មន្ត្រីគណបក្សសង្គោះជាតិ ប្រចាំខេត្តព្រះសីហនុ បានឲ្យដឹងថា នៅរសៀលម៉ោង ៣ ថ្ងៃពុធ ទី២៨ ខែមិថុនានេះ សាលាដំបូងខេត្តព្រះសីហនុ នឹងបើក សវនា លោក ឆាយ រដ្ឋ ចៅសង្កាត់រងទី២ នៃសង្កាត់ទី១ ក្រុងព្រះសីហនុ មកពីគណបក្សសម រង្សី ជាប់ឆ្នោតកាលពីអាណត្តិបោះឆ្នោតអាណត្តិទី៣ ដែលសមត្ថកិច្ចចាប់ទៅឃុំខ្លួន ក្នុងពន្ធនាគារខេត្តព្រះសីហនុ កាលពីព្រឹកថ្ងៃទី២៧ ខែមិថុនា។
លោក ឆាយ រដ្ឋ មន្ត្រីមូលដ្ឋានសង្កាត់លេខ១ នៃគណបក្សសម រង្សី ដែលបច្ចុប្បន្នបានរួបរួមគ្នាជាគណបក្សសង្គ្រោះជាតិ ត្រូវនគរបាលព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ ចាប់ខ្លួនបញ្ជូនទៅដាក់ក្នុងពន្ធនាគារភ្លាមៗ បន្ទាប់ពីជនសង្ស័យរូបនេះ បានខកខានចូលខ្លួន តាមដីកា របស់សាលាដំបូងខេត្តព្រះសីហនុ។
សមត្ថកិច្ចនគរបាល អោយដឹងថា លោក ឆាយ រដ្ឋ ត្រូវបាននគរបាលព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ ចាប់ខ្លួន កាលពីព្រឹកថ្ងៃទី២៧ ខែមិថុនា ឆ្នាំ២០១៧ នៅហាងកាហ្វេក្បែរផ្សារលើ ក្រុងព្រះសីហនុ តាមដីកាបង្កាប់ឲ្យចាប់ខ្លួន របស់សាលាដំបូងខេត្តព្រះសីហនុ មានចុះហត្ថលេខា លោក ប្លុង វិសាល ចៅក្រមស៊ើបសួរសាលាដំបូងខេត្តព្រះសីហនុ។
សមត្ថកិច្ចបញ្ជាក់ថា លោក ឆាយ រដ្ឋ ដែលមានទីលំនៅក្នុងភូមិ១ សង្កាត់លេខ១ ក្រុងព្រះសីហនុ មានតម្រុយពិរុទ្ធភាព ពាក់ព័ន្ធការចោទប្រកាន់ពីបទញុះញុង ឲ្យប្រព្រឹត្តិបទឧក្រិដ្ឋជាអាទិ៍ប្រព្រឹត្តនៅចំណុចក្រុមទី១៨ ភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ កាលពីថ្ងៃទី២០ ខែកញ្ញា ឆ្នាំ២០១៦។
សំណុំរឿង របស់ លោក ឆាយ រដ្ឋ បើសិនជាតុលាការ រកឃើញកំហុសឆ្គង អាចនឹងត្រូវបានផ្តន្ទាទោសតាមមាត្រា ៤៩៤ និង៤៩៥ នៃក្រមព្រហ្មទណ្ឌ ដែលអាចផ្តន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល។
បើតាមការអះអាងពី លោក ជួន ណារិន្ទ ស្នងការនគរបាលខេត្តព្រះសីហនុ បានអោយដឹងថា តាមដីកាបង្គាប់អោយចាប់ខ្លួនឃុំខ្លួន លោក ឆាយ រដ្ឋ របស់សាលាដំបូងខេត្តនេះ គឺជនសង្ស័យរូបនេះ មានជាប់ពាក់ពន្ធ័បទញុះញង់អោយប្រជាពលរដ្ឋ អោយចូលទៅទន្ទ្រានកាន់កាប់ដីព្រៃរដ្ឋហាមឃាត់ ឬចូលទៅកាប់បំផ្លាញដើមកាស្យា ដែលរដ្ឋរក្សាទុញសម្រាប់ប្រភពទឹកស្អាតនៅតំបន់ក្បាលឆាយ មានទីតាំងនៅក្នុងសង្កាត់លេខ១ ក្រុង-ខេត្តព្រះសីហនុនាពេលកន្លងទៅ៕ ជួប ស្ថាបនា
