុងក្រោយនៃការឃោសនា លោកនាយករដ្ឋមន្ត្រីហ៊ុន សែននឹងដឹកនាំក្បួនឃោសនាបោះឆ្នោតមនុស្ស១៥ម៉ឺននាក់ ហែកាត់ទីក្រុងភ្នំពេញដើម្បីអូសទាញសំឡេងឆ្នោតជាលើកចុងក្រោយ។ គណបក្សប្រជាជនកម្ពុជា នឹងបើកកម្មវេទិកានៅផ្លូវមរតកតេជោក្នុងខណ្ឌមានជ័យ ហើយក្បួននឹងធ្វើដំណើររហូតដល់វង្វង់មូលចោមចៅ។ ក្បួនធំរបស់គណបក្សកាន់អំណាចគ្រោងនឹងប្រើប្រាស់រថយន្ត១ពាន់៥រយគ្រឿង និងម៉ូតូ ចំនួន២ម៉ឺន៥ពាន់គ្រឿង។

គណៈកម្មាធិការជាតិរៀបចំការបោះឆ្នោត បានអំពាវនាវឱ្យគណបក្សទាំងពីរប្រកាន់វប្បធម៌អហិង្សា និងគោរពច្បាប់ នៅពេលដង្ហែក្បួន។ សូមបញ្ជាក់ថា ការបោះឆ្នោតក្រុមប្រឹក្សាឃុំសង្កាត់អាណត្តិទី៤នេះ មានគណបក្សចំនួន១២ បានចូលរួម។ រហូតមកដល់ថ្ងៃទី៣១ ឧសភានេះ គណៈកម្មាធិការជាតិរៀបចំការបោះឆ្នោត ទទួលបានបណ្តឹងចំនួន៥៦ ប៉ុន្តែភាគច្រើនត្រូវបានដោះស្រាយសឹងតែទាំងអស់នៅថ្នាក់មូលដ្ឋាន។

យ៉ាងណាក៏ដោយ ក្នុងយុទ្ធនាការឃោសនា បោះឆ្នោតនេះ មានបណ្តឹងយ៉ាងហោចចំនួន៣ដែលបានប្តឹងបេក្ខជនឃុំ ប្រធានបក្សខេត្ត និងសកម្មជនរបស់បក្សប្រឆាំងត្រូវបានប្តឹងទៅកាន់តុលាការ។ បើទោះបីជាបែបណា គ.ជ.ប បានអះអាងថាការឃោសនាបោះឆ្នោតប្រព្រឹត្តទៅក្នុងបរិយាកាសវិជ្ជមាននៅឡើយទេ៕ ប្រភព៖ rfi

↧

អង្គការលើកលែងទោសអន្តរជាតិរិះគន់ធ្ងន់ៗលើប្រព័ន្ធ«តុលាការអយុត្តិធម៌‍»របស់កម្ពុជា

May 31, 2017, 6:21 pm

≫ Next: សមាជិកសភាអាមេរិកអំពាវនាវឲ្យការបោះឆ្នោតថ្នាក់ជាតិនៅកម្ពុជាមានលក្ខណៈ«សេរី និងយុត្តិធម៌‍»

≪ Previous: សាលាក្រុងភ្នំពេញមិនអនុញ្ញាតឱ្យបក្សប្រឆាំងប្រមូលផ្តុំនៅថ្ងៃឃោសនាបោះឆ្នោតចុងក្រោយ

ភ្នំពេញ —អង្គការលើកលែងទោសអន្តរជាតិ (Amnesty International) បានចេញរបាយការណ៍មួយបង្ហាញពីអ្វីដែលខ្លួនហៅថា «ប្រព័ន្ធតុលាការនៃភាពអយុត្តិធម៌» នៅកម្ពុជា ដែលបានវាយប្រហារលើក្រុមដែលមានទស្សនៈផ្ទុយពីរដ្ឋាភិបាល។ ក្រុមមន្ត្រីរដ្ឋាភិបាលថ្លែងថា របាយការណ៍នេះ គ្មានឥទ្ធិពលជាដុំកំភួនណាមួយមកលើរដ្ឋាភិបាល និងគណបក្សកាន់អំណាចទេ។

ក្រុមអ្នកការពារសិទ្ធិមនុស្សនៅកម្ពុជាយល់ស្របទៅនឹងរបាយការណ៍របស់អង្គការសិទ្ធិមនុស្សអន្តរជាតិមួយនេះ ដែលមានចំណងជើងថា៖ «តុលាការអយុត្តិធម៌ ការបង្ក្រាបភាពសកម្មនិយមតាមរយៈប្រព័ន្ធយុត្តិធម៌ព្រហ្មទណ្ឌនៅកម្ពុជា» ហើយដែលត្រូវបានចេញផ្សាយនៅចំពេលដែលគណបក្សនយោបាយចំនួន ១២ កំពុងធ្វើយុទ្ធនាការឃោសនាបោះឆ្នោតឃុំ-សង្កាត់។

របាយការណ៍ដែលត្រូវបានចេញផ្សាយកាលពីថ្ងៃទី៣០ ខែឧសភា បានសរសេរក្នុងន័យដើមថា៖

«ចាប់តាំងពីការបោះឆ្នោតសាកលលើកចុងក្រោយ នាខែកក្កដា ឆ្នាំ២០១៣ ប្រព័ន្ធយុត្តិធម៌ព្រហ្មទណ្ឌកម្ពុជាហាក់ដូចជាវាយប្រហារជាប្រព័ន្ធមកលើអ្នកការពារសិទ្ធិមនុស្ស និងសកម្មជននយោបាយប្រឆាំង៖ មានមនុស្សយ៉ាងហោចណាស់២៧នាក់កំពុងជាប់ឃុំ»។ ប៉ុន្តែអង្គការការពារសិទ្ធិមនុស្សក្នុងស្រុកលីកាដូបានឲ្យដឹងថា មានអ្នកទោសនយោបាយ ២៥នាក់ប៉ុណ្ណោះ។

របាយការណ៍របស់អង្គការ Amnesty International បានបន្តថា៖

«អ្នកការពារសិទ្ធិមនុស្ស និងសកម្មជននយោបាយប្រឆាំងជាច្រើន ត្រូវបានវាយប្រហារដោយអំណាចនីតិប្រតិបត្តិ និងគណបក្សកាន់អំណាច តាមរយៈប្រព័ន្ធយុត្តិធម៌ព្រហ្មទណ្ឌ»។

លោក អំ សំអាត ប្រធានការិយាល័យបច្ចេកទេសស៊ើបអង្កេតនៃអង្គការការពារសិទ្ធិមនុស្សលីកាដូ ដែលកំពុងរងបណ្តឹងនៅតុលាការពាក់ព័ន្ធការប្រព្រឹត្តអំពើហិង្សា ថ្លែងប្រាប់ VOA នៅថ្ងៃពុធនេះថា របាយការណ៍ធ្វើឡើងដោយអង្គការលើកលែងទោសអន្តរជាតិ ត្រូវបានធ្វើឡើងដោយមានការចុះអង្កេតស្ថានភាពជាក់ស្តែងនៅកម្ពុជា ដែលមន្ត្រីសិទ្ធិមនុស្ស និងសកម្មជនផ្សេងកំពុងប្រឈមនឹងការធ្វើទុក្ខបុកម្នេញតាមប្រព័ន្ធតុលាការ។

មន្ត្រីសិទ្ធិមនុស្សរូបនោះបញ្ជាក់ថា៖

«ការចេញរបាយការណ៍គេមួយៗបាទ គឺគេអាចមានមូលដ្ឋាន និងមានការស្រាវជ្រាវ បានគេអាចធ្វើការចេញមកដូច្នេះ ហើយវាឆ្លុះបញ្ចាំងទៅវិញ កន្លងមកដូចជាការចាប់មន្ត្រីអង្គការសិទ្ធិមនុស្ស សកម្មជនផ្សេងៗ ដែលគេមើលទៅថា វាមិនមានហេតុផលសមរម្យ នៅក្នុងការចាប់ខ្លួនហ្នឹង អាហ្នឹងគឺយើងមើលឃើញ»។

លោក សំ ចន្ទគា អ្នកនាំពាក្យរបស់សមាគមការពារសិទ្ធិមនុស្សអាដហុក មានប្រសាសន៍ថា របាយការណ៍របស់អង្គការលើកលែងទោសអន្តរជាតិ បានឆ្លុះបញ្ចាំងពីស្ថានភាពពិតប្រាកដនៃប្រព័ន្ធយុត្តិធម៌កម្ពុជា ដែលកំពុងរងគំនាបរបស់អំណាចនីតិប្រតិបត្តិ។ លោកប្រាប់ VOA បន្ថែមថា មន្ត្រីតុលាការសព្វថ្ងៃ មិនហ៊ានអារកាត់សេចក្តីដោយប្រើអំណាចឯករាជ្យរបស់ខ្លួននោះទេ។ លោកពន្យល់ថា៖

«ស្ថានភាពបច្ចុប្បន្នហ្នឹង គឺប្រព័ន្ធតុលាការ គឺទន់ខ្សោយមិនហ៊ានប្រើឆន្ទានុសិទ្ធិរបស់ខ្លួន ដូចជាករណីមន្ត្រីអាដហុកនេះជាភស្តុតាងស្រាប់ហើយ។ អញ្ចឹងយើងគាំទ្រថា របាយការណ៍របស់អង្គការលើកលែងទោសអន្តរជាតិនេះមានលក្ខណៈត្រឹមត្រូវទៅហ្នឹងស្ថានការណ៍បច្ចុប្បន្ននៅប្រទេសកម្ពុជា ពាក់ព័ន្ធប្រព័ន្ធយុត្តិធម៌បាទ»។

របាយការណ៍បានពណ៌នាពី«យុទ្ធនាការថ្ងៃច័ន្ទពណ៌ខ្មៅ» ដែលបាននាំដល់ការចាប់ឃុំខ្លួន រួចដោះលែងវិញស្រ្តីក្នុងតំបន់បឹងកក់ជាង ១០នាក់ ដែលជាអ្នកតស៊ូនឹងការបណ្ដេញចេញក្នុងតំបន់នោះ។ ក្នុងចំណោមស្ត្រីទាំងនោះ គឺមានអ្នកស្រី ទេព វន្នី ដែលត្រូវបានតុលាការចោទប្រកាន់ និងកាត់ទោសក្នុងករណីផ្សេងៗគ្នាជាច្រើន ពាក់ព័ន្ធនឹងបណ្តឹងព្រហ្មទណ្ឌនានា។

អង្គការលើកលែងទោសអន្តរជាតិ បានសរសេរក្នុងរបាយការណ៍ខ្លួនថា៖

«វន្នីគឺជាអ្នកទោសមនសិការមួយរូប អ្នកការពារសិទ្ធិមនុស្សមួយរូប ដែលត្រូវបានឃុំខ្លួន ដោយសារតែហេតុផលតែម្យ៉ាង គឺភាពសកម្មរបស់គាត់ ដែលជាអ្នកមិនបានប្រើអំពើហិង្សា ឬក៏គាំទ្រអំពើហិង្សា ឬសេចក្តីស្អប់ខ្ពើម។ ការកាត់គាត់ឲ្យជាប់ទោស គឺគ្មានមូលដ្ឋាននោះឡើយ»។

ការចាប់ឃុំអតីតមន្ត្រី និងមន្ត្រីសិទ្ធិមនុស្សប្រាំរូបរបស់សមាគមការពារសិទ្ធិមនុស្សអាដហុក បានស្ថិតក្នុងការអង្កេតរបស់អង្គការលើកលែងទោសអន្តរជាតិផងដែរ។ អ្នកទាំងប្រាំត្រូវបានជាប់ចោទពីបទសូកប៉ាន់សាក្សី ដែលផ្តើមពីរឿងអាស្រូវស្នេហាដ៏គួរឲ្យសង្ស័យរបស់អតីតអនុប្រធានបក្សប្រឆាំងលោក កឹម សុខា ដែលឥឡូវនេះ បានក្លាយជាប្រធានបក្ស។

របាយការណ៍បានសរសេរថា៖

«ពួកគេបានក្លាយជាជនរងគ្រោះនៃការរំលោភបំពានលើវិសាលភាពធំធេងនៃសិទិ្ធទទួលបានការកាត់ទោសត្រឹមត្រូវ ក្នុងនោះមានសិទ្ធិសន្មតជាមុនពីដំណើរគ្មានទោស ភាពស្មើគ្នាចំពោះមុខតុលាការ និងការប្រឹក្សាខាងច្បាប់»។

ចំពោះមន្ត្រី និងសកម្មជននយោបាយគណបក្សសង្គ្រោះជាតិ ១១រូប ដែលត្រូវបានកាត់ឲ្យជាប់ទោសពីប្រាំពីរ ទៅ២០ឆ្នាំ ក្នុងការដឹកនាំ និងចូលរួមកុបកម្មនៅទីលានប្រជាធិបតេយ្យធ្វើឡើងកាលពីថ្ងៃទី១៥ ខែកក្កដា ឆ្នាំ២០១៤ ត្រូវបានរបាយការណ៍របស់អង្គការលើកលែងទោសអន្តរជាតិពណ៌នាថា ជាកាត់ទោសដែលគ្មានភស្តុតាង។ របាយការណ៍បានឲ្យដឹងថា គ្មានភស្តុតាងដែលបញ្ជាក់ថា ក្រុមមន្ត្រី និងសកម្មជនគណបក្សសង្គ្រោះជាតិ មានផែនការធ្វើបាតុកម្មហិង្សា ហើយអំពើហិង្សានោះជាការពិតត្រូវបានផ្តើមឡើងដោយកងសន្តិសុខ។ របាយការណ៍បានលើកឡើងពីបណ្តឹងនានាដែលប្តឹងប្រឆាំងនឹងអ្នកតំណាងរាស្ត្រប្រាំពីរនាក់ផ្សេងទៀតផងដែរ។

របាយការណ៍ដដែលនោះ ក៏បានលើកឡើងការចោទប្រកាន់បទព្រហ្មទណ្ឌពាក់ព័ន្ធនឹងការបង្កអំពើហិង្សាដោយចេតនា និងបទល្មើសផ្សេងទៀត ប្រឆាំងមេដឹកនាំសហជីពប្រាំមួយនាក់ ក្នុងនោះមានលោក អាត់ ធន់ ប្រធានសហភាពការងារកម្ពុជា និងលោក ប៉ាវ ស៊ីណា ប្រធានសហជីពចលនាកម្មករកម្ពុជា។

ក្រុមមន្ត្រីជាន់ខ្ពស់រដ្ឋាភិបាល បានប្រកែក និងទាត់ចោលខ្លឹមសាររបស់របាយការណ៍នេះ ព្រោះរបាយការណ៍នេះ ត្រូវបានធ្វើឡើងដោយមានការគិតទុកជាមុនដើម្បីកេងចំណេញខាងនយោបាយដល់ក្រុមជំទាស់។

លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងប្រាប់ VOA នៅថ្ងៃពុធនេះថា តាមការសន្និដ្ឋានជាច្រើនទៅលើរបាយការណ៍នេះ បានឲ្យដឹងថា អង្គការលើកលែងទោសអន្តរជាតិ មាននិន្នាការនយោបាយគាំទ្រក្រុមជំទាស់ ព្រោះរបាយការណ៍នេះ ត្រូវបានចេញចំពេលដែលការឃោសនាបោះឆ្នោតឃុំ-សង្កាត់ កំពុងប្រព្រឹត្តទៅនៅកម្ពុជា។ លោកថា របាយការណ៍នេះ គ្មានឥទ្ធិពលណាមួយមកលើរដ្ឋាភិបាលនោះទេ។

«គាត់មិនមែនជាការចេញលើកទីមួយទេ គឺជាការចេញជាច្រើនដងមកហើយ ហើយមិនមែនលក្ខណៈខុសគ្នាពីរបាយការណ៍មួយទៅរបាយការណ៍មួយនោះទេ ហើយក៏មិនខុសគ្នាពីអ្វីដែលសង្គមស៊ីវិល និងបក្សប្រឆាំងលើកឡើងនោះទេ អញ្ចឹងរបាយការណ៍នេះ មិនមានឥទ្ធិពលអ្វីមកលើរដ្ឋាភិបាលក៏ដូចជា គណបក្សកាន់អំណាចនោះទេ ពីព្រោះគេយល់ពីចរឹតរបស់គាត់ និងពីនិន្នាការនៃការងាររបស់គាត់រួចទៅហើយបាទ»។

លោក សុខ ឥសាន អ្នកនាំពាក្យគណបកុ្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ថ្លែងថា របាយការណ៍នេះ មានគោលបំណងបម្រើដល់មហិច្ឆតាក្រុមជំទាស់មួយចំនួន ដែលនៅរកាំចិត្តនឹងរដ្ឋាភិបាលបច្ចុប្បន្ន។ លោកបានប្រដូចក្រុមជំទាស់ទាំងនោះថា មានទស្សនៈស្របទៅតាមប្រព័ន្ធនយោបាយនៅលោកសេរី ហើយថា ក្រុមទាំងនោះមិនទាន់បញ្ចប់សង្គ្រាមត្រជាក់ក្នុងអារម្មណ៍របស់ពួកគេ ដែលចង់ទម្លាក់បក្សប្រជាជនកម្ពុជាពីអំណាច។

លោក សុខ ឥសាន បញ្ជាក់ប្រាប់ VOA ថា៖

«ទោះបីថា សង្គ្រាមត្រជាក់វាបានរលត់មែនជាទ្រឹស្តី ក៏ប៉ុន្តែការជាក់ស្តែងនៅក្នុងអារម្មណ៍អ្នកធ្វើទាំងអស់ហ្នឹងមិនមែនបាត់អាហ្នឹងសង្គ្រាមត្រជាក់ហ្នឹងទេ វាតែមានចោទប្រកាន់ ឬលាបពណ៌ឲ្យគណបក្សប្រជាជន ថាជាបក្សកុម្មុយនិស្ត។ អញ្ចឹងៗ ទាំងអស់គ្នាហ្នឹងគេសុទ្ធតែលោកសេរី។ អញ្ចឹងគេប្រមូលផ្តុំកម្លាំងគ្នា ដើម្បីដៅមុខព្រួញ មកទម្លាក់គណបក្សប្រជាជនកម្ពុជា។ តែការធ្វើរបស់គេហ្នឹង វាមិនបានហុចលទ្ធផលជាវិជ្ជមានឲ្យពួកគេ តាមបំណងមហិច្ឆតារបស់ពួកគេទេ បាទ»។

ក្រុមអ្នកការពារសិទ្ធិមនុស្សនិយាយថា មិនមែនជារឿងចម្លែកនោះទេ ដែលរដ្ឋាភិបាលជារឿយៗ ច្រានចោល របាយការណ៍ស្តីពីស្ថានភាពសិទ្ធិមនុស្សធ្វើឡើងអង្គការការពារសិទ្ធិមនុស្សក្នុងនិងក្រៅប្រទេស។ ពួកគេថា តុលាការស្រុកខ្មែរអាចឯករាជ្យទៅបាន ប្រសិនបើអ្នកនយោបាយខ្មែរមានឆន្ទៈមិនលូកដៃចូលកិច្ចការនៃអំណាចតុលាការ។ យ៉ាងណាក៏ដោយ ពួកគេថា ស្ថាប័នតុលាការសព្វថ្ងៃនេះ គឺស្ថិតក្រោមគំនាបអំណាចនីតិប្រតិបត្តិ។

អនុសាសន៍មួយក្នុងចំណោម អនុសាសន៍ចំនួនប្រាំបួនរបស់អង្គការលើកលែងទោសអន្តរជាតិ បានស្នើឲ្យអាជ្ញាធរកម្ពុជាគោរពឯករាជ្យភាពរបស់តុលាការនិងស្ថាប័នពាក់ព័ន្ធផ្សេងទៀត៕ ប្រភព៖ VOA

↧

សមាជិកសភាអាមេរិកអំពាវនាវឲ្យការបោះឆ្នោតថ្នាក់ជាតិនៅកម្ពុជាមានលក្ខណៈ«សេរី និងយុត្តិធម៌‍»

May 31, 2017, 6:26 pm

≫ Next: សហជីពទទូចទៅរដ្ឋាភិបាលអន្តរាគមន៍ឲ្យកម្មករឈប់សម្រាក២ថ្ងៃបន្ថែមដើម្បីទៅបោះឆ្នោត!

