… ៦ខែកន្លងមកហើយ ដែលនាង Lisa Ohrmundt នៅរដ្ឋ Georgia អាមេរិក តែងឮស្នូរចម្លែករាល់ពេលនាងចូលដល់បន្ទប់ទទួលភ្ញៀវនៃគេហដ្ឋានរបស់ខ្លួន ។ នាងក៏ធ្លាប់គិតថា វាជាសម្លេងឃ្មុំហើរក្បែរៗផ្ទះ ទើបពុំរវីរវល់ ។ ប៉ុន្តែ សម្លេងឃ្មុំពី១ថ្ងៃទៅ១ថ្ងៃ កាន់តែខ្លាំងឡើង ទ្រាំលែងបានក៏បបួលមិត្តភក្តិម្នាក់ដែលជាអ្នកចិញ្ចឹមឃ្មុំមកជួយពិនិត្យមើល ។
មិត្តរបស់ Lisa បានប្រើប្រាស់ឧបករណ៍រាវរកពិសេសម្យ៉ាង អាចកំណត់បានទីតាំងនៃស្នូរសម្លេង ។ ចុងក្រោយដឹងថា វាបញ្ចេញពីលើពិដានបន្ទប់ទទួលភ្ញៀវ! ហើយដឹងថាមានឃ្មុំប្រមាណ ១២០.០០០ ក្បាលទៅហើយ ដែលបាន «ផ្ទេរ» លំនៅដ្ឋានមកកាន់ផ្ទះរបស់ Lisa ។
នេះពិតជា «របកគំហើញ» ដ៏គួរឲ្យស្លុតអារម្មណ៍ តែបាននាំមកនូវលទ្ធផលដ៏ «ផ្អែមល្ហែម» ព្រោះថា ហ្វូងឃ្មុំនេះផលិតបានទឹកឃ្មុំដល់ទៅ ៧០ គ.ក្រ ឯណោះ ។
ទោះបីភ្លក់សាកឃើញវាពិតជាឆ្ងាញ់ពិសារមែន តែនាងពុំមានបំណងនឹងចិញ្ចឹមឃ្មុំក្នុងផ្ទះឡើយ! ។ ហេតុនេះ មិត្តភក្តិរបស់នាងបាន «ដឹកជញ្ជូន» លំនៅដ្ឋានរបស់ហ្វូងឃ្មុំនេះទៅកាន់ទីផ្សេងយ៉ាងម៉ត់ចត់ ។
ប្រាកដណាស់! ពីនេះតទៅ នាងនឹងពុំរំលងចោលស្នូរសម្លេងចម្លែកអ្វីទៀតទេ! ៕
