តំណាងប្រជាពលរដ្ឋចំ រស់នៅតំបន់ពយជប៉ុន ឃុំកោះស្តេច ស្រុកគិរីសាគរ ខេត្តកោះកុង ចំនួន ៤គ្រួសារ នៅថ្ងៃសៅរ៍ ទី២៤ ខែមិថុនា ឆ្នាំ២០១៧ បានចោទក្រុមក្រុមហ៊ុនចិនឈ្មោះ យូញៀនឌីវីឡុបម៉ិនគ្រុប ឬហៅកាត់ថា យូឌីជី (Union Development Group Co.,Ltd) ដែលទទួលបានសិទ្ធិវិនិយោគវិស័យទេសចរ តំបន់ឆ្នេរនាមូលដ្ឋាននេះ ពីរាជរដ្ឋាភិបាលកម្ពុជា ថាបានធ្វើរបងហ៊ុំព័ទ្ធបិទផ្លូវ មិនឲ្យពលរដ្ឋចេញចូលទៅលំនៅឋាន ឲ្យបានទូលំទូលាយដូចមុនទៀតទេ។
តំណាងពលរដ្ឋចំនួន ៤គ្រួសារ រស់នៅភូមិព្រែកស្មាច់ ឃុំកោះស្តេច ស្រុកគិរីសាគរ ខេត្តកោះកុង ដែលមានទំនាស់ជាមួយក្រុមហ៊ុនចិន យូឌីជី បានសំណូមពរដល់ លោកនាយករដ្ឋមន្ត្រី ហ៊ុន សែន ជួយអន្តរាគមន៍ទៅ ក្រុមហ៊ុនចិនយូញៀនឌីវីឡុបម៉ិន ឲ្យបើកបងហ៊ុំព័ទ្ធបិទផ្លូវចេញចូលផ្ទះពួកគាត់ ឲ្យបានទូលំទូលាយដូចពេលមុនវិញ។
បន្ថែមលើនេះ ក៏ស្នើឲ្យជួយសម្របសម្រួលដោះស្រាយជម្លោះដីធ្លី ជូនពួកគាត់ទាំង ៤គ្រួសារ ជាមួយក្រុមហ៊ុនចិនយូឌីជី ដែលទទួលបានសិទ្ធិអភិវឌ្ឍគម្រោងទីក្រុងទេសចរណ៍ ហើយតែងប្រើអំណាចមកគំរាមកំហែងមកលើពួកគាត់តាមគ្រប់រូបភាពកន្លងមក ដើម្បីបង្ខំឲ្យចាកចេញពីលំនៅឋាន ទាំងមិនទាន់មានដំណោះស្រាយ ឲ្យបានសមរម្យជូនពួកគាត់។
តំណាងពលរដ្ឋ ៤គ្រួសារ ដែលមានជម្លោះដីធ្លី ជាមួយក្រុមហ៊ុនចិន យូឌីជី បានអះអាងថា កន្លងមកជម្លោះនេះ អាជ្ញាធរឃុំកោះស្តេច និងអភិបាលស្រុកគីរីសាគរ លោក ឃឹម ចាន់ឌីជាដើម គឺមិនបានជួយដោះស្រាយទំនាស់ដីធ្លី ជូនពលរដ្ឋទេ ហើយងាកទៅគាំទ្រសកម្មភាពក្រុមហ៊ុនចិនទៅវិញ។
តំណាពលរដ្ឋ ឲ្យដឹងទៀតថា រាល់ថ្ងៃនេះ ក្រុមហ៊ុនចិនយូឌីជី បានធ្វើរបងហ៊ុំព័ទ្ធបិទផ្លូវចូលទៅផ្ទះពួកគាត់ ដោយទុកតែច្រកមួយទេ។ ហើយថា រាល់ការចេញចូលទៅផ្ទះ របស់ពលរដ្ឋ ៤គ្រួសារ នៅចំណុចពយជប៉ុន ទាល់តែមានការអនុញាតិ ពីកម្លាំងសន្តិសុខក្រុមហ៊ុន និងកម្លាំងកងរាជអាវុធហត្ថ ដែលក្រុមហ៊ុនចិន បានជួលមកយាមក្រុមហ៊ុននេះ ទើបអាចឆ្លងកាត់របងទើបហ៊ុំព័ទ្ធថ្មីៗនេះបាន។
តំណាងពលរដ្ឋ ៤គ្រួសារ រស់នៅភូមិព្រែកស្មាច់ ឃុំកោះស្តេច ស្រុកគីរីសាគរ បានសំណូមពរ ឲ្យលោកស្រី មិថុនា ភូថង អភិបាលខេត្តកោះកុង ដែលទើបទទួលបានតំណែងថ្មី ស្នើឲ្យជួយអន្តរាគមន៍ដោះស្រាយជម្លោះដីធ្លី ជូនពលរដ្ឋ ដែលនៅសេសសល់ ៤គ្រួសារ ឲ្យបញ្ចប់ជម្លោះដីធ្លីនៅមូលដ្ឋាននេះ ជាមួយក្រុមហ៊ុនចិនយូឌីជី ឲ្យបានឆាប់ផង។