≪ Previous: អង្គការលើកលែងទោសអន្តរជាតិរិះគន់ធ្ងន់ៗលើប្រព័ន្ធ«តុលាការអយុត្តិធម៌‍»របស់កម្ពុជា

លោក Ed Royce សមាជិកសភាម្នាក់ទៀត និងជាប្រធានម្នាក់នៃក្រុមសមាជិកសភាទទួលបន្ទុកកិច្ចការកម្ពុជា (Congressional Cambodia Caucus) ក៏បានលើកឡើងថា «ប្រជាពលរដ្ឋកម្ពុជាគ្រប់រូបត្រូវតែទទួលបានការចូលរួមបោះឆ្នោតដោយសេរី និងយុត្តិធម៌ ដោយគ្មានការធ្វើទុក្ខបុកម្នេញ ឬការបំភិតបំភ័យអ្វីឡើយ‍»។

វ៉ាស៊ីនតោន —សមាជិករដ្ឋសភាអាមេរិកចំនួនបីរូប បានអំពាវនាវដល់ក្រសួងការបរទេសអាមេរិក និងស្ថានទូតអាមេរិកប្រចាំនៅកម្ពុជា «សម្តែងការគាំទ្រជាសាធារណៈដល់នីតិរដ្ឋនៅកម្ពុជា‍» ហើយនិងអំពាវនាវឲ្យរាជរដ្ឋាភិបាលកម្ពុជា «គោរពសិទ្ធិបោះឆ្នោត‍»របស់ប្រជាពលរដ្ឋ‍កម្ពុជានៅមុនការបោះឆ្នោតថ្នាក់ជាតិឆ្នាំ២០១៨ «ដោយគ្មានការធ្វើទុក្ខបុកម្នេញ និងគំរាមកំហែង‍»។ នេះបើយោងតាមសេចក្តីប្រកាសមួយចុះថ្ងៃទី៣១ ខែឧសភានេះ ដែលវីអូអេទទួលបាន។

សេចក្តីប្រកាសនេះបានធ្វើឡើង ក្រោយពេលដែលលោកនាយករដ្ឋមន្ត្រី ហ៊ុន សែន បន្តព្រមានជាបន្តបន្ទាប់អំពីការផ្ទុះឡើងនៃសង្គ្រាម បើសិនជាគណបក្សប្រជាជនកម្ពុជារបស់លោកចាញ់ការបោះឆ្នោត។ ប្រទេសកម្ពុជានឹងរៀបចំការបោះឆ្នោតឃុំសង្កាត់ ដែលនឹងប្រព្រឹត្តឡើងនៅថ្ងៃអាទិត្យ ទី៤ ខែមិថុនាខាងមុននេះ។

លោក Alan Lowenthal សមាជិកសភាប្រចាំទីក្រុងឡុងប៊ិច រដ្ឋកាលីហ្វញ៉ា ដែលមានប្រជាពលរដ្ឋខ្មែរអាមេរិកាំងរស់នៅច្រើនបង្អស់ បានសរសេរនៅក្នុងសេចក្តីប្រកាសនោះថា៖

«‍ដើម្បីធានាឲ្យមានបរិយាកាសនយោបាយមួយដែលជំរុញឲ្យមានការបោះឆ្នោតដោយសេរី និងយុត្តិធម៌ដែលសហគមន៍អន្តរជាតិអាចទទួលស្គាល់បាន រាជរដ្ឋាភិបាលកម្ពុជាចាំបាច់ដាច់ខាតត្រូវតែបោះបង់ចោលបទចោទប្រកាន់បែបលក្ខណៈនយោបាយទៅកាន់មេដឹកនាំគណបក្សប្រឆាំង បញ្ឈប់ការគំរាមកំហែងលើគណបក្សសង្គ្រោះជាតិ និងអនុញ្ញាតឲ្យអ្នកតាមដានការបោះឆ្នោតដោយឯករាជ្យមានវត្តមាននៅគ្រប់មណ្ឌលបោះឆ្នោតទាំងអស់»។

ចាប់តាំងពីដំណើរការឃោសនាបោះឆ្នោតបានចាប់ផ្តើមឡើងកាលពីថ្ងៃសៅរ៍ ទី២០ ខែឧសភាកន្លងមកនេះ លោកនាយករដ្ឋមន្ត្រី ហ៊ុន សែន ដែលជាប្រធាននៃគណបក្សប្រជាជនកម្ពុជាដែលដឹកនាំប្រទេសជាង៣០ឆ្នាំរូបនេះ បានព្រមានផ្ទួនគ្នាៗថា ប្រសិនបើគណបក្សរបស់លោកមិនអាចបន្តអំណាចទៀត នោះសង្គ្រាមនឹងផ្ទុះឡើង។ ក៏ប៉ុន្តែ អ្នកវិភាគខាងសង្គម និងនយោបាយនៅកម្ពុជា យល់ថា ការព្រមាននេះគ្រាន់តែជាការបំភិតបំភ័យស្មារតីអ្នកបោះឆ្នោតតែប៉ុណ្ណោះ។

សមាជិកសភាម្នាក់ទៀតលោក Steve Chabot ប្រចាំរដ្ឋ Ohio បានស្នើឲ្យលោកនាយករដ្ឋមន្ត្រី ហ៊ុន សែន «ត្រូវតែបញ្ឈប់ការធ្វើទុក្ខបុកម្នេញមកលើមេដឹកនាំគណបក្សប្រឆាំង»។ លោក Chabot បានលើកឡើងបន្តទៀតនៅក្នុងសេចក្តីប្រកាសនោះថា៖

«‍ការបោះឆ្នោតដោយសេរី និងយុត្តិធម៌គឺមានសារៈសំខាន់ណាស់ដល់ប្រព័ន្ធលទ្ធិប្រជាធិបតេយ្យ ហើយវាចាំបាច់ណាស់ ដែលរដ្ឋាភិបាលកម្ពុជាត្រូវតែទទួលស្គាល់សារៈសំខាន់នេះ។ ការធ្វើទុក្ខបុកម្នេញជាប្រព័ន្ធមកលើគណបក្សសង្គ្រោះជាតិ បានធ្វើឲ្យសហគមន៍អន្តរជាតិមានមូលដ្ឋានច្បាស់លាស់ក្នុងការព្រួយបារម្ភនេះ»។

រីឯលោក Ed Royce សមាជិកសភាម្នាក់ទៀត និងជាប្រធានម្នាក់នៃក្រុមសមាជិកសភាទទួលបន្ទុកកិច្ចការកម្ពុជា (Congressional Cambodia Caucus) ក៏បានលើកឡើងថា «ប្រជាពលរដ្ឋកម្ពុជាគ្រប់រូបត្រូវតែទទួលបានការចូលរួមបោះឆ្នោតដោយសេរី និងយុត្តិធម៌ ដោយគ្មានការធ្វើទុក្ខបុកម្នេញ ឬការបំភិតបំភ័យអ្វីឡើយ‍»។

មុននឹងការបោះឆ្នោតថ្នាក់ជាតិជ្រើសរើសតំណាងរាស្ត្រឈានមកដល់នៅឆ្នាំ២០១៨ប្រជាពលរដ្ឋកម្ពុជាដែលបានចុះឈ្មោះបោះឆ្នោត នឹងបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧ នៅថ្ងៃអាទិត្យនេះ។

សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់នេះ មានគណបក្សនយោបាយចំនួន១២ បានចូលរួមប្រកួតប្រជែងដើម្បីគ្រប់គ្រងឃុំ សង្កាត់ចំនួន១៦៤៦ នៅទូទាំងប្រទេសកម្ពុជា។ ក្នុងចំណោមគណបក្សទាំង១២នេះ អ្នកវិភាគជាច្រើនយល់ថា គណបក្សប្រជាជនកម្ពុជា និងគណបក្សសង្គ្រោះជាតិមានកម្លាំងប្រហាក់ប្រហែលគ្នា៕ ប្រភព៖ VOA

↧

សហជីពទទូចទៅរដ្ឋាភិបាលអន្តរាគមន៍ឲ្យកម្មករឈប់សម្រាក២ថ្ងៃបន្ថែមដើម្បីទៅបោះឆ្នោត!

May 31, 2017, 6:34 pm

≫ Next: ផ្កាយ៣ទាហានខ្មែរខ្លាំងជាងចិន ! ចិនសាងសង់ខុសបច្ចេកទេស ទើបបណ្ឌិត លឹម ស៊ីដេនីន ព្រមឲ្យផ្កាយ៣ទាហានម្នាក់វាយកម្ទេចរបាំងថ្មការពារផ្លូវ និងស្ពានអំណោយចិនចោល ?

≪ Previous: សមាជិកសភាអាមេរិកអំពាវនាវឲ្យការបោះឆ្នោតថ្នាក់ជាតិនៅកម្ពុជាមានលក្ខណៈ«សេរី និងយុត្តិធម៌‍»

ក្រុមសហជីព បានមូរមាត់គ្នាសរសេរលិខិត ទទូចស្នើសុំទៅរដ្ឋាភិបាល ឲ្យអន្តរាគមន៍ដើម្បី ឲ្យកម្មករ បានឈប់សម្រាកចំនួន២ថ្ងៃបន្ថែមទៀត។ ការសុំបន្ថែមថ្ងៃឈប់នេះ គឺដើម្បីឲ្យកម្មកររោងចក្រ មានពេលគ្រប់គ្រាន់ សម្រាប់ធ្វើដំណើរទៅបោះឆ្នោត។ ការទទូចស្នើសុំយ៉ាងដូច្នេះ គឺបន្ទាប់ពីពេលដែលក្រសួងការងារចេញលិខិតជូនដំណឹងមួយ ដែលមិនសូវជាមានឥទ្ធិពល។

ក្រុមសហជីពកម្មកររោងចក្រកាត់ ជាច្រើន ដែលមានជាអាទិ៍ សហភាពការងារកម្ពុជា របស់លោក អាត់ ធន់ ជាដើម បានស្នើឲ្យក្រសួងការងារ និងរដ្ឋាភិបាល ចេញសេចក្តីណែនាំដល់គ្រប់រោងចក្រសហគ្រាសឯកជន ឲ្យអនុញ្ញាតដល់កម្មករ បានឈប់សម្រាកចាប់ពីថ្ងៃទី ៣ ដលទី៥ មិថុនា ខាងមុខនេះ ដើម្បីឲ្យក្រុមកម្មករមានពេលវេលាសមរម្យ ក្នុងការធ្វើដំណើរទៅបោះឆ្នោត នៅស្រុកកំណើត។

ក្រុមសហជីពយល់ឃើញថា ការដែលអនុញ្ញាតឲ្យកម្មករបានឈប់សម្រាក ត្រឹមតែ១ថ្ងៃ នៅថ្ងៃទី៤មិថុនា ចំថ្ងៃបោះឆ្នោតតែម្តងនោះ គឺពេលខ្លីពេក ហើយច្បាស់ជាធ្វើដំណើរទៅ-មក មិនបានឡើយ សម្រាប់កម្មករនិយោជិតដែលមានភូមិឃុំនៅឆ្ងាយៗ។ ដូច្នេះ ហើយទើប ក្រុមសហជីពទាំងអស់នោះ ទទូចឲ្យរដ្ឋាភិបាលចេញមុខជួយណែនាំ ដល់បណ្តារោងចក្រ និងក្រុមហ៊ុននានា ដើម្បីផ្តល់ពេលវេលាឲ្យនិយោជិត ឈប់សម្រាកដោយមានប្រាក់ឈ្នួល២ថ្ងៃបន្ថែម។ លើសពីនេះ ក្រុមសហជីព ក៏ចង់សុំឲ្យនិយោជកបើកប្រាក់ឈ្នួលមួយចំណែកដល់កម្មករ ជាសោហ៊ុយសម្រាប់ធ្វើដំណើរផង។

សូមបញ្ជាក់ថា ការទទូចបែបនេះ គឺចំពេលដែលក្រសួងការងារចេញលិខិតណែនាំរបស់ ម្ចាស់រោងចក្រ បង្កលក្ខណៈងាយស្រួលដល់កម្មករ ឈប់សម្រាកនៅថ្ងៃបោះឆ្នោតឃុំសង្កាត់។ ក៏ប៉ុន្តែ សេចក្តីណែនាំរបស់ក្រសួង ពុំបានបញ្ជាក់ច្បាស់ថា ត្រូវឲ្យកម្មករឈប់បានច្រើនថ្ងៃ ឬបានដល់៣ថ្ងៃដូចទម្លាប់មុនៗនោះទេ។

ចំពោះភាគីសហជីព, ការយល់ព្រមផ្តល់លទ្ធភាពនិងផ្តល់ឱកាសឲ្យនិយោជិតឈប់៣ថ្ងៃតាមការស្នើសុំយ៉ាងដូច្នេះ គឺជាការចូលរួមចំណែកឲ្យកម្មករនិយោជិតបំពេញសិទ្ធិជាពលរដ្ឋរបស់ខ្លួន ដែលមានចែងក្នុងរដ្ឋធម្មនុញ្ញ។

ចំណែកក្រុមអ្នកតាមដានការអភិវឌ្ឍសង្គម រួមមានលោក សន ជ័យ គិតថា ការដែលមិនចង់ឲ្យកម្មករមានពេលច្រើនគ្រប់គ្រាន់ដើម្បីទៅបោះឆ្នោត គឺអាចនឹងមានហេតុផលនយោបាយនៅក្រោយខ្នង។ ដ្បិតថា ក្រុមកម្មកររោងចក្រកាត់ដេរ ជាច្រើន ធ្លាប់បានចុះផ្លូវ ធ្វើបាតុកម្មប្រឆាំងរដ្ឋាភិបាល ហើយបង្ហាញជំហរគាំទ្របក្សប្រឆាំង ហើយបើបណ្តោយឲ្យពួកគេទៅបោះឆ្នោតបានច្រើននោះ គឺច្បាស់ជាបោះគាំទ្របក្សប្រឆាំងច្រើនតទៅទៀត។

នេះបើតាមការយល់ឃើញរបស់ក្រុមអ្នកវិភាគមួយចំនួន និងតាមការគិតរបស់លោក សន ជ័យ ដែលជាប្រធានអង្គការសម្ព័ន្ធគណនេយ្យភាពសង្គមកម្ពុជា៕ ប្រភព៖ RFI

↧

ផ្កាយ៣ទាហានខ្មែរខ្លាំងជាងចិន ! ចិនសាងសង់ខុសបច្ចេកទេស ទើបបណ្ឌិត លឹម ស៊ីដេនីន ព្រមឲ្យផ្កាយ៣ទាហានម្នាក់វាយកម្ទេចរបាំងថ្មការពារផ្លូវ និងស្ពានអំណោយចិនចោល ?

May 31, 2017, 6:41 pm

≫ Next: សង្ស័យយូរហើយ អត់មាត់ទេ ថ្ងៃមួយចាប់ឆែក Chat ឃើញហើយហួសថ្លែង…! តែក៏មិនទុកមុខឲ្យដែរ ដាក់ឲ្យផ្អើលហ្វេសប៊ុកសិន ចាំគិតក្រោយ…!!

≪ Previous: សហជីពទទូចទៅរដ្ឋាភិបាលអន្តរាគមន៍ឲ្យកម្មករឈប់សម្រាក២ថ្ងៃបន្ថែមដើម្បីទៅបោះឆ្នោត!

មន្ត្រីមូលដ្ឋានថ្នាក់ក្រោម ដូចជាចៅសង្កាត់ព្រែកថ្មី និងអភិបាលរងនៃគណៈអភិបាលខណ្ឌច្បារអំពៅបាននាំគ្នាសម្តែងនូវការភ្ញាក់ផ្អើលពេលឃើញសកម្មភាពរបស់លោកឧត្តមសេនីយ៍ឯក អោក សៀង ប្រើប្រាស់គ្រឿងចក្រវាយបំផ្លាញរបាំងថ្មការពារផ្លូវ និងស្ពានព្រែកសំរោងជាអំណោយរបស់ប្រទេសចិនឋិតនៅសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញតាមការអនុញ្ញាតពីឯកឧត្តមបណ្ឌិត លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ។

យោងតាមសំណើរបស់លោកឧត្តមសេនីយ៍ឯក អោក សៀង ចុះថ្ងៃទី០៩ ខែកញ្ញា ឆ្នាំ២០១៦ ឯកឧត្តមបណ្ឌិត លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបានឯកភាពយល់ព្រមឲ្យលោកឧត្តមសេនីយ៍រូបនេះវាយខឿនបេតុង ចាក់បំពេញដី និងក្រាលការ៉ូឡាតាមបណ្តោយផ្លូវសងខាងក្បាលស្ពានមិត្តភាពកម្ពុជា-ចិនតាខ្មៅត្រើយខាងកើត តាមស្មារតីលិខិតលេខ១២០៩សក ចុះថ្ងៃទី០៤ ខែមេសា ឆ្នាំ២០១៧ ។

មន្ត្រីជំនាញខាងផ្លូវស្ពានថ្នល់មួយរូបសុំមិនបញ្ចេញឈ្មោះបាននិយាយរបៀបចំអកថា ទំនងជាវិស្វករផ្លូវថ្នល់ចិនសាងសង់របងថ្មការពារផ្លូវ និងស្ពានព្រែកសំរោងមានការខុសឆ្គងបច្ចេកទេស ទើបឯកឧត្តមបណ្ឌិត លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនព្រមព្រៀងឲ្យលោកឧត្តមសេនីយ៍ឯក អោក សៀង វាយកម្ទេចរបាំងថ្មការពារផ្លូវ និងស្ពានមិត្តភាពកម្ពុជា-ចិន នោះចោលវិញតែម្តងទៅ តាមសណើរបស់លោកផ្កាយ៣ទាហាន អោក សៀង ។

លោក អោក សៀង នាយទាហានជាន់ខ្ពស់នៃកងយោធពលខេមរភូមិន្ទ អត្តលេខ០០៩៥២០ ជាអគ្គនាយករងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ទទួលបានការដំឡើងឋានន្តរស័ក្តិថ្នាក់ឧត្តមសេនីយ៍ឯក (ផ្កាយ៣) ដោយព្រះរាជក្រឹត្យលេខនស/រកត/០៤១៣/៤០២ ចុះថ្ងៃទី២២ ខែមេសា ឆ្នាំ២០១៣ ៕ ប្រភព៖ dtn7

↧

សង្ស័យយូរហើយ អត់មាត់ទេ ថ្ងៃមួយចាប់ឆែក Chat ឃើញហើយហួសថ្លែង…! តែក៏មិនទុកមុខឲ្យដែរ ដាក់ឲ្យផ្អើលហ្វេសប៊ុកសិន ចាំគិតក្រោយ…!!

