មិនថាប្រទេសណាទេ តាមដងវិថី យើងអាចក្រឡេកឃើញជនអនាថា ស្មូមចាស់ ស្មូមក្មេង រួមនិង… «ក្តឹបស្មូម» ពិសេសតាមផ្លូវបំបែក ។ មានក្រសែភ្នែកដែលបង្កប់នូវមនោសញ្ចេតនាផ្សេងៗពីគ្នា សម្លឹងលើពួកគេ ។ ចំណែករឿងមួយនេះ ពុំកើតនៅប្រទេសយើងពិត តែបន្សល់ទុកក្តីអាណិតអាសូរជាពន់ពេកក្រៃ ព្រោះតែទោះយ៉ាងណា គេជាមនុស្ស ហើយជាមនុស្សពុំទាន់….ដឹងក្តី ។
ជិតឆ្លងចូលឆ្នាំថ្មី ២០១៧ បណ្តាញសង្គមហ្វីលីពីនពេលនោះ បានរំជើបរំជួល គ្រាឃើញរូបថត២សន្លឹករបស់គណនី Facebook មួយបានបង្ហោះអមជាមួយសំណួរគួរឲ្យខ្លោចផ្សារក្នុងចិត្តពីជីវិតនៃ «ក្លឹបស្មូម»២នាក់ ។
Jon Ringor ជាម្ខាស់គណនីបានឲ្យដឹងថា លោក និងភរិយា កំពុងបរិភោគអាហារចម្អិនស្រាប់ដែលពេញនិយមនៅហ្វីលីពីន ស្រាប់តែឃើញក្មេងប្រុសម្នាក់អាយុប្រមាណ ៣ ទៅ ៤ ឆ្នាំ កំពុងឈរឱបដៃរងារដើម្បីសុំទាន ។ លោកក៏ប្រាប់ភរិយាឲ្យទិញបាយ១ប្រអប់ឲ្យក្មេងនោះ ។ ក្មេងប្រុសទទួលយ៉ាងរហ័ស ហើយរត់យ៉ាងលឿន…. ។ ទង្វើរនេះធ្វើឲ្យលោកងឿងឆ្ងល់ តែក៏ភ្លេចបាត់ទៅ! ។
ពេលបរិភោគអាហាររួច ប្តីប្រពន្ធលោកក៏ដើរចេញទៅ ចៃដន្យលោកចោលភ្នែក ក៏ប្រទះឃើញក្មេងប្រុសស្មូមតូចអម្បាញ់មិញ ។ វាកំពុងអង្គុយក្បែរក្មេងស្រីម្នាក់រាងតូចល្អិតលើផ្ទាំងបេតុងមួយ ។ គាត់គិតថានាងជាប្អូនស្រីរបស់ស្មូមតូចនោះ ។ ប៉ុន្តែ ទង្វើរនសការដួសបាយបញ្ចុកប្អូនដ៏ប្រយ័ត្នប្រយែង និងកែវភ្នែកភ្លឺថ្លារីករាយសុភមង្គល បានធ្វើឲ្យលោក និងភរិយាស្រក់ទឹកភ្នែកដោយពុំដឹងខ្លួន ។
អ្នកទាំង២បានប្រឹងផ្តិតទុករូបភាពនេះ ហើយចែករំលែកលើបណ្តាញសង្គម ។ អមជាមួយចំណងជើង «រូបភាពគួរឲ្យរំភើបចិត្ត វាបណ្តាលឲ្យខ្ញុំស្រក់ទឹកភ្នែក» នោះមានមតិជាច្រើនលើកឡើងថាៈ ខណៈពេលដែលក្មេងៗរាប់ម៉ឺននាក់ត្រូវបានក្រសោបបីបាច់ដ៏ប្រយ័ត្នប្រយែងនោះ នៅមានក្មេងៗដូចក្មេង២នាក់នេះ ។ មនោសញ្ចេតនាបងចំពោះប្អូន ពិតជាកក់ក្តៅមែន! ។ សម្លឹងមើលសញ្ចេតនាបង្ហាញឡើងអមជាមួយកាយវិការលើកស្លាបព្រាបញ្ចុកប្អូន ដឹងថាបងប្រសុស្រឡាញ់ប្អូនស្រីខ្លាំងណាស់!! ៕