ទាក់ទិនជម្លោះដីធ្លីនេះ លោក អ៊ិន គង់ជិត អ្នកសម្របសម្រួលអង្គការលីកាដូ (Licadho) និង លោក ញៀប សំអឿន អ្នកសម្របសម្រួលសមាគមអាដហុក (Adhoc) ប្រចាំខេត្តកោះកុង ដែលតាមអង្កេតវិវាទដីធ្លី រវាងពលរដ្ឋ ៤គ្រួសារ នៅចំណុចពយជប៉ុន ឃុំកោះស្តេច មានជម្លោះជាមួយក្រុមហ៊ុនចិនយូឌីជី បានទទូចដល់ លោកនាយករដ្ឋមន្ត្រី ហ៊ុន សែន និងថ្នាក់ដឹកនាំក្រសួងស្ថាប័នជំនាញពាក់ព័ន្ធដទៃទៀត ឲ្យ ជួយសម្របសម្រួលជាមួយក្រុមហ៊ុនចិន ឈានដលបញ្ចប់ដោះស្រាយជម្លោះដីធ្លីនាមូលដ្ឋានេះចប់ឲ្យបានឆាប់។
ទន្ទឹមគ្នានេះ មន្ត្រីអង្គការលីកាដូ និងសមាគមអាដហុក ប្រចាំខេត្តកោះកុង ក៏ស្នើឲ្យលោកស្រី មិថុនា ភូថង ដែលទើបចូលកាន់តំណែងអភិបាលខេត្តកោះកុងថ្មី ជួយពិនិត្យទៅលើសកម្មភាព របស់កម្លាំងសមត្ថកិច្ច នៅតាមស្ថាប័នខ្លះ ដែលត្រូវក្រុមហ៊ុនចិនយូឌីជី ជួលមកការពារឲ្យក្រុមហ៊ុន ស្នើជួយ បញ្ឈប់សកម្មភាពគំរាមកំហែងមកលើប្រជាពលរដ្ឋ ដែលមានទំនាស់ដីធ្លីជាមួយក្រុមហ៊ុនចិនយូឌីជីជាបន្តទៀតនោះទេ។
អភិបាលខេត្តកោះកុង លោកស្រី មិថុនា ភូថង មានប្រសាសន៍ថា នឹងឲ្យមន្ត្រីក្រោមឱវាទ ចុះពិនិត្យទំនាស់ដីធ្លី រវាងពលរដ្ឋ ៤គ្រួសារ មានជម្លោះជាមួយក្រុមហ៊ុនចិនយូឌីជី នៅចំណុចពយជប៉ុន ភូមិព្រែកស្មាច់ ឃុំកោះស្តេច ដើម្បីឈានទៅសម្របសម្រួលបញ្ចប់ជម្លោះនាថ្ងៃខាងមុខ។
ទោះយ៉ាងណា លោកស្រី អភិបាលខេត្តកោះកុង ស្នើសុំពេលវេលា ដើម្បីពិនិត្យឯកសារពាក់ព័ន្ធ ជម្លោះដីធ្លី រវាងប្រជាពលរដ្ឋ ៤គ្រួសារ ជាមួយក្រុមហ៊ុនយូឌីជី ឲ្យបានច្បាស់ជាមុនសិន ទើបអាចឈានទៅរកដំណោះស្រាយពេលក្រោយ ព្រោះលោកស្រី ទើបចូលកាន់តំណែងជាអភិបាលខេត្តកោះកុង មិនទាន់បានមួយថ្ងៃផងទេ ព្រោះទើបចូលដឹកនាំខេត្តនេះ កាលពីថ្ងៃសុក្រ ទី២៣ ខែមិថុនានេះទេ។
ឯកសារខ្លះ បង្ហាញថា ក្រុមហ៊ុនយូញៀនឌីវីឡុបម៉ិនគ្រុប ឬហៅកាត់យូឌីជី (Union Development Group Co.,Ltd) ដែលមានជម្លោះដីធ្លីជាមួយពលរដ្ឋ ៤គ្រួសារ នៅភូមិព្រែកស្មាច់ ឃុំកោះស្តេច គឺក្រុមហ៊ុននេះទទួលបានដីសម្បទានសេដ្ឋកិច្ច ពីរាជរដ្ឋាភិបាល មានទំហំផ្ទៃដី ៣ម៉ឺន ៦ពាន់ហិចតារ (៣៦ ០០០) សម្រាប់អភិវឌ្ឍគម្រោងទីក្រុងទេសចរណ៍នៅតាមឆ្នេរសមុទ្រ ក្នុងស្រុកបុទុមសាគរ និងស្រុកគីរីសាគរ ខេត្តកោះកុង កាលពីឆ្នាំ ២០០៨៕ ស្ថាបនា