May 31, 2017, 7:15 pm

≫ Next: តើលោកដូណាល់ត្រាំនឹងធ្វើឲ្យអាមេរិកឯកោក្នុងរឿងអាកាសធាតុ?

≪ Previous: ផ្កាយ៣ទាហានខ្មែរខ្លាំងជាងចិន ! ចិនសាងសង់ខុសបច្ចេកទេស ទើបបណ្ឌិត លឹម ស៊ីដេនីន ព្រមឲ្យផ្កាយ៣ទាហានម្នាក់វាយកម្ទេចរបាំងថ្មការពារផ្លូវ និងស្ពានអំណោយចិនចោល ?

យោងតាមគណនី Facebook របស់លោក « លន់ ឡែន » បានសរសេរបង្ហោះយ៉ាងខ្លីថា «ចោរមិនឆ្លើយថាចោរទេ ទាល់តែមានភស្តុតាងចឹង ទើបឆ្លើយថា «អូនខ្លាចហើយបង!!»។

តែរឿងពិតយើងមិនដឹងយ៉ាងណាទេ ទុកឲ្យក្រុមគ្រួសាររបស់គាត់ជជែកវែកញែកគ្នាចុះ សូមមិត្តជួយពិចារណា វាយតម្លៃផង។

ប្រភព៖ voynews

↧

តើលោកដូណាល់ត្រាំនឹងធ្វើឲ្យអាមេរិកឯកោក្នុងរឿងអាកាសធាតុ?

June 1, 2017, 6:04 pm

≫ Next: របាយការណ៍៖ ពិភពលោក មានសន្តិភាពល្អប្រសើរជាងឆ្នាំ ២០១៥

≪ Previous: សង្ស័យយូរហើយ អត់មាត់ទេ ថ្ងៃមួយចាប់ឆែក Chat ឃើញហើយហួសថ្លែង…! តែក៏មិនទុកមុខឲ្យដែរ ដាក់ឲ្យផ្អើលហ្វេសប៊ុកសិន ចាំគិតក្រោយ…!!

ប្រធានាធិបតីអាមេរិក លោកដូណាល់ ត្រាំ នឹងបិទបញ្ចប់ការមន្ទិលសង្ស័យ របស់គ្រប់គ្នា ដែលទន្ទឹងរង់ចាំមើលជំហររបស់លោក ស្តីពីកិច្ចព្រមព្រៀងក្រុងប៉ារីស ស្តីពីអាកាសធាតុ។ នៅព្រឹកព្រលឹមថ្ងៃព្រហស្បតិ៍ ទី ១មិថុនា លោកបានសរសេរសារ ក្នុងបណ្តាញសង្គម Twitterថា លោកនឹងសម្រេចចិត្ត នៅថ្ងៃព្រហស្បតិ៍នេះ នៅម៉ោង ៣រសៀល (ម៉ោងនៅអាមេរិក)។

នៅក្នុងសារTwitter សរសេរនៅព្រឹកព្រលឹមថ្ងៃព្រហស្បតិ៍ ទី ១មិថុនា លោកដូណាល់ ត្រាំ បានសរសេរថា លោកនឹងធ្វើឲ្យសហរដ្ឋអាមេរិក អស្ចារ្យម្តងទៀត។ គេអាចកាត់យល់បានថា លោកដូណាល់ ត្រាំនឹងអាមេរិកចេញពីកិច្ចព្រមព្រៀងស្តីពីអាកាសធាតុ ច្រើនជាងទុកអាមេរិកឲ្យគោរពកិច្ចព្រមព្រៀងស្តីពីអាកាសធាតុ។

នៅថ្ងៃពុធ កាសែតអាមេរិកជាច្រើន ដែលបានដកស្រង់សំដីរបស់មន្រ្តីផ្ទៃក្នុងរបស់សេតវិមាន បានសរសេរថា លោកដូណាល់ត្រាំ បានសម្រេចចិត្តរួចហើយ ថា នឹងដកអាមេរិកចេញកិច្ចព្រមព្រៀងស្តីពីអាកាសធាតុនេះ។

មានចរន្តពីរនៅក្នុងរដ្ឋបាលលោកដូណាល់ ត្រាំ
លោកដូណាល់ ត្រាំ ដែលបានពន្យារពេល ធ្វើឲ្យគ្រប់គ្នាទន្ទឹង រង់ចាំដោយអន្ទះសារ ក៏ដោយសារតែ លោកកំពុងត្រូវប្រទាញប្រទង់ដោយរវាងក្រុមពីរ នៅក្នុងរដ្ឋបាលរបស់លោក។ ក្នុងក្រុមទី១ មានកូនស្រីរបស់លោកផ្ទាល់ គឺ Ivanka trump រដ្ឋមន្រ្តីការបរទេស លោករេច ធីល័រសុន រដ្ឋមន្រ្តីការពារជាតិអាមេរិក រដ្ឋមន្រ្តីបរិស្ថាន គាំទ្រដោយក្រុមហ៊ុនធំៗរបស់អាមេរិក ដែលបានទាមទារឲ្យលោកដូណាល់ ត្រាំ នៅរក្សាអាមេរិក ក្នុងកិច្ចព្រមព្រៀងស្តី ពីអាកាសធាតុ ដើម្បីហេតុផល ប្រយោជន៍ ការបរទេស សន្តិសុខជាតិ និងបរិស្ថាន។

ប៉ុន្តែ លោកដូណាល់ ត្រាំ ហាក់ងាករេទៅរកក្រុមទី២ ដែលនាំមុខដោយប្រធានទីភ្នាក់ងារដើម្បី ការពារបរិស្ថាន គឺលោកScott Pruitt។ លោកScott Pruitt ថ្វីត្បិតតែមានឈ្មោះជាប្រធានទីភ្នាក់ងារការពារបរិស្ថានមែនប៉ុន្តែ គឺជាអ្នកដែលរិះគន់ប្រឆាំងកិច្ចព្រមព្រៀងស្តីពីអាធាសធាតុខ្លាំងជាងគេបំផុត។ លោកScott Pruittហ៊ានដល់ទៅនិយាយថា មនុស្សមិនមែនជាអ្នកទទួលខុសត្រូវ ធ្វើឲ្យមានការឡើងកំដៅផែនដីនោះទេ។ មួយវិញទៀត ក្នុងនាមជាប្រធានទីភ្នាក់ងារការពារបរិស្ថាន លោកលោកScott Pruitt បានទទួលបេសកកម្មមួយ ពីប្រធានាធិបតីដូណាល់ ត្រាំ នោះគឺសិក្សាពីនិតីវិធីដើម្បីដកអាមេរិកចេញពីកិច្ចព្រមព្រៀង ស្តីពីអាកាសធាតុ ដែលលោកដូណាល់ ត្រាំ ចាត់ទុកថា កិច្ចព្រមព្រៀងអាក្រក់សម្រាប់សេដ្ឋកិច្ចអាមេរិក។

សូមអាន៖ ផែនដីឡើងកម្តៅបណ្តាលមកពីទង្វើរបស់មនុស្ស

តើលោកដូណាល់ ត្រាំនឹងធ្វើឲ្យអាមេរិកឯកោ នៅក្នុងសំណុំរឿងអាកាសធាតុ?
លោកដូណាល់ ត្រាំបានគំរាមដកអាមេរិកចេញពីកិច្ចព្រមព្រៀង ស្តីពីអាកាសធាតុ ដែលលោកចាត់ទុកថា ជាល្បិចកល បោកបញ្ឆោត រៀបចំឡើងដោយទីក្រុងប៉េកាំង។ សម្រាប់លោកដូណាល់ ត្រាំ កិច្ចព្រមព្រៀងស្តីពី អាកាសធាតុ នឹងទៅបន្ទុចបង្អាក់កំណើនសេដ្ឋកិច្ចរបស់អាមេរិក និងទុកឲ្យអាមេរិករស់ពឹងអាស្រ័យលើថាមពលបរទេស។ គេវាយតម្លៃ លោកដូណាល់ ត្រាំ ឈ្នះឆ្នោតប្រធានាធិបតី ក៏ដោយសារតែលោកប្រឆាំងនឹងកិច្ចព្រមព្រៀងក្រុងប៉ារីស។ នយោបាយនេះបានទាក់ទាញក្រុមហ៊ុន និងប្រជាជនអាមេរិកាំងដែលធ្វើការ រស់អាស្រ័យនឹងអាជីវកម្មធ្យូងថ្ម ប្រេង ឬឧស្ម័ន។ សម្រាប់ប្រជាជនអាមេរិកាំង ទាំងនេះ គឺការងារ និងចំណូលបានមកពីអាជីវកម្មរ៉ែធ្យូងថ្ម ដែលសំខាន់ សម្រាប់អាយុជីវិតរបស់ពួកគេ ប៉ុន្តែ មិនមែនការឡើងកំដៅផែនដី នោះទេ។

លោកដូណាល់ ត្រាំ ដែលនឹងអាចសម្រេចចិត្តដកអាមេរិកចេញពីកិច្ចព្រមព្រៀង ស្តីពីអាកាសធាតុ ទំនងចង់បង្ហាញថា លោកជាប្រធានាធិបតីដែលបានគិតគូរ ដល់ប្រយោជន៍ដំបូងរបស់ប្រជាជនអាមេរិកាំង ដូចដែលលោកធ្លាប់ស្រែកសន្យា រហូតមក។ ការបំពេញចិត្តម្ចាស់ឆ្នោត គឺជាហេតុផលសំខាន់ដែលធ្វើឲ្យលោកដូណាល់ ត្រាំ អាចសម្រេចចិត្តដើរ ចេញពីកិច្ចព្រមព្រៀង គឺក្រៅពីនេះ គេមិនឃើញមានហេតុផលអ្វីផ្សេង ដែលធ្វើឲ្យលោកដូណាល់ ត្រាំត្រូវដកអាមេរិកចេញពីកិច្ចព្រមព្រៀងនោះទេ។

កិច្ចព្រមព្រៀង ស្តីពីអាកាសធាតុ មិនមែនជាកិច្ចព្រមព្រៀងដែលចាប់ចងដៃប្រទេសហត្ថលេខីនោះទេ។ ប្រទេសនីមួយៗ មានសិទ្ធិ សម្រេចលើការចូលរួមរបស់ខ្លួន នៅក្នុងការកាត់បន្ថយឧស្ម័នពុល។ លោកអូបាម៉ាផ្ទាល់ បានសន្យាកាត់បន្ថយការបញ្ចេញផ្សែងពុល ពី ២៦ ទៅ ២៨ភាគរយ ពីពេលនេះ ដល់ឆ្នាំ ២០៥០។ បើសិនលោកដូណាល់ ត្រាំ មិនពេញចិត្តនឹងកូតានេះ លោកអាចបន្ថយការចូលរួមរបស់អាមេរិក ដោយមិនចាំបាច់ត្រូវដកអាមេរិកចេញពីកិច្ចព្រមព្រៀងនោះទេ។

ចិន និងសហភាពអឺរ៉ុបនឹងរួមគ្នាបន្តពង្រឹងការអនុវត្តកិច្ចព្រមព្រៀងស្តីពីអាកាសធាតុ
កិច្ចព្រមព្រៀងស្តីពីអាកាសធាតុធ្វើឡើងនៅក្រុងប៉ារីសនៅឆ្នាំ២០១៥ ត្រូវបានចុះហត្ថលេខាផ្តល់សច្ចាប័នដោយប្រទេសចំនួន ១៤៧ ដែលនៅក្នុងនោះមានទាំងអាមេរិកផង។ ប្រទេសចំនួន ១៧៥ ក្នុងពិភពលោកបានចុះហត្ថលេខាលើកិច្ចព្រមព្រៀងស្តីពីអាកាសធាតុនៅទីក្រុងញូវយ៉ក នៅថ្ងៃសុក្រទី ២២ ខែមេសា ២០១៦។

បើសិនអាមេរិកដកខ្លួនចេញពីកិច្ចព្រមព្រៀង នោះអាមេរិកក្នុងនាមជាប្រទេសមហាអំណាចលើលោកនឹង គ្មានទឹកមាត់ប្រៃ ទៅនិយាយជាមួយគេ ក្នុងរឿងអាកាសធាតុ។

អាមេរិកជាប្រទេសឧស្សាហកម្ម ដែលបញ្ចេញផ្សែងពុល ឧស្ម័នផ្ទះកញ្ចក់ច្រើនជាងគេក្នុងលោក បន្ទាប់ពីចិន។ បើសិនអាមេរិកដកខ្លួន ចេញពីកិច្ចព្រមព្រៀង នោះគេបារមភថា ប្រទេសដទៃទៀត នឹងអាចយកលេស មិនគោរពតាមកិច្ចព្រមព្រៀងដូចអាមេរិក។ បើមានប្រទេសបញ្ចេញផ្សែងពុលច្រើននាំគ្នាតាមអាមេរិក នោះ ក្តីអន្តរាយនឹងកើតមានជាមិនខាន ព្រោះ ថា ផ្សែងពុល ឧស្ម័នផ្ទះកញ្ចក់ ជាដើមហេតុធ្វើឲ្យផែនដីឡើងកំដៅ និងធ្វើឲ្យអាកាសធាតុប្រែប្រួលលែងទៀងទាត់ដូចមុន។

ចិន និងសហភាពអឺរ៉ុបចាប់ដៃគ្នាដើម្បីគោរពកិច្ចព្រមព្រៀងស្តីពីអាកាសធាតុ
គេនៅមានសុទិដ្ឋិនិយមច្រើន ថា ស្ថានការណ៍នឹងមិនវិវឌ្ឍអាក្រក់ខ្លាំងណាស់ណាទេ បើសិនលោកដូណាល់ ត្រាំ ប្រកាសថា ដក អាមេរិកចេញពីកិច្ចព្រមព្រៀងមែននោះ។ ប្រទេសចិន ដែលជាប្រទេសបញ្ចេញផ្សែងពុល ធំទី ២បន្ទាប់ពីអាមេរិក បានប្រកាសរួមគ្នាជាមួយ សហភាពអឺរ៉ុប ដើម្បីបន្តពង្រឹងការអនុវត្តកិច្ចព្រមព្រៀងស្តីពីអាកាសធាតុ។ នៅក្នុងសន្និសីទកាសែតជាមួយនាយករដ្ឋមន្រ្តីអាល្លឺម៉ង់ នៅទីក្រុងប៊ែរឡាំង នៅថ្ងៃព្រហស្បតិ៍ នាយករដ្ឋមន្រ្តីចិន លោកលី ខឺឆាំង បាននិយាយថា ចិននៅតែបន្តចូលរួមក្នុងកិច្ចព្រមព្រៀងស្តី ពីអាកាសធាតុ។ កាណាដា ឯណោះវិញ ដែលជាប្រទេសឧស្សាហ៍កម្មបញ្ចេញឧស្ម័នផ្ទះកញ្ចក់សំខាន់ដែរ ក៏បានប្រកាសថា ខ្លួននៅតែគោរពតាមកិច្ចព្រមព្រៀង និងបានអំពាវនាវឲ្យអាមេរិកនៅបន្តស្ថិតក្នុងកិច្ចព្រមព្រៀងដូចមុន។

បើទោះជាលោកដូណាល់ ត្រាំចង់ដកអាមេរិកចេញពីកិច្ចព្រមព្រៀង ក៏លោកត្រាំ មិនអាចធ្វើបានភ្លាមៗដែរ។ ដោយសារតែមាននិតិវីធីច្រើន គេរំពឹងថា អាមេរិកនឹងអាចដកខ្លួនផុតស្រឡះពីកិច្ចព្រមព្រៀងស្តីពីអាកាសធាតុ នៅទីក្រុងប៉ារីស នៅអំឡុងឆ្នាំ ២០២០ ពោលគឺនៅឆ្នាំដែលអាមេរិកត្រូវបោះឆ្នោតប្រធានាធិបតីសាជាថ្មីម្តងទៀត៕ ប្រភព៖ RFI

↧

របាយការណ៍៖ ពិភពលោក មានសន្តិភាពល្អប្រសើរជាងឆ្នាំ ២០១៥

June 1, 2017, 6:07 pm

≫ Next: សង្គ្រោះជាតិជ្រើសយកជម្រើសទី២របស់សាលាក្រុង តែសុំដូរការជួបជុំមកវត្តចាស់

≪ Previous: តើលោកដូណាល់ត្រាំនឹងធ្វើឲ្យអាមេរិកឯកោក្នុងរឿងអាកាសធាតុ?

