តាមគេហទំព័រ Liveleak បានឲ្យដឹងថា ប៉ូលីស Rockford និយាយថា បុរសជាចោរម្នាក់ឈ្មោះ Laurence Turner អាយុ ៣៤ ឆ្នាំ ត្រូវបានបាញ់សម្លាប់ភ្លាមៗនៅនឹងកន្លែងកើតហេតុ បន្ទាប់ពីប៉ុនប៉ងប្លន់ធនាគារ Alpine កាលពីថ្ងៃសុក្រ កន្លងទៅនេះ ។
ក្រុមអ្នកស៊ើបអង្កេត ក៏បានឲ្យដឹងថា Turner បានចុះពីរថយន្តរបស់ខ្លួន និងឡើងដើរចូលក្នុងការិយាល័យធនាគារ ហើយភ្លាមៗនោះបានដកកាំភ្លើងខ្លីបាញ់សំដៅពិដាន ។ Turner បន្ទាប់មក បានបាញ់សំដៅសន្តិសុខវ័យចំណាស់ម្នាក់ ដែលកំពុងឈរនិយាយជជែកគ្នាលេងជាមួយបុគ្គលិកធនាគារ ។ ដោយភាពរហ័សរហួនក្នុងនាមជាអ្នកការពារ, សន្តិសុខរូបនោះ ក៏បានដកកាំភ្លើងខ្លីពីចង្កេះ បាញ់តបតជាមួយចោរនោះវិញភ្លាមៗ ដោយគ្មានខ្លាចញញើតសូម្បីបន្តិចឡើយ ។
Turner ក្រោយមក ត្រូវបានប្រកាសថាបានស្លាប់នៅនឹងកន្លែងកើតហេតុ ។ យ៉ាងណាមិញ ក្នុងហេតុការណ៍បាញ់តដៃគ្នារវាងចោរប្លន់ និងសន្តិសុខដ៏ញាក់សាច់នេះផងដែរ ពុំមានបុគ្គលិកណាម្នាក់រងរបួសនោះទេ ។
អាជ្ញាធរជឿថា Turner អាចជាប់ពាក់ព័ន្ធក្នុងករណីប្លន់ស្រដៀងគ្នានេះ នៅតំបន់ Rockford កាលពីពីរបីខែមុន ៕
