រាជរដ្ឋាភិបាលកម្ពុជា បានបើកសម្ពោធជើងហោះហើរត្រង់ ពីទីក្រុងវ៉ូស៊ី ខេត្តជាំងស៊ូ ប្រទេសចិន ឆ្ពោះមកខេត្តព្រះសីហនុ កាលពីថ្ងៃអាទិត្យ ទី២៥ ខែមិថុនា ឆ្នាំ២០១៧ ដោយរំពឹងថា នឹងអាចជម្រុញអោយការធ្វើទំនាក់ទំនងសេដ្ឋកិច្ចប្រទេសទាំងពីរ បានប្រសើរឡើងថែមទៀត។ ជាងនេះ ក៏នឹងអាចជម្រុញអោយកំណើនភ្ញៀវទេសចរជនជាតិចិនកើនច្រើនថែមទៀតនាបណ្តាឆ្នាំខាងមុខ។
លោក យន្ត មីន អភិបាលខេត្តព្រះសីហនុ មានប្រសាសន៍ក្នុងពិធីសម្ភោធនោះថា ការបើកជើងហោះហើរត្រង់ ពីព្រលានយន្តហោះអន្តរជាតិខេត្ត ព្រះសីហនុ នៃព្រះរាជាណាចក្រកម្ពុជា ទៅកាន់ទីក្រុងវ៉ូស៊ី ខេត្តជាំងស៊ូ នៃសាធារណៈរដ្ឋប្រជាមានិតចិន ដោយក្រុមហ៊ុនអាកាសចរ Sky Angkor AirLine(ស្ដាយ អង្គរអ៊ែឡាញ់) នាឱកាសនេះ គឺជាគំនិតផ្ដួចផ្ដើមរបស់លោកផ្ទាល់ បន្ទាប់ពីរូបលោកបានជួបពិភាក្សាជាមួយ លោកអភិបាលខេត្តជាំងស៊ូ លោកអភិបាលក្រុងវ៉ូស៊ី និងលោកអគ្គនាយកក្រុមហ៊ុន ហុងដូគ្រុប។
លោក យន្ត មីន អោយដឹងទៀតថា ការឈានដល់ខេត្តព្រះសីហនុ និងជី អាចបើកជើងយន្តហោះហើរ នៅពេលរូបលោកបាន អញ្ជើញទៅបំពេញ ទស្សនៈកិច្ចជាផ្លូវការនៅខេត្តជាំងស៊ូ នៃសាធារណៈរដ្ឋប្រជាមានិត កាលពីប៉ុន្មានខែមុននេះ។ លោក យន្ត មីន អោយដឹងបែបនេះនាឱកាស អញ្ជើញជាអធិបតីក្នុងពិធីសម្ពោធបើកជើងហោះហើរត្រង់ ពីខេត្តព្រះសីហនុនៃព្រះរាជាណាចក្រកម្ពុជា ទៅកាន់ទីក្រុងវ៉ូស៊ី ខេត្តជាំងស៊ូនៃប្រទេសចិន ដែលបានប្រារព្វធ្វើឡើងនៅព្រលានយន្តហោះអន្តរជាតិខេត្តព្រះសីហនុ កាលពីព្រឹកថ្ងៃទី២៥ ខែមិថុនា ឆ្នាំ២០១៧។
លោក យន្ត មីន បញ្ជាក់ថា ការបើកជើងហោះហើរនាឱកាសនេះ គឺជាការឆ្លើយតបការអនុវត្តយុទ្ធសាស្ត្រ”ខ្សែក្រវ៉ាត់មួយផ្លូវមួយ” របស់ប្រធានាធិបតីចិន ស៊ីជិនពីង ក្នុងក្របខណ្ឌកិច្ចសហប្រតិបត្តិការ រវាងរាជរដ្ឋាភិបាលកម្ពុជា និងសាធារណៈរដ្ឋប្រជាមានិតចិន។
លោកអភិបាលខេត្តព្រះសីហនុ ថ្លែងថា ការសាក់សម្ភោធជើងហោះហើរចិនកម្ពុជាពេលនេះ គឺជាការឆ្លើយតប គោលនយោបាយ របស់កម្ពុជា ចាត់ទុក ឬដាក់ខេត្តព្រះសីហនុ ក្នុងទិសដៅអភិវឌ្ឍន៍អោយក្លាយទៅជា “តំបន់សេដ្ឋកិច្ចពិសេសគំរូពហុបំណង” តាមរយៈការបើកជើងហោះហើរទៅមករវាងខេត្តទាំងពីរ កម្ពុជាចិន ប្រយោជន៍ដើម្បីជម្រុញជាកាលានុវត្តភាពថ្មីមួយទៀត ស្របកិច្ចសហប្រតិបត្តការលើគ្រប់វិស័យ ទំនាក់ទំនងពាណិជ្ជកម្ម ទេសចរណ៍ ការអប់រំសិក្សាធិការ និងវប្បធ៌ម អោយកាន់តែល្អប្រសើរ និងផ្ដល់ផលប្រយោជន៍អោយគ្នាទៅវិញទៅមក រវាងប្រទេសទាំងពីរកម្ពុជាចិន។
ទន្ទឹមគ្នានោះ លោក យន្ត មីន ក៍បានបញ្ជាក់ថា បច្ចុប្បន្ននេះ រដ្ឋបាលខេត្តព្រះសីហនុ កំពង់ធ្វើការអភិវឌ្ឍន៍ហេដ្ឋារចនាសម្ព័ន្ធនានាជាច្រើន នាមូលដ្ឋានខេត្តទេសចរណ៍មួយនេះអោយបានច្រើនថែមទៀត ឬឈានដល់សហការណ៍គ្នាជាមួយវិស័យឯកជន អភិវឌ្ឍន៍ពង្រីក រម្មណីយដ្ឋានតាមបែបសម័យទំនើបកម្ម និងរៀបចំតំបន់អេកូ ទេសចរណ៍ ធម្មជាតិ នៅតាមបណ្ដាកោះ ដើម្បីត្រៀមទទួលភ្ញៀវទេសចរជាតិនិងអន្តរជាតិ ដោយនឹងពង្រីកការផ្សព្វផ្សាយអោយបានទូលំទូលាយថែមទៀតនាថ្ងៃអនាគត៕ ជួប ស្ថាបនា