សន្តិភាពនៅក្នុងពិភពលោកបានល្អប្រសើរ គ្រាន់បើ ជាងឆ្នាំ២០១៥។ នេះបើតាមរបាយការណ៍មួយឈ្មោះថា សន្ទស្សន៍សន្តិភាពសកល ដែលចេញផ្សាយ នៅថ្ងៃព្រហស្បតិ៍ ដោយវិទ្យាស្ថាន ដើម្បីសេដ្ឋកិច្ច និងសន្តិភាព។ យោងតាមវិទ្យាស្ថានដើម្បីសេដ្ឋកិច្ច និងសន្តិភាព ដែលសិក្សាទៅលើសន្តិភាព នៅពេញមួយឆ្នាំ ២០១៦ សន្តិភាពបានកើន ល្អប្រសើរមួយកម្រិតតូច ប្រមាណ ០,២៨ភាគរយ។

យោងតាមរបាយការណ៍របស់វិទ្យាស្ថានដើម្បីសេដ្ឋកិច្ច និងសន្តិភាព ពិភពលោកនៅឆ្នាំ ២០១៦ បានជួបសន្តិភាពច្រើនជាងឆ្នាំ២០១៥ ដោយសារចំនួននៃអំពើហិង្សាបង្កឡើងដោយរដ្ឋអំណាច ឧក្រិដ្ឋកម្មសម្លាប់មនុស្ស ហើយនិងការធ្វើទារុណកម្មនៅក្នុងពិភពលោក បានថយចុះបន្តិច បើប្រៀបធៀបនឹងឆ្នាំមុន។ ឆ្នាំនេះជាឆ្នាំលើកដំបូង ចាប់តាំងពីមានផ្ទុះសង្រ្គាមនៅស៊ីរី ដែលសន្តិភាពក្នុងពិភពលោកបានចាប់ល្អប្រសើរឡើងវិញ។

អ៊ីស្លង់ ជាប់ចំណាត់ថ្នាក់ជាប្រទេសដែលមានសន្តិភាពល្អបំផុតលើលោក នាំមុខប្រទេសនូវែលហ្សេឡង់ ព័រទុយហ្កាល អូទ្រីស ហើយនិងដាណាម៉ាក។ ចំណែក ស៊ីរី ត្រូវបានចាត់ចូលក្នុងក្រុមប្រទេសដែលមានសន្តិភាពអាក្រក់បំផុត ក្នុងលោក ដូចជាប្រទេសអ៊ីរ៉ាក់ អាហ្វហ្កានីស្ថាន យេម៉ែន និងស៊ូដង់ខាងត្បូង។ តំបន់ដើមបូព៌ា និងអាហ្វ្រិកខាងជើង ជាប់ចំណាត់ថ្នាក់ជាតំបន់ដែលមានសន្តិភាពតិចបំផុតក្នុងលោក។ អឺរ៉ុបវិញ បើទោះបីជាមានប្រទេសមួយចំនួន ដូចជាបារាំង អាល្លឺម៉ង់ និងបែលហ្ស៊ិកបានរងការវាយប្រហារដោយក្រុមភេរវនិយម នៅតែស្ថិតក្នុងចំណាត់ថ្នាក់ ល្អ ក្នុងនាមជាតំបន់ដែលមានសុខសន្តិភាពល្អដាច់គេ។

អ្វីដែលគួរឲ្យកត់សំគាល់មួយទៀត នៅក្នុងរបាយការណ៍ គឺសន្តិភាពបានកើនឡើងគួរឲ្យកត់សំគាល់នៅតំបន់អាមេរិកខាងត្បូង ជាទីដែលអំពើហិង្សាបានថយចុះ និងការរីកចម្រើនខាងផ្នែកថែរក្សាសន្តិសុខ និងសុវត្ថិភាពសង្គម។ អ្នកសរសេររបាយការណ៍នៅក្រុងស៊ីដនី ផ្ទុយទៅវិញ មិនបានផ្តល់ពិន្ទុល្អដល់តំបន់ អាមេរិកខាងជើង ជាពិសេសគឺសហរដ្ឋអាមេរិក នោះទេ។ តាមរបាយការណ៍ សុខសន្តិភាពនៅ ក្នុងទឹកដីអាមេរិកបានធ្លាក់ចុះអាក្រក់ ជាងមុន ដោយសារតែមានការកើនឡើងនៃជម្លោះផ្ទៃក្នុង ហើយកម្រិតយល់ដឹងរបស់ប្រជាជនអាមេរិកាំងទៅលើបទឧក្រិដ្ឋដែលកើតឡើងក្នុងសង្គម។

សន្តិភាពបានល្អប្រសើរបន្តិច ប៉ុន្តែ គេក៏មិនត្រូវអរពេកនោះដែរ ព្រោះថា សន្តិភាពនៅក្នុងពិភពលោក នៅតែអាក្រក់ គឺបានធ្លាក់ថយចុះអាក្រក់ប្រមាណ ២,៤ភាគរយ បើប្រៀបធៀបទៅនឹងកាលពី១០ឆ្នាំមុន។ ទៅតាមរបាយការណ៍ដដែល អំពើហិង្សាបានធ្វើឲ្យពិភពលោកខាតបង់ផ្នែកសេដ្ឋកិច្ចប្រមាណ ១៤,៣ ពាន់ ពាន់លាន(Trillion) ដុល្លារ ស្មើនឹង១២,៦ភាគរយនៃផលិតផលក្នុងស្រុកសរុប (GDP)របស់ពិភពលោក ឬ១៩៥៣ដុល្លារ ក្នុងមនុស្សម្នាក់ៗ។ យ៉ាងណាក៏ដោយ ការខាតបង់ផ្នែកសេដ្ឋកិច្ចដោយសារអំពើហិង្សាបានថយចុះ បើប្រៀបធៀបនឹងឆ្នាំ ២០១៥ ក្នុងមូលហេតុថា ចំនួនមនុស្សដែលស្លាប់ដោយអំពើភេរវកម្មបានថយចុះជាងមុន។ លើសពីនោះ ការចំណាយទៅលើការក្សាសន្តិភាព ក្នុងពិភពលោក ទៅលើការរក្សាសន្តិសុខផ្ទៃក្នុង ហើយនិងការខាត់បង់ដោយសារអំពើឧក្រិដ្ឋកម្មក៏បានថយចុះផងដែរ។ សង្រ្គាមវិញ បានធ្វើឲ្យពិភពលោកខាតបង់សេដ្ឋកិច្ចប្រមាណ ១,៤ពាន់ ពាន់លានដុល្លារ គឺតិចជាង១០នៃការខាតបង់ដោយសារអំពើហិង្សា។ ប្រភព៖ rfi

↧

សង្គ្រោះជាតិជ្រើសយកជម្រើសទី២របស់សាលាក្រុង តែសុំដូរការជួបជុំមកវត្តចាស់

June 1, 2017, 6:10 pm

≫ Next: នាយករដ្ឋមន្ត្រីវៀតណាមទៅអាមេរិក ចុះកិច្ចសន្យាពាណិជ្ជកម្មតម្លៃ៨ពាន់លានដុល្លារ

≪ Previous: របាយការណ៍៖ ពិភពលោក មានសន្តិភាពល្អប្រសើរជាងឆ្នាំ ២០១៥

ទីបំផុតគណបក្សសង្គ្រោះជាតិនិងសាលារាជធានីភ្នំពេញ បានយល់ស្របគ្នា ក្នុងការកំណត់ទីតាំងជួបជុំសកម្មជននៅវត្តចាស់។ ការកំណត់ទីតាំងជួបជុំដើម្បីដង្ហែក្បួនឃោសនាផ្តាច់ព្រ័ត្រនៅថ្ងៃទី២ខែមិថុនា ស្អែកនេះ បានធ្វើឡើងបន្ទាប់ពី តំណាងសាលារាជធានីភ្នំពេញ និងតំណាងគណបក្សសង្គ្រោះជាតិធ្វើការជជែកគ្នាយ៉ាងតានតឹងនៅព្រឹកថ្ងៃព្រហស្បតិ៍នេះ ដើម្បីប្តូរទីតាំងជួបជុំនិងហែក្បួនពីទីលានប្រជាធិបតេយ្យថ្មីមកវត្តចាស់។

ភាពតានតឹងទាក់ទងទៅនឹងផែនការហែក្បួនឃោសនារកសម្លេងឆ្នោតចុងក្រោយរវាងគណបក្សសង្គ្រោះជាតិ និងសាលារាជធានីភ្នំពេញត្រូវបានដោះស្រាយ ដោយសម្រេចថាការជួបជុំរបស់សមាជិកនិងអ្នកគាំទ្រគណបក្សសង្គ្រោះជាតិ ត្រូវបានកំណត់នៅឯវត្តចាស់ ទល់មុខព្រះបរមរាជវាំងត្រើយខាងកើត តែត្រូវកែសម្រួលតម្រាយផ្លូវហែក្បួនខ្លះ។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ថ្លែងប្រាប់វិទ្យុបារាំងអន្តរជាតិ RFI នៅថ្ងៃនេះថា គណបក្សកំពុងតែគូសវាសតម្រាយផ្លូវហែក្បួន ដែលមានមនុស្សចូលរួមប្រមាណជា១០ម៉ឺននាក់ ដោយចៀសវាងការជាន់តម្រាយផ្លូវគ្នាជាមួយគណបក្សប្រជាជនកម្ពុជា។ អ្នកនាំពាក្យគណបក្សប្រឆាំងរូបនេះ បន្តថាអ្នកគាំទ្រនិងសកម្មជនជួបជុំគ្នាប្រគុំតន្ត្រីនៅពេលព្រឹក ហើយម៉ោង២រសៀលទើបមានការហែក្បួនឃោសនា ដោយឆ្លងស្ពានជ្រោយចង្វារ ចូលមក កណ្តាលរាជធានីភ្នំពេញ។

សូមបញ្ជាក់ថា គណបក្សដែលមានអាសនៈនៅក្នុងរដ្ឋសភាទាំងពីរ បានប្រកាសធ្វើពិធីដង្ហែក្បួនឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ ថ្ងៃចុងក្រោយគឺថ្ងៃទី២មិថុនា ដោយទ្រង់ទ្រាយធំដូចគ្នា។ គណបក្សប្រជាជនកម្ពុជាបានប្រកាសពីការដង្ហែក្បួននេះ ជាមួយនឹងការចូលរួមពីសកម្មជនចំនួន១៥ម៉ឺននាក់ ដោយចាប់ផ្តើមជួបជុំគ្នានៅផ្លូវ៦០ម៉ែត្រ ហើយគណបក្សសង្គ្រោះជាតិមានអ្នកចូលរួមនៅកន្លែងជួបជុំនិងនៅតាមមូលដ្ឋានរហូតដល់១០ម៉ឺននាក់ផងដែរ។

តាមគម្រោងដំបូង គណបក្សប្រឆាំងបានស្នើសុំអាជ្ញាធរជួបជុំគ្នា នៅទីលានប្រជាធិបតេយ្យចាស់ ក៏ប៉ុន្តែត្រូវបានបដិសេធ ដោយបារម្ភពីការជាន់កម្មវិធីហែក្បួនធំរបស់គណបក្សកាន់អំណាច។ សាលារាជធានីភ្នំពេញស្នើឲ្យគណបក្សសង្គ្រោះជាតិជ្រើសយកជម្រើស២ គឺទី១ គណបក្សសង្គ្រោះជាតិត្រូវហែក្បួនឃោសនារកសំឡេងឆ្នោតទ្រង់ទ្រាយធំរបស់ខ្លួននៅថ្ងៃទី០១ខែមិថុនានេះ និង ទី២ គណបក្សសង្គ្រោះជាតិ អាចជួបជុំការដង្ហែក្បួនរបស់ខ្លួន នៅទីលានប្រជាធិបតេយ្យថ្មី ឯគីឡូម៉ែត្រលេខ៦ ហើយកំណត់តម្រាយផ្លូវហែឲ្យបានត្រឹមត្រូវជៀសវាងការដង្ហែប៉ះគ្នាជាមួយគណបក្សប្រជាជនកម្ពុជា ប្រសិនបើគណបក្សសង្គ្រោះជាតិ ចង់ធ្វើការហែក្បួនធំនៅថ្ងៃទី២ឧសភាដែរ៕ ប្រភព៖ rfi

↧

នាយករដ្ឋមន្ត្រីវៀតណាមទៅអាមេរិក ចុះកិច្ចសន្យាពាណិជ្ជកម្មតម្លៃ៨ពាន់លានដុល្លារ

June 1, 2017, 6:13 pm

≫ Next: គ.ជ.បទទួលស្គាល់អ្នកសង្កេតការណ៍និងភ្នាក់ងារគណបក្សនយោបាយជិត១៨ម៉ឺននាក់

≪ Previous: សង្គ្រោះជាតិជ្រើសយកជម្រើសទី២របស់សាលាក្រុង តែសុំដូរការជួបជុំមកវត្តចាស់

លោក នាយករដ្ឋមន្ត្រីវៀតណាម បានអញ្ជើញទៅសេតមានសហរដ្ឋអាមេរិក ជួបជាមួយ លោកដូណាល់ ត្រាំ កាលពីថ្ងៃពុធ ទី៣១ឧសភា។ កម្មវត្ថុនៃដំណើរទៅដល់ដ៏ស្ងាត់ៗនេះ គឺដើម្បីចុះហត្ថលេខា លើកិច្ចព្រមព្រៀងពាណិជ្ជកម្មរវាងវៀតណាម និងសហរដ្ឋអាមេរិក ដែលមានទឹកប្រាក់ប្រមាណជា ៨ពាន់លានដុល្លារ។ ក្នុងនោះ ក្រុមហ៊ុនអាកាសចរណ៍ឯកជនVietjet របស់វៀតណាម បានចុះហត្ថលេខាទិញម៉ាស៊ីនយន្តហោះក្នុងតំលៃ ៣៥៨០លានដុល្លារ។

លោក ង្វៀន ស៊ាន់ភុក នាយករដ្ឋមន្ត្រីវៀតណាម បានទៅដល់សេតវិមាន ជួបនឹងលោកដូណាល់ ត្រាំ ក្នុងគោលបំណងរឹតចំនងសហប្រតិបត្តិការពាណិជ្ជកម្ម ជាមួយសហរដ្ឋអាមេរិក។ កិច្ចសន្យាពាណិជ្ជកម្មជាច្រើន ដែលគិតជាទឹកប្រាក់ប្រមាណជា ៨ពាន់លានដុល្លារ ត្រូវបានចុះហត្ថលេខានាពេលនោះ។

លោកនាយករដ្ឋមន្ត្រីវៀតណាម ត្រូវបានអមដំណើរដោយ អ្នកជំនួញវៀតណាម ជាច្រើននាក់។ ក្នុងនោះ មានលោកស្រី ង្វៀន ធីភឿងថាវ ដែលជាស្ត្រីមហាសេដ្ឋីតែម្នាក់គត់នៅវៀតណាម និងជាថៅកែក្រុមហ៊ុនអាកាសចរណ៍ឯកជនវៀតណាម ឈ្មោះ Vietjet។ ក្នុងឱកាសនោះដែរ ក្រុមហ៊ុន Vietjet បានចុះហត្ថលេខាទិញម៉ាស៊ីនរ៉េអាក់ទ័រយន្តហោះ ពីក្រុមហ៊ុនGeneral Electric ចំនួន២១៥គ្រឿង ដែលគិតជាទឹកប្រាក់ ប្រមាណជា ៣៥៨០លានដុល្លារ។ នៅមានកិច្ចសន្យា ១ពាន់លានដុល្លារ ដាច់ដោយឡែកមួយទៀត ជាមួយនឹងGeneral Electric Capital Aviation Services។

សូមបញ្ជាក់ថា ក្រុមហ៊ុនVietjet របស់វៀតណាម ត្រូវបានបង្កើតឡើងកាលពីឆ្នាំ២០១១ ដោយបានដណ្តើមយកទីផ្សារ ជើងហោះហើរក្នុងស្រុកវៀតណាម ចំនួន២៥% ប្រជែងជាមួយនឹងក្រុមហ៊ុនរដ្ឋ គឺក្រុមហ៊ុនVietnam Airlines។ កាលពីឆ្នាំ២០១៦ ក្រុមហ៊ុនអាកាសចរណ៍ឯកជន Vietjet នេះ បានចុះកិច្ចសន្យាទិញ យន្តហោះBoeing 737 Max ចំនួន១០០គ្រឿង។

គួរកត់សម្គាល់ដែរថា វៀតណាម បានតំរង់ទិសលើសេដ្ឋកិច្ចទីផ្សារសេរី ផ្តល់អទិភាពដល់ការនាំចេញ ហើយបានស្គាល់កំណើនសេដ្ឋកិច្ចជាមធ្យម លើសពី ៥% ក្នុងរយៈពេល៥ឆ្នាំចុងក្រោយនេះ។ ជាមួយនឹងប្រជាជនជិត១០០លាននាក់ វៀតណាម គឺជាទីផ្សារ ដ៏ធំនៅអាស៊ីអាគ្នេយ៍។ វៀតណាម បានសង្ឃឹមយ៉ាងមុតមាំ ថានឹងស្រូបយកផលប្រយោជន៍សេដ្ឋកិច្ច ដែលកើតចេញពីកិច្ចព្រមព្រៀងពាណិជ្ជកម្មសេរី អន្តរប៉ាស៊ីហ្វិក (TPP) ។ ក៏ប៉ុន្តែអ្វីៗបានប្រែប្រួល នៅពេលលោកដូណាល់ ត្រាំ បានសម្រេចដកខ្លួនអាមេរិក ចេញពីកិច្ចព្រមព្រៀងនេះ។

តែយ៉ាងណា រដ្ឋាភិបាលវៀតណាម មិនបានបង្អង់ដៃ ឬកាត់បន្ថយទំនាក់ទំនងពាណិជ្ជកម្ម ជាមួយនឹងសហរដ្ឋអាមេរិកទេ។ យ៉ាងណាមិញ លោកនាយករដ្ឋមន្រ្តីវៀតណាម គឺជាមេដឹកនាំប្រទេសអាស៊ីអាគ្នេយ៍តំបូងគេបង្អស់ ដែលបានអញ្ជើញទៅជួបលោកដូណាល់ ត្រាំ ដល់សេតវិមាន។ ចំណែកលោក ដូណាល់ ត្រាំ វិញ មានគំរោងទៅវៀតណាម នៅខែវិច្ឆិកាខាងមុខ ក្នុងឱកាស វេទិការកំពូលសហប្រតិបត្តិការសេដ្ឋកិច្ច អាស៊ី-ប៉ាស៊ីហ្វិក៕ ប្រភព៖ rfi

↧

គ.ជ.បទទួលស្គាល់អ្នកសង្កេតការណ៍និងភ្នាក់ងារគណបក្សនយោបាយជិត១៨ម៉ឺននាក់

June 1, 2017, 6:15 pm

≫ Next: លោក Trump ប្រកាសដកអាមេរិកចេញពីកិច្ចព្រមព្រៀងនៃការប្រែប្រួលអាកាសធាតុក្រុងប៉ារីស

≪ Previous: នាយករដ្ឋមន្ត្រីវៀតណាមទៅអាមេរិក ចុះកិច្ចសន្យាពាណិជ្ជកម្មតម្លៃ៨ពាន់លានដុល្លារ

គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលស្គាល់អ្នកសង្កេតការណ៍ និងភ្នាក់ងារគណបក្សនយោបាយសរុបជិត ១៨ម៉ឺននាក់ ដើម្បីចូលរួមសង្កេតមើលដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ខាងមុខ។ ទាំង គ.ជ.ប និងអង្គការសង្គមស៊ីវិល សុទ្ធសឹងតែមើលឃើញពីតួនាទីដ៏សំខាន់របស់អ្នកសង្កេតការណ៍ក្នុងការបោះឆ្នោតឃុំ-សង្កាត់នេះ។

ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ នេះ គណៈកម្មាធិការជាតិរៀបចំការបោះឆ្នោតទទួលស្គាល់អ្នកសង្កេតការណ៍ជាតិចំនួនជាង ៧ម៉ឺន ៤ពាន់នាក់ (៧៤.២៩៤) អ្នកសង្កេតការណ៍អន្តរជាតិដែលមកពីអង្គការអន្តរជាតិ និងអង្គទូតនានា ចំនួន ១៩២នាក់ ភ្នាក់ងារគណបក្សនយោបាយពេញសិទ្ធិចំនួនជាង ៥ម៉ឺន ៨ពាន់នាក់ (៥៨.៤១០) និងបម្រុងចំនួនជាង ៤ម៉ឺន ៦ពាន់នាក់ (៤៦.៦៦៦)។

អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បញ្ជាក់នៅថ្ងៃទី៣១ ខែឧសភា ថា នេះជាតួលេខដ៏ច្រើនគួរឱ្យកត់សម្គាល់ ដែលហួសពីការរំពឹងទុក ហើយ គ.ជ.ប កំពុងបោះពុម្ពប័ណ្ណសម្គាល់ខ្លួនបន្ថែមសម្រាប់អ្នកសង្កេតការណ៍ និងភ្នាក់ងារគណបក្សនយោបាយទាំងនោះ។

លោក ហង្ស ពុទ្ធា ថ្លែងថា គោលការណ៍នៃការបោះឆ្នោតដោយសេរី ត្រឹមត្រូវ និងយុត្តិធម៌ គឺត្រូវមានការចូលរួមពីគ្រប់ភាគពាក់ព័ន្ធ ហើយអ្នកសង្កេតការណ៍នេះហើយជាភាគីមួយយ៉ាងសំខាន់ ព្រោះពួកគេជាអ្នកឆ្លុះបញ្ចាំងប្រកបដោយតម្លាភាពចំពោះព្រឹត្តិការណ៍ដែលកើតឡើងនៅគ្រប់ដំណាក់កាលនៃការបោះឆ្នោត៖ «ការបោះឆ្នោតពិតជាត្រូវការពួកគាត់ (អ្នកសង្កេតការណ៍) ហើយបើមានភាពមិនប្រក្រតី ឬក៏មានពាក្យបណ្ដឹង ពួកគាត់អាចជាសាក្សីយ៉ាងសំខាន់នៅក្នុងដំណើរការបោះឆ្នោត និងរាប់សន្លឹកឆ្នោតផងដែរ»។

ដូចគ្នានឹង គ.ជ.ប ដែរ អ្នកសម្របសម្រួលផ្នែកអង្កេតនៃអង្គការខុមហ្វ្រែល (COMFREL) លោក កន សាវាង្ស ថ្លែងថា ដើម្បីកុំឱ្យមានការខ្វែងយោបល់គ្នាជុំវិញរឿងភាពមិនប្រក្រតីទាំងឡាយដែលកើតមាន ពិសេសរឿងលទ្ធផលបោះឆ្នោត វាជារឿងចាំបាច់បំផុតដែលត្រូវមានការចូលរួមពីអ្នកសង្កេតការណ៍ឱ្យបានច្រើន ដើម្បីជាសាក្សីថា ការបោះឆ្នោតនេះប្រព្រឹត្តទៅដោយសេរី ត្រឹមត្រូវ និងយុត្តិធម៌ ឬមួយក៏យ៉ាងណា៖ «គណបក្សប្រឆាំងគាត់ស្រែកថា សំឡេងឆ្នោតខ្ញុំនៅឯណា? នេះគឺជាបញ្ហាដែលធ្វើឲ្យសង្គមស៊ីវិល និងគណបក្សនយោបាយមួយចំនួនមិនសុខចិត្តទេ ត្រូវតែរកបញ្ហាឲ្យឃើញថា តើបញ្ហានោះកើតឡើងរបៀបណា? ទាំងអស់គ្នាចូលរួម (សង្កេតការណ៍) ព្រោះចង់ដឹងបញ្ហាទាំងអស់ហ្នឹង»។

បន្ទប់ស្ថានការណ៍សម្រាប់ការបោះឆ្នោតឆ្នាំ២០១៧ ដែលជាសម្ព័ន្ធអង្គការសមាគមជិត ៤០ នៅកម្ពុជា ដាក់អ្នកសង្កេតការណ៍ចំនួន ១ម៉ឺន ៣ពាន់នាក់ នៅគ្រប់ទីតាំងបោះឆ្នោតទាំងអស់ទូទាំងប្រទេស។

ចំណែកអង្គការតម្លាភាពកម្ពុជា ដែលជំនាញខាងកិច្ចការប្រឆាំងអំពើពុករលួយ ក៏បានដាក់អ្នកសង្កេតការណ៍របស់ខ្លួនជាច្រើនដែរ នៅតាមតំបន់គោលដៅនៅទូទាំងប្រទេស។ អ្នកសង្កេតការណ៍សរុបនៃអង្គការមួយនេះ មានប្រមាណ ១.២០០នាក់។

នាយកប្រតិបត្តិអង្គការតម្លាភាពកម្ពុជា លោក ព្រាប កុល ថ្លែងថា អំពើពុករលួយផ្នែកនយោបាយ (Political Corruption) ដែលជាប្រភពនៃអំពើពុករលួយដទៃទៀត តែងតែកើតមាននៅរដូវកាលបោះឆ្នោត ដូច្នេះការដាក់ពង្រាយអ្នកសង្កេតការណ៍ គឺជារឿងមួយដ៏សំខាន់ ដើម្បីលើកកម្ពស់សុចរិតភាព តម្លាភាព និងភាពយុត្តិធម៌នៃការបោះឆ្នោតនេះ៖ «យើងយល់ឃើញថា ភាពមិនប្រក្រតីនៃការបោះឆ្នោត ការទិញសន្លឹកឆ្នោត ការបន្លំសន្លឹកឆ្នោត ឬក៏បាតុភាពដែលអាចធ្វើឲ្យមានភាពអយុត្តិធម៌នៅក្នុងដំណើរនៃការបោះឆ្នោត ក៏ជាប្រភេទនៃអំពើពុករលួយដែរ ដោយយើងហៅថាជាអំពើពុករលួយនយោបាយ។ បើយើងមើលឲ្យជ្រៅជាងនេះទៀត អំពើពុករលួយនយោបាយ ជាឫសគល់នៃអំពើពុករលួយដទៃទៀត ដូចជាការស៊ីសំណូក ការជំរិតទារប្រាក់ ការកេងបន្លំឯកសារ បក្ខពួកនិយម សាច់ញាតិ និងក្រុមគ្រួសារនិយម បណ្ដាញរកស៊ីខុសច្បាប់»។

ការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ នេះ ត្រូវបានអ្នកជំនាញខាងកិច្ចការបោះឆ្នោត វាយតម្លៃថា ជាការបោះឆ្នោតមួយដ៏សំខាន់ និងដ៏ស្រួចស្រាល់ ដោយសារតែការកើនឡើងនៃសំឡេងគាំទ្ររបស់បក្សប្រឆាំង។ គណបក្សសង្គ្រោះជាតិ ដែលជាបក្សប្រឆាំងដ៏មានឥទ្ធិពលជាងគេក្នុងពេលបច្ចុប្បន្ន បានដាក់បេក្ខជនឈរឈ្មោះគ្រប់ឃុំ-សង្កាត់ទាំងអស់ ដូចគណបក្សប្រជាជនកម្ពុជា ដែលជាបក្សកាន់អំណាចដែរ។

អ្នកជំនាញមើលឃើញថា ក្នុងចំណោមគណបក្សទាំងពីរ បើសិនគណបក្សណាឈ្នះអាសនៈឃុំ-សង្កាត់ច្រើនជាង គណបក្សនោះនឹងមានឱកាសពង្រឹងអំណាចកាន់តែខ្លាំងនៅថ្នាក់មូលដ្ឋាន ហើយសំឡេងឆ្នោតដែលពួកគេទទួលបានពីការបោះឆ្នោតក្រុមប្រឹក្សាឃុំ-សង្កាត់នេះ នឹងក្លាយជាសំឡេងសម្រាប់ការបោះឆ្នោតក្រុមប្រឹក្សាស្រុក ខណ្ឌ ខេត្ត រាជធានី និងព្រឹទ្ធសភា។ ជាពិសេសលទ្ធផលបោះឆ្នោតនេះ នឹងក្លាយជាមូលដ្ឋានសម្រាប់ការវិភាគលទ្ធផលបោះឆ្នោតជ្រើសតាំងតំណាងរាស្ត្រ នៅឆ្នាំ២០១៨ ខាងមុខ៕ ប្រភព៖ rfa

↧

លោក Trump ប្រកាសដកអាមេរិកចេញពីកិច្ចព្រមព្រៀងនៃការប្រែប្រួលអាកាសធាតុក្រុងប៉ារីស

June 1, 2017, 6:17 pm

≫ Next: ជប៉ុនបញ្ជូនផ្កាយរណបកំណត់ទីតាំងភូមិសាស្ត្រ Michibiki N°2 បានជោគជ័យ

≪ Previous: គ.ជ.បទទួលស្គាល់អ្នកសង្កេតការណ៍និងភ្នាក់ងារគណបក្សនយោបាយជិត១៨ម៉ឺននាក់

លោកប្រធានាធិបតី Trump មានប្រសាសន៍ថា៖«យើងនឹងចេញពីកិច្ចព្រមព្រៀងនោះ‍»។ ក៏ប៉ុន្តែ លោកប្រធានាធិបតីបាននិយាយទៀតថា លោកនឹងសុំឲ្យអ្នកចរចាស្វះស្វែងរកលក្ខខណ្ឌថ្មីរបស់កិច្ចព្រមព្រៀងនោះ។

President Donald Trump speaks about the U.S. role in the Paris climate change accord, Thursday, June 1, 2017, in the Rose Garden of the White House in Washington. (AP Photo/Pablo Martinez Monsivais)

សេតវិមាន —លោកប្រធានាធិបតីអាមេរិក Donald Trump បានប្រកាសកាលពីថ្ងៃព្រហស្បត៍ថា លោកនឹងដកសហរដ្ឋអាមេរិកចេញពីកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ ដែលត្រូវបានចុះហត្ថលេខាដោយលោក បារ៉ាក់ អូបាម៉ា ប្រធានាធិបតីកាន់តំណែងមុនលោក ក៏ប៉ុន្តែ នឹងស្វះស្វែងចូលរួមក្នុងកិច្ចព្រមព្រៀងថ្មី។

ថ្លែងពីសួនច្បារផ្កាកូលាបនៅសេតវិមាន លោកប្រធានាធិបតី Trump បានមានប្រសាសន៍ថា លោកនឹងដកសហរដ្ឋអាមេរិកចេញពីកិច្ចព្រមព្រៀងអាកាសធាតុក្រុងប៉ារីសហើយនឹងចាប់ផ្តើមពិភាក្សាភ្លាមៗ ដើម្បីចូលក្នុងកិច្ចព្រមព្រៀងនោះឡើងវិញឬបង្កើតកិច្ចព្រមព្រៀងថ្មីមួយដែលជួយធ្វើឲ្យអ្នកពន្ធជនជាតិអាមេរិកាំងមានភាពប្រសើរជាងមុន។

លោកប្រធានាធិបតីTrumpបានថ្លែងទៀតថា៖«កិច្ចព្រមព្រៀងអាកាសធាតុក្រុងប៉ារីសគ្រាន់តែជាឧទាហរណ៍មួយរបស់រដ្ឋាភិបាលក្រុងវ៉ាស៊ីនតោនចូលក្នុងកិច្ចព្រមព្រៀងនោះដែលធ្វើឲ្យប៉ះពាល់ដល់សហរដ្ឋអាមេរិក‍។ នៅថ្ងៃនេះ សហរដ្ឋអាមេរិកនឹងបញ្ឈប់ការអនុវត្តកិច្ចព្រមព្រៀងដែលមិនតម្រូវឲ្យអនុវត្តតាមទាំងអស់‍»។

ការសម្រេចនេះកើតមានឡើងបន្ទាប់ពីការនិយាយស្មានៗអស់រយៈពេលជាច្រើនថ្ងៃថាតើលោកប្រធានាធិបតី Trumpនឹងបំពេញទៅតាមការសន្យារបស់ដើម្បីដកខ្លួនចេញពីកិច្ចព្រមព្រៀងអាកាសធាតុក្រុងប៉ារីសដែរឬទេ។

កាលពីថ្ងៃពុធ នៅពិធីថតរូបមួយជាមួយនាយករដ្ឋមន្រ្តីវៀតណាមលោក Nguyen Xuan Phucដែលកំពុងបំពេញទស្សនកិច្ចនៅសហរដ្ឋអាមេរិក លោកប្រធានាធិបតីTrumpបាននិយាយថា លោកបានឮពីមនុស្សជាច្រើននៅពេលដែលលោកពិចារណាពីការដកខ្លួនចេញពីកិច្ចព្រមព្រៀងអាកាសធាតុនេះ៕ ប្រភព៖ VOA

↧

ជប៉ុនបញ្ជូនផ្កាយរណបកំណត់ទីតាំងភូមិសាស្ត្រ Michibiki N°2 បានជោគជ័យ

June 1, 2017, 6:22 pm

≫ Next: ពលរដ្ឋកម្ពុជាចង់បានការអភិវឌ្ឍភូមិ-ឃុំ និងការផ្តល់សេវាសាធារណៈប្រសើរជាងមុន ក្រោយការបោះឆ្នោតឃុំ-សង្កាត់

≪ Previous: លោក Trump ប្រកាសដកអាមេរិកចេញពីកិច្ចព្រមព្រៀងនៃការប្រែប្រួលអាកាសធាតុក្រុងប៉ារីស

នៅថ្ងៃព្រសហ្បតិ៍ទី១ មិថុនានេះ ទីភ្នាក់ងារស្រាវជ្រាវអវកាសជប៉ុន ទើបបានបាញ់បង្ហោះ យាន H-2A របស់ខ្លួនបានសម្រេច ដើម្បីបញ្ជូន ផ្កាយរណបកំណត់ទីតាំងភូមិសាស្ត្រ ឈ្មោះ Michibiki ទី២ ទៅដាក់នៅខ្សែអកប៊ីតផែនដី។ ផ្កាយរណបនេះ នឹងទៅបំពេញបន្ថែម ដល់ប្រព័ន្ធផ្កាយរណបកំណត់ទីតាំងភូមិសាស្ត្រដ៏ទៃទៀត ដើម្បីធ្វើឲ្យ ការផ្តល់រលកសញ្ញា កំណត់ទីតាំងភូមិសាស្ត្រ មកកាន់ផែនដី ឲ្យកាន់តែច្បាស់ សុក្រិត្យ និងលឿនរហ័ស។

នេះគឺជាយាន H-2H ទី៣៤ហើយ ដែលជប៉ុនបានបាញ់បង្ហោះទៅកាន់ខ្សែអកប៊ីត ផែនដី។ បាញ់ចេញពីស្ថានីយអាវកាស Tanegashima ស្ថិតនៅភាគខាងត្បូងជប៉ុន កាលពីម៉ោង៩ និង១៧នាទីព្រឹក យាននេះ បានទៅដល់ខ្សែអកប៊ីតដោយជោគជ័យ ដោយបាននាំយក ផ្កាយរណបបច្ចេកវិទ្យាចុងក្រោយ ឈ្មោះ Michibiki ទី២។ ការផលិត និងការបាញ់បង្ហោះ ត្រូវបានទទួលការចូលរួមពីសំណាក់ ទីភ្នាក់ងារស្រាវជ្រាវអវកាសជប៉ុន (JAXA) និងក្រុមហ៊ុន Mitsubishi Heavy Industries។

ផ្កាយរណប Michibiki ទី២នេះ និងទៅបំពេញបន្ថែម ដល់ផ្កាយរណបMichibiki ទីមួយ ដែលបានបង្ហោះឡើងទៅនៅឆ្នាំ២០១០ ហើយគឺជាផ្កាយរណប ដែនមានទួនាទីបញ្ជូនរលកសញ្ញាកំណត់ទីតាំងភូមិសាស្រ្ត រឺដែលហៅជាទូទៅថា GPS។ តាមការរំពឹងទុក ចាប់ពីឆ្នាំ២០១៨ ទៅ ក្នុងរយៈពេល១៥ឆ្នាំ ផ្កាយរណបថ្មីនេះ នឹងចាប់ផ្តើមប្រតិបត្តិការ ផ្តល់រលកសញ្ញាកំណត់ទីតាំងភូមិសាស្ត្រ ក្នុងល្បឿនលឿន និងរូបភាពកាន់តែច្បាស់។ ទិន្និន័យGPS ទាំងអស់នេះ នឹងត្រូវទទួលបាន នៅជប៉ុន អូស្ត្រាលី និងនៅមួយផ្នែកនៃតំបន់អាស៊ី។

ដោយសារតែ ផ្កាយរណប Michibiki ស្ថិតនៅចំពីលើប្រទេសជប៉ុន ការបញ្ជូនរលកសញ្ញា ឬទិន្នន័យភូមិសាស្ត្ររបស់ជប៉ុន និងកាន់តែរហ័ស ច្បាស់ និងសុក្រិត។ តែយ៉ាងណា ការបញ្ជូនរលកសញ្ញា កំណត់ទីតាំងពីផ្កាយរណប អាចដំណើរការទៅបានល្អពេញលេញ គឺវាអាស្រ័យមួយភាគធំ ទៅនឹងកត្តាអាកាសធាតុ និងលក្ខណៈសណ្ឋានដី។ មួយវិញទៀត គេក៏ត្រូវការការផ្តល់រលកសញ្ញា ពីផ្កាយរណបដទៃផ្សេងទៀតដែរ ដើម្បីអាចកំណត់ទីតាំងណាមួយ ប្រកបដោយសុក្រិតភាព។

តាមការរំពឹងទុក ការរីកចំរើន ផ្នែកទិន្ន័យកំណត់ទីតាំងភូមិសាស្ត្រនេះ នឹងបើកផ្លូវឲ្យមានការអភិវឌ្ឍន៍ ទីផ្សារ នៃមុខជំនួញ រឺសេវាកម្មជាច្រើន ដែលប្រើប្រាស់ ការកំណត់ទីតាំងភូមិសាស្រ្ត។ មិនត្រឹមតែប៉ុណ្ណោះ សេវាកម្មសាធារណៈ ដូចជាការដឹកជញ្ជូនសាធារណៈ ប្រព័ន្ធការពារសុវត្ថិភាពជាដើម នឹងត្រូវរីកចំរើនបន្ថែម ដោយសារតែទិន្និន័យភូមិសាស្ត្រច្បាស់ និងរហ័សភ្លាមៗ។ ទិន្ន័យភូមិសាស្ត្រដ៏រហ័សនេះ ក៏អាចជួយបញ្ជូនព័ត៌មានទៅកាន់អ្នកប្រើប្រាស់ ជាក្រុម ក្នុងករណីចាប់បានរលកសញ្ញានៃការរញ្ជួយដី រឺស៊ូណាមិ ជាដើម៕ ប្រភព៖ RFI

↧

ពលរដ្ឋកម្ពុជាចង់បានការអភិវឌ្ឍភូមិ-ឃុំ និងការផ្តល់សេវាសាធារណៈប្រសើរជាងមុន ក្រោយការបោះឆ្នោតឃុំ-សង្កាត់

June 1, 2017, 6:26 pm

≫ Next: ប្រភពទឹកក្រោមដីជ្រៅកំពុងប្រឈមនឹងការបាត់បង់

≪ Previous: ជប៉ុនបញ្ជូនផ្កាយរណបកំណត់ទីតាំងភូមិសាស្ត្រ Michibiki N°2 បានជោគជ័យ

ការអភិវឌ្ឍន៍ហេដ្ឋារចនាសម្ព័ន្ធជាអាទិ៍សាលារៀន ផ្លូវថ្នល់ មន្ទីរពេទ្យ និងការផ្ដល់សេវាសាធារណៈល្អ ដល់ពលរដ្ឋដោយមិនគិតថ្លៃ គឺជាតម្រូវការសំខាន់ៗ ដែលពលរដ្ឋកម្ពុជាជាច្រើនរំពឹងចង់បានពីការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃអាទិត្យទី៤ ខែមិថុនានេះ។ ពលរដ្ឋកម្ពុជាមួយចំនួនដែល VOA បានជួបសម្ភាស និយាយថា ពួកគេបានត្រៀមខ្លួន និងឯកសាររួចរាល់ហើយសម្រាប់ការបោះឆ្នោតខាងមុខនេះ។

ភ្នំពេញ —ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅកម្ពុជា នឹងឈានចូលមកដល់នាថ្ងៃអាទិត្យខាងមុខ។ ពលរដ្ឋកម្ពុជាជាច្រើនលាននាក់ទូទាំងប្រទេស ត្រូវគេរំពឹងថានឹងចូលរួមការបោះឆ្នោតនៅតាមមូលដ្ឋានដែលពួកគេស្នាក់នៅ ឬធ្វើដំណើរទៅកាន់ស្រុកកំណើតរបស់ពួកគេដើម្បីបោះឆ្នោត។

ពលរដ្ឋកម្ពុជាដែលរស់នៅក្នុងរាជធានីភ្នំពេញ និងខេត្តមួយចំនួនដែល VOA បានជួបសម្ភាសនាព្រហស្បតិ៍នេះ បង្ហាញភាពជឿជាក់ថា ពួកគេបានត្រៀមខ្លួននិងឯកសារពាក់ព័ន្ធរួចជាស្រេចសម្រាប់ការបោះឆ្នោតដែលនឹងមកដល់នៅត្រឹមតែ៣ថ្ងៃទៀតប៉ុណ្ណោះ។

លោក ហ៊ឹម សោភ័ណ្ឌ វ័យ៤០ឆ្នាំ ជាជាងសំណង់មួយរូបបម្រើការក្នុងរាជធានីភ្នំពេញ។ លោកត្រៀមរួចជាស្រេចនូវអត្តសញ្ញាណប័ណ្ណរបស់ខ្លួន ដើម្បីធ្វើដំណើរទៅបោះឆ្នោតឯស្រុកកំណើតក្នុងខេត្តកំពង់ធំ បន្ទាប់ពីទទួលបានច្បាប់សម្រាកការងាររយៈពេល៣ថ្ងៃ។

ជាងសំណង់រូបនេះ ចាប់អារម្មណ៍ខ្លាំងចំពោះការផ្ដល់សេវាសាធារណៈឱ្យបានប្រសើរជាងមុន ក្រោយការបោះឆ្នោតជ្រើសរើស ឃុំ សង្កាត់ថ្មីនេះ។

លោក បញ្ជាក់ថា ក្នុងអាណត្តិកន្លងមក បើទោះជាមានការកែប្រែជាវិជ្ជមានខ្លះហើយក្ដី ក៏ប៉ុន្តែការទារកម្រៃសេវាក្រៅផ្លូវការពីមន្ត្រីថ្នាក់មូលដ្ឋាននៅតែមាន។

«នៅសហគមន៍ ខ្ញុំចង់បាន ទី១ ចង់ឲ្យគាត់បម្រើប្រជាពលរដ្ឋ នៅពេលពលរដ្ឋត្រូវការអី ទៅពឹងពាក់គាត់ ស្នើសំបុត្រស្នាម ធ្វើនេះធ្វើនោះ គាត់ធ្វើតាមដែលមានចែងក្នុងច្បាប់ ព្រោះមិនចង់ឲ្យគាត់យកលុយកាក់ពីប្រជាពលរដ្ឋ»។

គណបក្សនយោបាយក្នុងប្រទេសចំនួន១២ កំពុងធ្វើយុទ្ធនាការឃោសនាបោះឆ្នោតឃុំ-សង្កាត់រយៈពេល២សប្ដាហ៍នៅទូទាំងប្រទេស។ យុទ្ធនាការឃោសនាបោះឆ្នោតនេះនឹងបញ្ចប់ថ្ងៃសុក្រ មុនពេលការបោះឆ្នោតឃុំ-សង្កាត់ដែលនឹងធ្វើឡើងនាថ្ងៃអាទិត្យ ទី៤ខាងមុខ។

លោក ហ៊ិន ចាន់ វ័យ៤២ គឺជាអ្នកបើករ៉ឺម៉កកង់បី ក្នុងរាជធានីភ្នំពេញ។ លោក និងភរិយា ដែលជាកម្មកររោងចក្រកាត់ដេរ នឹងបោះឆ្នោតនៅមូលដ្ឋានដែលពួកគេស្នាក់នៅក្នុងខណ្ឌឫស្សីកែវ រាជធានីភ្នំពេញ។

លោកថា ការបោះឆ្នោត គឺជាការបំពេញកាតព្វកិច្ច និងអនុវត្តសិទ្ធិពេញលេញជាពលរដ្ឋខ្មែរ ហើយថា រូបលោកផ្ទាល់ចង់ឃើញ សហគមន៍ដែលលោករស់នៅ មានសេវាសាធារណៈ និងសេវាសុខាភិបាល ដែលមិនគិតថ្លៃ។

«កាលមុនធ្លាប់ស្នើសុំលិខិតស្នាម ដូចថាយើងរវល់អីចឹង ទាល់តែយើងបង់លុយឲ្យគេ ទើបបាន។ ខ្ញុំធ្លាប់ធ្វើលិខិតបញ្ជាក់ទីលំនៅអីចឹង។ អីចឹងទៅមេឃុំថ្មី ចង់សំណូមពរកុំឲ្យគេយកលុយកន្លែងធ្វើលិខិត។ ចង់បានអត្តចរិតឲ្យស្លូតបូតបន្តិច ឲ្យចេះមើលការខុសត្រូវប្រជាពលរដ្ឋ យើងសំណូមពរអីឲ្យធ្វើតាម ចង់ធ្វើផ្លូវ អត់ធ្វើតាមផង កាលមុនអីចឹង។ មេឃុំថ្មីចង់ឲ្យ ពេលពលរដ្ឋឈឺអី ទៅពេទ្យកុំឲ្យយកលុយ។ កាលមុនខ្ញុំទៅពេទ្យរដ្ឋ ប្រាប់គេថា យើងអត់លុយអី គេអត់មើលយើងទេ ដល់តែមានលុយបានគេមើល។ អាហ្នឹងពេទ្យរដ្ឋផង មិនមែនឯកជនទេ»។

លោកស្រី ណៃ សុផេង វ័យ៤៣ឆ្នាំ ដែលជាកសិករ រស់នៅក្នុងភូមិកែវឡាត ឃុំពន្លៃ ស្រុកបរិបូរណ៍ ខេត្តកំពង់ឆ្នាំង ចង់ឲ្យមានការអភិវឌ្ឍផ្នែកហេដ្ឋារចនាសម្ព័ន្ធនៅក្នុងភូមិឃុំដែលលោកស្រីរស់នៅ។

«ចង់បានគេធ្វើផ្លូវឲ្យល្អ។ ចង់ឲ្យរដ្ឋអំណាចគេជួយ ឲ្យកូនខ្ញុំបានរៀន ឲ្យមានលទ្ធភាពធ្វើការហ្នឹងគេថ្ងៃក្រោយ។ ខ្ញុំស្រលាញ់ការសិក្សា តែខ្ញុំខ្វះលទ្ធភាព។ ចង់ឲ្យខាងឃុំជួយឲ្យស្រូវអង្ករ ពេលធ្វើហើយ ឲ្យបានថ្លៃផង កុំឲ្យពេលគេច្រូតហើយ បន្ថោកតម្លៃគ្នា»។

លោកស្រី យាន កាន អាយុ៥៧ឆ្នាំ ដែលជាកសិករមួយរូបទៀត នៅខេត្តកំពង់ឆ្នាំង រំពឹងចង់រស់នៅក្នុងសហគមន៍ដែលមិនមានអំពើពុករលួយ និងគ្មានបក្សពួកនិយម។

«ចង់ឲ្យមេឃុំមើលកូនចៅ ដូចខ្វះទឹកអណ្ដូង សាលារៀន ផ្លូវអីចឹងទៅ។ ចង់ឲ្យដូចថាបឹងអីចឹង តម្រូវទុកឲ្យគោក្របីផឹកទឹកអីចឹង ដូចរាល់ថ្ងៃនេះអត់មានទេ គេដាំឈូកអីអស់ហើយ។ ខ្ញុំជ្រើសរើសឲ្យមេឃុំហ្នឹងមើលកូនចៅ ដូចថាពេលមានអំណោយអី គេមិនមានប្រាប់ដូចពួកខ្ញុំអីទេ។ គេប្រាប់តែគ្នាគេអីអញ្ចឹងទៅ»។

លោក អ៊ុយ រ៉ាឆឹង អាយុ៥១ឆ្នាំ ដែលជាកសិករចិញ្ចឹមជ្រូក រស់នៅក្នុងភូមិសន្លង់ ឃុំត្រពាំងចាន់ ស្រុកបរិបូរណ៍ ខេត្តកំពង់ឆ្នាំង ចង់ឲ្យក្រុមប្រឹក្សាឃុំ សង្កាត់ថ្មី ផ្ដោតសំខាន់លើការអប់រំ ការកសាងសាលារៀននៅតាមមូលដ្ឋាន និងកាត់បន្ថយក្មេងទំនើងនៅតាមសាលារៀន។

«អីចឹង បើអ្នកជាប់ឆ្នោតហើយ គាត់ត្រូវតែជួយមើលពួកគាត់ ជួយផ្ដល់សេវាឲ្យគាត់ ដើម្បីឲ្យគាត់មានទំនុកចិត្ត។ ហ្នឹងគាត់ហៅថា អាជ្ញាធរគំរូរបស់ពលរដ្ឋនៅក្នុងឃុំ។ និយាយរួមទៅហេដ្ឋារចនាសម្ព័ន្ធ ដូចជាផ្លូវថ្នល់ ប្រឡាយទឹក ដើម្បីកុំឲ្យប្រជាពលរដ្ឋខ្វះប្រភពទឹក»។

ក្នុងថ្ងៃឃោសនាចុងបញ្ចប់ នាថ្ងៃសុក្រស្អែកនេះ លោកនាយករដ្ឋមន្ត្រី ហ៊ុន សែនដែលកាន់អំណាចអស់រយៈពេល៣២ឆ្នាំ នឹងដឹកនាំក្បួនយុទ្ធនាការរបស់គណបក្សប្រជាជនកម្ពុជា។ គណបក្សកាន់អំណាចនេះ អះអាងថានឹងមានអ្នកចូលរួមប្រមាណ១៥ម៉ឺននាក់។

រីឯគណបក្សជំទាស់ដ៏ធំនៅកម្ពុជា គឺគណបក្សសង្គ្រោះជាតិដឹកនាំដោយលោក កឹម សុខា ជាប្រធានគណបក្ស គ្រោងនឹងដឹកនាំមហាជនជាអ្នកគាំទ្រដង្ហែក្បួនឃោសនាថ្ងៃផ្ដាច់ព្រ័ត្រ ឆ្លងកាត់ដងវិថីនានា នៅកណ្ដាលក្រុងភ្នំពេញដោយរំពឹងថាមានអ្នកចូលរួមប្រមាណ១០ម៉ឺននាក់។

ពលរដ្ឋកម្ពុជាចំនួនជិត៨លាននាក់ បានចុះឈ្មោះបោះឆ្នោត។ ការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ចំនួន១១.៥៧២នាក់សម្រាប់ឃុំសង្កាត់ចំនួន១.៦៤៦ ទូទាំងប្រទេស នឹងប្រព្រឹត្តនៅថ្ងៃអាទិត្យ ទី៤ ខែមិថុនាឆ្នាំ២០១៧ខាងមុខនេះ៕ ប្រភព៖ VOA

↧

ប្រភពទឹកក្រោមដីជ្រៅកំពុងប្រឈមនឹងការបាត់បង់

June 1, 2017, 6:38 pm

≫ Next: អាជីវករព្រមផ្អាកលក់គ្រឿងស្រវឹងចំនួន២ថ្ងៃសម្រាប់ការបោះឆ្នោតឃុំ-សង្កាត់

≪ Previous: ពលរដ្ឋកម្ពុជាចង់បានការអភិវឌ្ឍភូមិ-ឃុំ និងការផ្តល់សេវាសាធារណៈប្រសើរជាងមុន ក្រោយការបោះឆ្នោតឃុំ-សង្កាត់

ក្រុមអ្នកស្រាវជ្រាវនិយាយថា ការស្រូបយកទឹកពីប្រភពទឹកក្រោមដីទាំងនេះកំពុងបង្កើតជាបញ្ហាធំមួយ ដែលមិនសូវទទួលការចាប់អារម្មណ៍ច្រើន។

វ៉ាស៊ីនតោន —ផែនដីកំពុងបាត់បង់ប្រភពធនធានទឹកសាបសំខាន់ៗ។ ប៉ុន្តែធនធានទឹកទាំងនេះមិនមែនជា ទឹកបឹងឬទន្លេនោះទេ។ ធនធានទឹកនោះត្រូវបានគេស្គាល់ថាជា ប្រភពទឹកក្រោមដី ហើយត្រូវបានរកឃើញនៅក្រោមដីជ្រៅ។ ប្រភពទឹកខ្លះនៅជ្រៅខ្លាំងរហូតសូម្បីតែភ្លៀងដែលធ្លាក់ខ្លាំងក៏មិនអាចជ្រាបចូលដល់ និងបំពេញប្រភពទាំងនោះបានដែរ។ ប្រភពទឹកក្រោមដីជាច្រើនត្រូវបានគេប្រើដើម្បីស្រោចស្រពដំណាំ ហើយមិនមែនសម្រាប់ការប្រើប្រាស់ក្នុងស្រុកតែប៉ុណ្ណោះទេ ប៉ុន្តែថែមទាំងត្រូវបានគេប្រើប្រាស់សម្រាប់ការប្រើប្រាស់សាកលផងដែរ។ ការសិក្សាថ្មីមួយបានព្រមានថា ប្រភពទឹកទាំងនេះកំពុងតែបាត់បង់ ហើយអាចប៉ះពាល់ដល់សន្ដិសុខស្បៀងនិងសេដ្ឋកិច្ចជុំវិញពិភពលោក។

ស្រូវសាលី អង្ករ ស្ករ កប្បាសនិងពោតគឺស្ថិតក្នុងចំណោមដំណាំជំនួញសំខាន់បំផុត។ ប្រទេសផលិតដំណាំកសិផលមួយចំនួនពឹងផ្អែកលើប្រព័ន្ធធារាសាស្ដ្រដើម្បីដាំដុះ។ ការពិត កសិកម្មបែបធារាសាស្រ្តប្រើប្រាស់ទឹកសាប ប្រមាណ៨០ភាគរយឬច្រើនជាងនេះនៅទូទាំងពិភពលោក។ ការកើនឡើងទំហំនៃការប្រើប្រាស់ទឹកសាបទាំងនេះបានមកពីប្រភពទឹកក្រោមដី ដោយសារមូលហេតុនានា ដូចជាគ្រោះរាំងស្ងួត ឬការដាំដុះនៅក្នុងតំបន់រាំងស្ងួតខ្លាំង ។

ហើយក្រុមអ្នកវិទ្យាសាស្រ្តនិយាយថា បើទោះបីជាមានការចាប់អារម្មណ៍ ក៏មិនមានអ្វីច្រើនដែលពួកគេអាចធ្វើបាន ដើម្បីដោះស្រាយបញ្ហានេះដែរ។

ការសិក្សាស្រាវជ្រាវនេះត្រូវបានធ្វើឡើងដោយសាកលវិទ្យាល័យ College Londonនិងវិទ្យាស្ថាន សិក្សាអំពីអវកាស Goddard នៃអង្គការណាសា (NASA) នៅញូវយ៉ក។

ការសិក្សានេះបានឲ្យដឹងថា ១១ ភាគរយនៃអ្វីដែលគេហៅថា «ទឹកក្រោមដីដែលកំពុងបាត់បង់» ពីប្រភពទឹកក្រោមដី ត្រូវគេប្រើប្រាស់ដើម្បីដាំដុះដំណាំស្បៀងដែលត្រូវជួញដូរជាអន្តរជាតិ។

លោក Michael Puma ដែលជាអ្នកស្រាវជ្រាវវិទ្យាសាស្ត្រនៅអង្គការណាសា និងសាកលវិទ្យាល័យColumbia បានថ្លែងថា៖

«ប្រភពទឹកក្រោមដីគឺលំបាកក្នុងការសង្កេតមើល ដោយសារតែវានៅជ្រៅក្នុងដីខ្លាំង។ ដូច្នេះវាមានការលំបាកក្នុងការសង្កេតមើល និងដឹងថាតើមានទឹកក្រោមដីប៉ុន្មាន ហើយនៅកន្លែងណាខ្លះ‍»។

ប្រភពទឹកក្រោមដី កើតឡើងនៅក្នុងចន្លោះរន្ធក្រោមដី ដូចដែលប្រវត្តិភូគព្ភសាស្ត្ររបស់ផែនដីបានសរសេរ។

«សម្រាប់ការសិក្សានេះយើងពិតជាចាប់អារម្មណ៍ខ្លាំងទៅលើការបង្កើតទ្រង់ទ្រាយជ្រៅឬប្រភពក្រោមដីជ្រៅ ដែលជាកន្លែងមនុស្សបូមទឹកចេញ ហើយមិនត្រូវបានបំពេញទៅវិញ ទោះបីជាមានភ្លៀងធ្លាក់ធំៗក៏ដោយ‍»។

លោកបាននិយាយថា ប្រភពទឹកក្រោមដីទាំងនេះអាចនឹងមិនត្រូវបានបំពេញវិញទេអស់រយៈពេលរាប់រយឆ្នាំឯណោះ។

«ដើម្បីឲ្យប្រភពទឹកក្រោមដីត្រូវបានបំពេញឡើងវិញ ត្រូវមានការប្រែប្រួលធំមួយទៅលើអាកាសធាតុ។ យើងត្រូវការឲ្យមានទឹកច្រើនជាងនេះនៅក្នុងតំបន់ ដែលបច្ចុប្បន្ននេះ កំពុងស្ងួតខ្លាំង‍»។

សហរដ្ឋអាមេរិក ឥណ្ឌា អ៊ីរ៉ង់ ប៉ាគីស្ថាន ចិន ម៉ិកស៊ិក និងអារ៉ាប៊ីសាអ៊ូឌីត ប្រើទឹកក្រោមដី ដែលមិនកើតឡើងវិញ ភាគច្រើនសម្រាប់ផលិតកម្មកសិកម្ម។ សហរដ្ឋអាមេរិកគឺជា ប្រទេសនាំចេញចំណីអាហារចម្បងមួយ។

«ប្រសិនបើសហរដ្ឋអាមេរិកប្រើធនធានទឹកក្រោមដីរបស់ខ្លួនអស់នោះ នេះបង្ហាញពីហានិភ័យមួយទៅលើប្រព័ន្ធស្បៀងអាហារលើសកលលោកទាំងមូល។

ប្រសិនបើអ្នកដកការនាំចេញនេះចេញ បណ្ដាប្រទេសនៅជុំវិញពិភពលោកនឹងរងផលប៉ះពាល់។ ជាឧទាហរណ៍ បច្ចុប្បន្ននេះ ប្រទេសចិននិងឥណ្ឌា ក៏ប្រឈមនឹងការបាត់បង់ទឹកក្រោមដីនៅក្នុងប្រទេសខ្លួនផងដែរ។ ឥឡូវនេះ ប្រទេសទាំងនេះមិននាំចេញអាហារទៅកាន់ប្រទេសផ្សេងទៀតនៅលើពិភពលោកនោះទេ ដូច្នេះប្រទេសទាំងនេះប្រឈមនឹងឱនភាពក្នុងស្រុក ប្រសិនបើប្រភពទឹកក្រោមដីបាត់បង់‍»។

ប៉ុន្តែប្រសិនបើប្រទេសចិននិងឥណ្ឌាបាត់បង់ប្រភពទឹកក្រោមដី ដែលបានប្រើសម្រាប់កសិកម្មក្នុងស្រុក ពួកគេនឹងត្រូវពឹងផ្អែកលើការនាំចូលអាហារកាន់តែច្រើន។ តម្រូវការកាន់តែធំអាចធ្វើឱ្យតម្លៃស្បៀងអាហារពិភពលោកកើនឡើង។

លោក Puma និយាយថា សហរដ្ឋអាមេរិកដឹងច្បាស់ពីការបាត់បង់ទឹកក្រោមដី ដែលនឹងកើតឡើងទៅលើប្រភពផ្តល់ទឹកក្រោមដីជ្រៅមួយចំនួន។

«រដ្ឋកាលីហ្វញ៉ាទទួលស្គាល់ថា ខ្លួនកំពុងជួបប្រទះនឹងការបាត់បង់ទឹកក្រោមដី។ រដ្ឋ Kansasក៏ទទួលស្គាល់ផងដែរថា ខ្លួនកំពុងប្រឈមមុខនឹងបញ្ហាការបាត់បង់ទឹកក្រោមដី។ ទោះជាយ៉ាងណាដំណោះស្រាយនៅមិនទាន់ច្បាស់លាស់នៅឡើយ។ មានការព្យាយាមដើម្បីធ្វើឲ្យការប្រើប្រាស់ទឹកក្រោមដីមានលក្ខណៈយឺតៗជាងមុន ប៉ុន្តែវាមិនអាចដោះស្រាយបញ្ហានោះទេ ដោយសារតែបរិមាណទឹកក្រោមដីមានកំណត់ ហើយដែលនឹងមិនត្រូវបំពេញឡើងវិញ‍»។

ប្រភពទឹកក្រោមដីដ៏ធំបំផុតមួយនៅក្នុងសហរដ្ឋអាមេរិកមានទំហំប្រហែល២៨២.០០០ គីឡូម៉ែត្រការេ ដែលមានឈ្មោះថា Ogallala។ ប្រភពទឹកនេះលាតសន្ធឹងនៅក្នុងផ្នែកខ្លះនៃរដ្ឋចំនួនប្រាំបី ដែលរួមទាំងរដ្ឋ Kansas ផងដែរ។

ការស្ទង់មតិភូគព្ភសាស្ត្ររបស់រដ្ឋ Kansas ដែលបានធ្វើកាលពីរបីឆ្នាំមុនបានប៉ាន់ប្រមាណថាប្រភពទឹកនេះអាចស្ងួតនៅក្នុងរដ្ឋមួយចំនួនក្នុងរយៈពេល៥០ ឆ្នាំខាងមុខ។ ភាគច្រើននៃដីនៅក្នុងរដ្ឋនេះត្រូវបានគេប្រើប្រាស់ដើម្បីដាំស្រូវសាលី ពោត និងដំណាំអាហារផ្សេងៗទៀត។

អ្នកវិទ្យាសាស្ត្រទីភ្នាក់ងារណាសានិយាយថា បច្ចុប្បន្ននេះវាគ្រាន់តែជាបញ្ហានៃការគ្រប់គ្រងអ្វីដែលនៅសេសសល់ប៉ុណ្ណោះ។

«ដើម្បីធ្វើឲ្យមានការរីកចម្រើនពិតប្រាកដចំពោះបញ្ហាទឹកក្រោមដីនេះ យើងត្រូវតែមានការពិភាក្សាអំពីរបៀបថាតើយើងនឹងលៃលកកសិដ្ឋានរបស់យើង និងសកម្មភាពកសិកម្មតាមរបៀបណា ដើម្បីដោះស្រាយជាមួយនឹងអនាគតដែលយើងប្រឈមនឹងស្ថានភាពមួយ ដែលទឹកក្រោមដីលែងមានវត្តមាននៅកន្លែងទាំងនេះតទៅទៀត‍»។

ចុះចំណែកគម្រោងធំដែលចម្រាញ់ជាតិអំបិលចេញពីទឹក ដែលនឹងបម្លែងទឹកសមុទ្រទៅជាទឹកសាបសម្រាប់ការប្រើប្រាស់ផ្នែកកសិកម្ម? លោក Puma បាននិយាយថា គម្រោងនោះថ្លៃខ្លាំងណាស់ហើយនឹងបង្កើនការចំណាយលើទឹកសម្រាប់កសិករ ហើយបន្ទាប់មកបង្កើនតម្លៃម្ហូបអាហារ។

«ប្រសិនបើពួកគេត្រូវបង់ថ្លៃខ្ពស់សម្រាប់ទឹកប្រើប្រាស់របស់ពួកគេ យើងរំពឹងថា កសិករភាគច្រើននឹងមិនមានលទ្ធភាពបន្តការធ្វើកសិកម្មបានទៀតនោះទេ។ ដូច្នេះការយកជាតិអំបិលចេញពីទឹកប្រៃនឹងមានការលំបាកខ្លាំងណាស់ដើម្បីជួយដោះស្រាយបញ្ហានេះ‍»។

ដូច្នេះខណៈពេលដែលប្រទេសជាច្រើនដូចជា ប្រទេសសូម៉ាលីកំពុងជួបគ្រោះរាំងស្ងួត ការសិក្សារបស់ទីភ្នាក់ងារណាសា និងសាកលវិទ្យាល័យ College London ក្នុងទីក្រុងឡុងដ៍ព្រមានថា កំពុងតែមានគ្រោះរាំងស្ងួតនៅក្រោមដីផងដែរ។

«វាគឺពិតជាបញ្ហាសកល។ ប្រទេសទាំងអស់នៅជុំវិញពិភពលោកកំពុងជួបប្រទះនឹងបញ្ហាប្រឈមនេះ។ យើងមិនមានដំណោះស្រាយ ឬយុទ្ធសាស្ត្រល្អៗដើម្បីដោះស្រាយបញ្ហានេះនោះទេ។ ដូច្នេះយ៉ាងហោចណាស់ យើងត្រូវមានការពិភាក្សាគ្នាដើម្បីរកមធ្យោបាយនិងយុទ្ធសាស្រ្តថ្មីផ្សេងៗ ដែលទទួលស្គាល់បញ្ហានេះ ហើយព្យាយាមនិងសម្របសម្រួលពីរបៀបដែលយើងអាចនឹងកែតម្រូវគោលនយោបាយរបស់យើង‍»។

យុទ្ធសាស្ត្រណាក៏ដោយក៏ត្រូវតែរក្សាតុល្យភាពរវាងតម្រូវការផលិតកម្មរយៈពេលខ្លី និងចិរភាព៕ ប្រភព៖ VOA

↧

អាជីវករព្រមផ្អាកលក់គ្រឿងស្រវឹងចំនួន២ថ្ងៃសម្រាប់ការបោះឆ្នោតឃុំ-សង្កាត់

June 1, 2017, 6:55 pm

≫ Next: សកម្មភាពទិញលក់ដីព្រៃឈើទើបកាប់រានថ្មីៗនៅលើកោះរ៉ុងកំពុងកើតមានរាល់ថ្ងៃហើយមានជាប់ពាក់ព័ន្ធអាជ្ញាធររមូលដ្ឋាន

≪ Previous: ប្រភពទឹកក្រោមដីជ្រៅកំពុងប្រឈមនឹងការបាត់បង់

ខណៈការបោះឆ្នោតក្រុមប្រឹក្សាឃុំសង្កាត់ កាន់តែខិតចូលមកដល់ក្រុមអាជីវករ បានយល់ព្រមផ្អាកការលក់គ្រឿងស្រវឹងចំនួន២ថ្ងៃ បន្ទាប់ពីរដ្ឋាភិបាលបានណែនាំឲ្យពលរដ្ឋ និងអាជីវករ ផ្អាកការទទួលទាននិងធ្វើអាជីវកម្មគ្រឿងស្រវឹង ដើម្បីធានាបរិយាកាសបោះឆ្នោតមួយដែលគ្មានហិង្សា និងទំនាស់នានា។

ភ្នំពេញ —ម្ចាស់អាជីវកម្មលក់ដូរគ្រឿងស្រវឹងមួយចំនួនក្នុងក្រុងភ្នំពេញប្រាប់ VOA នៅថ្ងៃព្រហស្បតិ៍នេះថា ពួកគេមិនជំទាស់បម្រាមរបស់រដ្ឋាភិបាល ដែលសុំផ្អាកលក់ដូរ និងពិសាគ្រឿងស្រវឹងមួយថ្ងៃមុនថ្ងៃបោះឆ្នោត និងក្នុងថ្ងៃបោះឆ្នោតជ្រើសក្រុមប្រឹក្សាឃុំ-សង្កាត់នោះទេ។

សេចក្ដីណែនាំរបស់រាជរដ្ឋាភិបាលកម្ពុជាចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃ២៦ ខែឧសភា បានឲ្យដឹងថា ការស្នើឲ្យផ្អាកលក់គ្រឿងស្រវឹងនេះ មានបំណងធ្វើឲ្យដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងរៀបចំធ្វើនៅថ្ងៃទី៤ ខែមិថុនាខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌ គ្មានអំពើហិង្សា គ្មានការគំរាមកំហែង គ្មានការបំភិតបំភ័យ និងបាតុភូតនានា ដែលអាចកើតមានឡើង ដោយសារតែការពិសាគ្រឿងស្រវឹងនោះ។

សេចក្ដីណែនាំដដែល ក៏ស្នើឲ្យពលរដ្ឋខ្មែរផ្អាកពិសាគ្រឿងស្រវឹងផងដែរ។ សេចក្ដីណែនាំបានសរសេរថា៖

«ប្រជាពលរដ្ឋខ្មែរ និងជនបរទេសទាំងអស់ ដែលរស់នៅក្នុងព្រះរាជាណាចក្រកម្ពុជា ត្រូវរួមសហការជាមួយរាជរដ្ឋាភិបាល កងកម្លាំងប្រដាប់អាវុធគ្រប់ប្រភេទ រដ្ឋបាលថ្នាក់ក្រោមជាតិគ្រប់លំដាប់ថ្នាក់ គណៈកម្មាធិការជាតិរៀបចំការបោះឆ្នោត និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ពាណិជ្ជករ និងអាជីវករ ដោយត្រូវផ្អាកការលក់ដូរ និងពិសាគ្រឿងស្រវឹងមួយថ្ងៃ មុនថ្ងៃបោះឆ្នោត និងថ្ងៃបោះឆ្នោត»។

អ្នកលក់ដូរគ្រឿងស្រវឹងនៅរាជធានីភ្នំពេញនិយាយថា ពួកគេនឹងអនុវត្តតាមការណែនាំរបស់អាជ្ញាធរ ដើម្បីញ៉ាំងឲ្យការបោះឆ្នោតប្រព្រឹត្តទៅក្នុងបរិយាកាសមួយដែលមានការយោគយល់គ្នា និងការទទួលខុសត្រូវ។

លោក គីម ពៅ វ័យ ៤៩ឆ្នាំ ជាសាច់ញាតិរបស់ម្ចាស់ហាងលក់គ្រឿងភេសជ្ជៈ និងទឹកស្រវឹង និយាយថា លោកមិនមានការយល់ទាស់នឹងការណែនាំរបស់រដ្ឋាភិបាលនោះទេ។

លោកថ្លែងប្រាប់ VOA យ៉ាងដូច្នេះថា៖

«កាលណាយើងបោះឆ្នោតហើយ ម៉ោងបី ម៉ោងបួន យើងអាចលក់វិញបានហើយ។ អញ្ចឹងដូចជាមិនអីទេ ព្រោះដើម្បីរក្សាសុវត្ថិភាព ទីមួយគឺរក្សាសុវត្ថិភាពលើផ្លូវថ្នល់ផង ព្រោះអ្នកហូបស្រាស្រវឹង។ អញ្ចឹងតាមយោបល់ខ្ញុំមិនអីគឺល្អ ខ្ញុំអាចទទួលយកបាន»។

យ៉ាងណាក៏ដោយ អាជីវករមួយចំនួនទៀត ឬអ្នកបម្រើការក្នុងហាងដែលមានលក់គ្រឿងស្រវឹងនិយាយថា ពួកគេមិនទាន់ទទួលបានការណែនាំពីរាជរដ្ឋាភិបាលសម្រាប់ការផ្អាកលក់គ្រឿងស្រវឹងក្នុងមួយរយៈពេលខ្លីនេះទេ។

បុគ្គលិកអង្គការក្រៅរដ្ឋាភិបាលមួយរូប គឺលោក អឿន ឯម វ័យ ៣៦ឆ្នាំ ប្រាប់ VOA ថា សេចក្ដីណែនាំរបស់រដ្ឋាភិបាលដែលស្នើឲ្យប្រជាពលរដ្ឋខ្មែរផ្អាកផឹកទឹកស្រវឹងមួយថ្ងៃ មុនថ្ងៃបោះឆ្នោត និងក្នុងថ្ងៃបោះឆ្នោត គឺជាផ្នែកមួយដ៏សំខាន់នៃការជំរុញឲ្យការបោះឆ្នោតដំណើរទៅដោយរលូន។

លោកបានអំពាវនាវឲ្យពលរដ្ឋទាំងអស់ត្រូវអត់ធ្មត់មិនទទួលទានទឹកស្រវឹងក្នុងឱកាសបោះឆ្នោតដ៏សំខាន់នេះ។

«មុននឹងជិតចូលការបោះឆ្នោតហ្នឹង ខ្ញុំចង់ឲ្យប្រជាពលរដ្ឋផ្អាកញ៉ាំស្រា ពីព្រោះកាលណាយើងញ៉ាំស្រាទៅវាអាចមានបញ្ហាអសន្តិសុខដល់សង្គមទាំងមូល»។

សេចក្ដីណែនាំរបស់រាជរដ្ឋាភិបាល ក៏បានស្នើដល់ក្រសួង ស្ថាប័ន កងរាជអាវុធហត្ថ កងនគរបាលជាតិ រួមជាមួយរដ្ឋបាលថ្នាក់ក្រោមជាតិគ្រប់លំដាប់ថ្នាក់ ត្រូវធ្វើការបំពាក់បំប៉នដល់មន្ត្រីរាជការក្រោមឱវាទ និងកងកម្លាំងប្រដាប់អាវុធគ្រប់ប្រភេទ និងផ្សព្វផ្សាយ អប់រំណែនាំប្រជាពលរដ្ឋខ្មែរ និងជនបរទេសទាំងអស់ក្នុងមូលដ្ឋានរបស់ខ្លួន អនុវត្តការផ្អាកលក់ដូរ និងពិសាគ្រឿងស្រវឹងផងដែរ។

លោក យង់ គិមអេង នាយកមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លើកឡើងថា ប្រជាពលរដ្ឋខ្មែរ និងម្ចាស់អាជីវកម្មលក់គ្រឿងស្រវឹង ត្រូវចូលរួមអនុវត្តសេចក្ដីណែនាំរបស់រដ្ឋាភិបាល ដែលនឹងជួយទប់ស្កាត់សកម្មភាព ហិង្សា និងទំនាស់នានាមុន និងក្នុងថ្ងៃបោះឆ្នោត។ លោកថា ប្រទេសក្នុងតំបន់អាស៊ានដូចជាថៃ និងហ្វីលីពីន ក៏បានណែនាំឲ្យពលរដ្ឋរបស់គេ ធ្វើដូច្នេះដែរក្នុងរយៈពេលបោះឆ្នោតដ៏សំខាន់នេះ។

«នៅថៃរឹតតែមានការតឹងរ៉ឹងជាងស្រុកខ្មែរទៀតបាទ សូម្បីតែថ្ងៃ មិនបាច់ចាំថ្ងៃបោះឆ្នោតទេ នៅថៃនោះ តែថ្ងៃសីល ថ្ងៃពិសាខបូជាអី គេមិនឲ្យផឹកស្រាផងបាទ។ ហើយនិង បើនៅហ្វីលីពីន ដែលយើងថា នៅក្នុងអាស៊ាននេះ ហ្វីលីពីនស្ដេចផឹកជាងគេបាទ ថ្ងៃបោះឆ្នោត គឺថាស្ងាត់ឈឹង អត់មានឲ្យលក់ អត់មានឲ្យផឹកទេបាទ»។

លោកថា ម្ចាស់អាជីវកម្មលក់គ្រឿងស្រវឹង គួរលះបង់ការខាតបង់របស់ខ្លួនមួយគ្រា ដើម្បីឲ្យការបោះឆ្នោតប្រព្រឹត្តទៅដោយគ្មានជាតិស្រវឹង និងទំនាស់ផ្សេងៗ។

«បើសិនណាមានហិង្សាកើតឡើង ផ្ទុះហិង្សា មានការកើតឡើងរាលដាលធំដុំ ដោយសារតែការផឹកស្រាហ្នឹងគឺ អ្នករកស៊ីហ្នឹង មិនមែនខាតតែមួយថ្ងៃទេ មិនមែនខាតតែមួយថ្ងៃ ពីរថ្ងៃទេ ខាតរាប់ខែណោះ។ អញ្ចឹងគឺរឿងហ្នឹង គឺសំខាន់ណាស់បាទ ដែលអ្នករកស៊ីទាំងអស់ហ្នឹង គឺអ្នកដែលលក់ដូររឿងគ្រឿងស្រវឹងហ្នឹង គាត់ត្រូវតែមានការយល់ពីបញ្ហាហ្នឹងបាទ»។

បន្ថែមលើសេចក្ដីណែនាំឲ្យផ្អាកលក់ និងទទួលទានគ្រឿងស្រវឹងនេះ រដ្ឋាភិបាលរបស់លោក ហ៊ុន សែន ក៏គ្រោងដាក់ពង្រាយកងកម្លាំងប្រដាប់អាវុធ ជាង៥ម៉ឺននាក់សម្រាប់ការពារអំឡុងពេលបោះឆ្នោត និងការរាប់សន្លឹកឆ្នោតនៅថ្ងៃទី៤ ខែមិថុនាផងដែរ។

កងកម្លាំងដែលរួមមាននគរបាលជាតិ កងរាជអាវុធហត្ថ និងកងយោធពលខេមរភូមិន្ទ នឹងត្រូវដាក់ឱ្យឈរជើងតាមការិយាល័យបោះឆ្នោត ដើម្បីការពារស្នាក់ការរបស់គណៈកម្មការរៀបចំការបោះឆ្នោតឃុំសង្កាត់ និងត្រៀមអន្តរាគមន៍តំបន់ភូមិសាស្ត្រក្នុងនិងក្រៅក្រុងស្រុកខណ្ឌ ជាដើម៕ ប្រភព៖ VOA

↧

សកម្មភាពទិញលក់ដីព្រៃឈើទើបកាប់រានថ្មីៗនៅលើកោះរ៉ុងកំពុងកើតមានរាល់ថ្ងៃហើយមានជាប់ពាក់ព័ន្ធអាជ្ញាធររមូលដ្ឋាន

June 2, 2017, 1:48 am

≫ Next: យុវតីវ័យ១៦ឆ្នាំ «បោក» ប៉ូលីសអាមេរិកដល់ទៅរាប់សិបនាក់ និងទទួលបានសំណងជំងឺចិត្តកប់ហ្មង!

≪ Previous: អាជីវករព្រមផ្អាកលក់គ្រឿងស្រវឹងចំនួន២ថ្ងៃសម្រាប់ការបោះឆ្នោតឃុំ-សង្កាត់

សកម្មភាពទិញលក់បរិវេណដីព្រៃឈើធម្មជាតិនៅលើកោះរ៉ុង ក្រុងព្រះសីហនុ ដែលត្រូវប្រជាពលរដ្ឋ ឬឈ្មួញខ្លះបានជួលកម្មករ ឲ្យចូលទៅកាប់រានផ្តួលរំលំដើមឈើធំៗដុតចោល នៅតាមចំណែកក្បាលដីនីមួយ បន្ទាប់ពីត្រូវមន្ត្រីជំនាញក្រសួងរៀបចំដែនដីនគររូបនីយកម្ម និងសំណង់ បានចុះវាស់កំណត់ក្បាលដី ជូនប្រជាពលរដ្ឋ នឹងត្រៀមផ្តល់បណ្ណកម្មសិទ្ធិនាថ្ងៃខាងមុខ បច្ចុប្បន្ននេះ បរិវេណដីព្រៃមានដើមដុះល្អ និងគ្មានមនុស្សរស់នៅទាំងនោះ កំពុងត្រូវបានពុះច្រៀកលក់ដូរបន្តយ៉ាងអនាធិបតេយ្យ។

ចលនានៃការទិញលក់ដីព្រៃទើបកាប់រាន នៅលើកោះរ៉ុងរាល់ថ្ងៃនេះ គឺបុគ្គលដែលអះអាងថា ជាម្ចាស់ដីបរិវេណព្រៃឈើធម្មជាតិទើបកាប់រានថ្មីៗ នៅតាមតំបន់មួយចំនួន ស្ថិតក្នុងភូមិសុខសាន្ត ភូមិកោះតូច ភូមិដើមស្វាយ និងភូមិដើមថ្កូវ។ ហើយភាគច្រើនបំផុត នៃអ្នកមានចំណែកក្បាលដីព្រៃកាប់រានមានទំហំធំ នៅតាមទីតាំងនីមួយៗ ចាប់ពីរាប់សិបហិចតារ ទៅជាង រយហិចតារ គឺជាមន្ត្រីមានតួនាទីកំពុងបំរើការងារ នៅក្រោមឱវាទរដ្ឋបាលខេត្តព្រះសីហនុ និងមន្ត្រីរាជការខ្លះទៀតកំពុងបំរើការងារ នៅក្នុងរដ្ឋបាលសង្កាត់កោះរ៉ុងផ្ទាល់តែម្តង។

ចលនានៃការទិញលក់នេះ កន្លងមកក៏មានបុគ្គលមួយចំនួនបំរើការងារនៅក្នុងរដ្ឋបាលសង្កាត់កោះរ៉ុង ពួកគេបានពុះច្រៀកបរិវេណដីព្រៃធម្មជាតិ ដែលរានកាន់កាប់នោះ លក់ដូរបន្ត ទទួលបានលុយ រាប់សិបម៉ឺនដុល្លារអាមេរិក ក្នុងម្នាក់ៗ កាលពីពេលថ្មីៗនេះ។

ផ្តើមពីបញ្ហានេះ អ្នកឃ្លាំមើលសង្គម នៃអង្កការមិនមែនរដ្ឋាភិបាល បង្ហាញការព្រួយបារម្ភខ្លាចព្រៃឈើធម្មជាតិនៅលើកោះរ៉ុង ដែលត្រូវឃុបឃិតរានកាន់កាប់ធ្វើកម្មសិទ្ធិពីសំណាក់ឈ្មួញ ពលរដ្ឋ និងមន្ត្រីមានអំណាចមួយចំនួននាពេលកន្លងមក អាចនឹងត្រូវរលាយហិនហោច ក្នុងរយៈពេលដ៏ឆាប់។ ព្រោះរាល់ថ្ងៃនេះ គេសង្កេតឃើញមានចលនា នៃការទិញលក់បរិវេណដីព្រៃឈើទើបកាប់រានថ្មីៗ មានសកម្មភាពគួរឲ្យពួយបារម្ភ បើគ្មានការទប់ស្កាត់ពី ប្រមុខដឹកនាំរដ្ឋាភិបាលឲ្យបានទាន់ពេលទេ។

មន្ត្រីសង្គមស៊ីវិល ឲ្យដឹងថា សកម្មភាពកាប់រានដីព្រៃឈើធម្មជាតិ មានដុះដើមល្អៗ និងមានទំហំធំ នៅលើសង្កាត់កោះរ៉ុងជាបន្តបន្ទាប់មកនេះ គឺបានកើតឡើងក្រោយពេល មន្ត្រីជំនាញ នៃក្រសួងរៀបចំដែនដី នគររូបនីយកម្ម និងសំណង់ និងមន្ត្រីស្ថាប័នពាក់ព័ន្ធដ៏ទៃទៀតបានចុះវាស់ចំណែកក្បាលដីជូនប្រជាពលរដ្ឋ ប៉ះចំបរិវេណដីព្រៃឈើធម្មជាតិមានដើមដុះធំៗ។ បច្ចុប្បន្នបរិវេណដីព្រៃដែលមន្ត្រីជំនាញថ្នាក់ជាតិ បានចុះវាស់ចែកជូនពលរដ្ឋភាគច្រើន នៅលើកោះរ៉ុង ត្រូវគេកាប់ព្រៃបំផ្លាញដុតចោល និងបានពុះច្រៀក ប្រកាសលក់ដូរបន្ត មានតម្លៃរាប់ម៉ឺនដុល្លារក្នុងមួយប្លង់ៗ។

សកម្មភាពទិញលក់ដីធ្លី នៅលើកោះរ៉ុង នាពេលបច្ចុប្បន្ននេះ គឺភាគច្រើនកើតមាននៅ ភូមិដើមស្វាយ ភូមិដើមថ្កូវ ភូមិសុខសាន្ត និងភូមិកោះតូច សង្កាត់កោះរ៉ុង ក្រុងព្រះសីហនុ។

សកម្មភាពកាប់បំផ្លាញព្រៃឈើធម្មជាតិរានយកដី និងកំពុងពុះច្រៀកជាឡូៗ លក់ដូរបន្ត ដីព្រៃឈើទើបកាប់រាន រាល់ថ្ងៃនេះ គឺជាប្រភេទដីព្រៃធម្មជាតិមានដើមធំៗ ប៉ុន្តែមិនមានមនុស្ស ឬពលរដ្ឋ សង់ផ្ទះរស់ នៅជាក់ស្តែងជាអចិន្ត្រៃយ៍នោះទេ។ បច្ចុប្បន្នបរិវេណដីព្រៃ ដែលមន្ត្រីជំនាញថ្នាក់ជាតិ បានចុះវាស់វែងតាមក្បាលដីនីមួយៗ តាមការចង្អុលបង្ហាញ របស់ប្រជាពលរដ្ឋទាំងនោះ ត្រូវគេជួលកម្មករ ឲ្យចូលទៅកាប់បំផ្លាញដីព្រៃឈើទាំងនោះដុតបំផ្លាញចោល ហើយពេលនេះម្ចាស់ក្បាលដីភាគច្រើន ពួកគេបានប្រកាសពុះច្រៀកលក់ដូរបន្តមានតម្លៃរាប់ម៉ឺនដុល្លារក្នុងមួយប្លង់ៗ។

ភ្ញៀវទេសចររិះគន់ថា សកម្មភាពកាប់រានដីព្រៃឈើធម្មជាតិ នៅលើកោះរ៉ុងរាល់ថ្ងៃនេះ បើសិនជា លោកនាយករដ្ឋមន្ត្រី ហ៊ុន សែន មិនចេញបទបញ្ជាក្តៅទៅមន្ត្រីក្រសួងស្ថាប័នពាក់ព័ន្ធ មានរដ្ឋបាលខេត្តព្រះសីហនុជាដើម ទប់ស្កាត់ឲ្យមានប្រសិទ្ធភាពទេ នៅពេលដ៏ខ្លីខាងមុខ ព្រៃឈើធម្មជាតិ ដែលនៅសេសសល់លើសង្កាត់កោះរ៉ុង នឹងត្រូវបំផ្លាញអស់គ្មានសល់ ដោយមហិច្ឆិតាល្មោភរបស់មនុស្សមួយចំនួន។

បញ្ហានេះ ក្រុមមន្ត្រីអង្កការក្រៅរដ្ឋាភិបាល និងពលរដ្ឋរស់នៅលើសង្កាត់កោះរ៉ុង ក្រុងព្រះសីហនុ បាន ស្នើដល់ប្រមុខដឹកនាំ ជួយបញ្ជូនមន្ត្រីឯករាជ្យ ឲ្យចុះស៊ើបអង្កេត ទៅលើសកម្មភាពកាប់រានដីព្រៃធម្មជាតិ រានយកដីធ្វើសកម្មសិទ្ធិ ដែលកើតមានអនាធិបតេយ្យ លើសង្កាត់កោះរ៉ុងជាបន្តបន្ទាប់មកនេះ ដើម្បីចង់ដឹងថា តើមានជាប់ពាក់ព័ន្ធជាមួយបុគ្គល ឈ្មួញ ឬមន្ត្រីរាជការថ្នាក់ណាខ្លះ មានឈ្មោះទន្ទ្រានកាន់កាប់ដីព្រៃឈើធម្មជាតិ មានដើមដុះដូចម្រាមដៃដោយជួលកម្មករឲ្យកាប់រាន និងថែមទាំងបានប្រកាសលក់ដីព្រៃធម្មជាតិនេះ បន្តជាបន្តបន្ទាប់មកនេះ ដើម្បីឈានដល់ជួយថែរក្សាអភិរក្សព្រៃឈើធម្មជាតិ ដែលនៅសេសសល់នៅលើកោះរ៉ុង ឲ្យគង់វង្ស សម្រាប់បំរើដល់វិស័យទេសចរណ៍នាថ្ងៃអនាគត៕ ដែន សីមា

↧

យុវតីវ័យ១៦ឆ្នាំ «បោក» ប៉ូលីសអាមេរិកដល់ទៅរាប់សិបនាក់ និងទទួលបានសំណងជំងឺចិត្តកប់ហ្មង!

June 2, 2017, 3:09 am

≫ Next: ដល់ក! យុវជនម្នាក់ត្រូវនារីវ័យក្មេង៣នាក់ចាប់យកទៅរំលោភបូករយៈពេល៣ថ្ងៃ

≪ Previous: សកម្មភាពទិញលក់ដីព្រៃឈើទើបកាប់រានថ្មីៗនៅលើកោះរ៉ុងកំពុងកើតមានរាល់ថ្ងៃហើយមានជាប់ពាក់ព័ន្ធអាជ្ញាធររមូលដ្ឋាន

កាសែតអង់គ្លេស (DM) ទើបចុះផ្សាយរឿងរ៉ាវកក្រើកសាធារណៈមតិអាមេរិក រវាងនារីវ័យ ១៩ ឆ្នាំ ម្នាក់ ជាមួយនាយប៉ូលីសច្រើននាក់ នៅប្រទេសនេះ ។

Jasmin Abuslin

តាមនោះ Jasmin Abuslin (រស់នៅទីក្រុង Oakland, California) ទើបតែឈ្នះក្តី ហើយទទួលបានប្រាក់ជំងឺចិត្ត១លានដុល្លារ ។ សវនាការកាត់ក្តីនេះទើបតែប្រព្រឹត្តទៅថ្ងៃទី៣១ ឧសភា កន្លងមក ។

ដំបូងនារីរូបនេះបានប្តឹងស្នងការប៉ូលីសទីក្រុង Oakland ហើយទាមទារប្រាក់ជំងឺចិត្ត ៦៦ លានដុល្លារ តែនាងទទួលបានត្រឹមតែ ១លានដុល្លារ ប៉ុណ្ណោះ ។

Jasmin Abuslin ឲ្យដឹងថា ខណៈពេលនាងមានអាយុ ១៦ ឆ្នាំ នាងបានរួមដំណេកជាមួយនាយប៉ូលីច្រើននាក់ -ជាក់ស្តែងគឺរហូតដល់ ៣០ នាក់ ។ ប៉ុន្តែ អ្នកទាំងនោះពុំបានដឹងឈ្មោះ ឬ អាយុពិតរបស់នាងទេ ។

នាងបានប្រើឈ្មោះក្លែងក្លាយ គឺ Caleste Guap លាក់អាយុ រួចនិយាយថា នាងជាស្រីលក់ខ្លួន ។ ខណៈពេលនោះ ឪពុករបស់ Jasmin ក៏ជានាយប៉ូលីសមួយរូបដែរ ។

ក្នុងអំឡុង៣ឆ្នាំ កន្លងមក នាងតែងត្រូវបានពួកប៉ូលីសទាំងនោះ បបួលរួមដំណេក រួចសងកម្រៃឲ្យនាង ព្រោះគិតថា នាងប្រកបរបស់ពេស្យាចារមែន ។

ថ្មីៗនេះ Jasmin Abuslin នៅសុខៗក៏ប្តឹងប៉ូលីសទាំង៣០នាក់នោះ ដោយចោទប្រកាន់ពួកគេថា បានចាត់ទុកនាងប្រៀបនឹងទេសករ ដើម្បីបំពេញកាមតណ្ហា ។ ពេលខ្លះ នាងបានត្រូវគេយកទៅដេកក្នុងសណ្ឋាគារ តែក៏មានពេលចាប់បង្ខំនាងឲ្យបំរើផ្លូវភេទលើរថយន្តល្បាតតែម្តង ។

លើសពីនេះ ពួកនាយប៉ូលីសទាំងនេះ នៅបាន «ធ្វើមេអណ្តើក» ឬ ក៏ប្រាប់នាងពីចំណុច «ក្តៅ» ដើម្បីបញ្ចៀសពីការឡោមព័ទ្ធចាប់ខ្លួន ។

នាយប៉ូលីសមួយចំនួនកំពុងរងព្យុះ ព្រោះ «ស្នេហ៍» ក្មេងវ័យ១៦ឆ្នាំ

បណ្តឹងរបស់ Jasmin បណ្តាលឲ្យស្នងការប៉ូលីសទីក្រុង Oakland ពិតជារង «ព្យុះភ្លៀង» ដ៏សាហាវ សូម្បីតែនាយប៉ូលីស «ចូលនិវត្តន៍» ទៅហើយនោះ ក៏ត្រូវបានអូសចេញយកមកកាត់ទោសដែរ ៕

↧

ដល់ក! យុវជនម្នាក់ត្រូវនារីវ័យក្មេង៣នាក់ចាប់យកទៅរំលោភបូករយៈពេល៣ថ្ងៃ

June 2, 2017, 3:41 am

≫ Next: នឹកបងប្រុសដែលស្លាប់, បុរសម្នាក់គាស់ផ្នូរដឹកសពបងដើរលេងជុំវិញក្រុង

≪ Previous: យុវតីវ័យ១៦ឆ្នាំ «បោក» ប៉ូលីសអាមេរិកដល់ទៅរាប់សិបនាក់ និងទទួលបានសំណងជំងឺចិត្តកប់ហ្មង!

យុវជនអាយុ ២៣ ឆ្នាំ ម្នាក់ នៅអាហ្វ្រិកខាងត្បូង បានត្រូវនារី ៣ នាក់ ចាប់ជំរិតយកទៅរំលោភបូក ក្នុងរយៈពេល ៣ ថ្ងៃ ។ ហេតុការណ៍ដ៏កម្រនេះ បានកើតឡើងនៅទីក្រុង Pretoira (អាហ្វ្រិកខាងត្បូង) កាលពីថ្ងៃទី២៦ ឧសភា ។

យុវជនដែលលាក់ឈ្មោះនេះ បានប្រាប់ប៉ូលីសថា នៅថ្ងៃកើតហេតុ គេបានហៅតាក់ស៊ី១គ្រឿង ដើម្បីជិះពីផ្ទះទៅមជ្ឈមណ្ឌលពាណិជ្ជកម្មក្នុងទីក្រុង ។ គេហាក់មានអារម្មណ៍ចម្លែកពេលឃើញនៅលើតាក់ស៊ីនេះមាននារីវ័យក្មេង៣នាក់ តែនៅតែទទួលភ្ញៀវ ។ ទោះបីដូច្នេះ គេក៏នៅតែឡើងជិះតាក់ស៊ីដោយមិនគិតគូរច្រើន ។

ក្រោយពេលតាក់ស៊ីចេញដំណើរបានមួយសន្ទុះ ក៏ស្រាប់តែប្តូរទិសដៅ ចំណែកខ្លួនគេត្រូវនារីទាំងនោះបង្ខំឲ្យអង្គុងលើកៅអីក្បែរអ្នកបើក ។ ភ្លាមៗនោះ នារីម្នាក់ក្នុងចំណោម២នាក់ដែលអង្គុយប៉ែកខាងក្រោយ ស្រាប់តែយកម្ជុលចាក់ចូលខ្លួនគេនូវថ្នាំអ្វីនោះ ធ្វើឲ្យគេសន្លប់បាត់ស្មារតីមួយរំពេច ។ ដល់ពេលភ្ញាក់ដឹងខ្លួន នោះបានឃើញថាខ្លួនត្រូវគេចងជាប់លើគ្រែក្នុងផ្ទះចម្លែកមួយ ។

បន្ទាប់មក នារីទាំង៣បានឲ្យគេផឹកទឹកលើកកម្លាំង និងប្តូរវេនគ្នារួមសិចជាមួយគេច្រើនដង ក្នុងរយៈពេល៣ថ្ងៃជាប់ ។

ក្រោយ៣ថ្ងៃ ត្រូវចាប់ជំរិត រំលោភយ៉ាងឃោរឃៅ, នារីទាំងនោះ បានគ្រវែងយុវជនចោលលើវាលស្រែមួយនៅ Benoni (ចម្ងាយពីរដ្ឋធានី Pretoria ប្រមាណ ៣០ យោជន៍) ក្នុងសភាពននលគោក ។

ប៉ូលីសបានរកឃើញយុវជនដែលបានបាត់ខ្លួន៣ថ្ងៃនេះ និងប្រញាប់បញ្ជូនទៅមន្ទីរពេទ្យ ។ វេជ្ជបណ្ឌិតនិយាយថា ជនរងគ្រោះមានរបួសមួយចំនួននៅប្រដាប់ភេទ ដោយសារត្រូវរំលោភច្រើនដង ។ យុវជននេះក៏ត្រូវរងរបួសស្មារតីធ្ងន់ធ្ងរ ។

ប៉ូលីស Pretoria កំពុងបើកការស៊ើបអង្កេត និងស្វែងរកមុខសញ្ញាបានរំលោភពផ្លូវភេទយុវជនខាងលើ ។

តាមមន្ត្រីតំបន់ម្នាក់ នេះជាករណីរំលោភធ្ងន់ធ្ងរ ហើយមិនថាជនល្មើសជាបុរស ឬ ស្ត្រី ក៏សុទ្ធតែត្រូវដាក់ទោសយ៉ាងម៉ឺងម៉ាត់ ។

តាមស្ថិតិ ហិង្សា និងការំលោភផ្លូវភេទ ជាបញ្ហាមួយគួរប្រកាសអាសន្ន នៅអាហ្វ្រិកខាងត្បូង ដែលទាំងបុរស និងស្ត្រី សុទ្ធតែមានលទ្ធភាពក្លាយជាជនរងគ្រោះ ។ តាមការប៉ាន់ស្មាន ក្នុង១ឆ្នាំៗ នៅប្រទេសនេះ កើតមានជាងកន្លះលានករណីរំលោភត្រូវបានប៉ូលីសកត់ត្រា ។ ក្នុងនោះមានដល់ ២០% ជាបុរស ៕

↧