យាន Curiosity របស់អង្គការ NASA កំពុងឡើងភ្នំខ្ពស់មួយនៅភពអង្គារ ទោះជាមានបញ្ហាផ្នែកកង់

(អវកាស)៖ យានធ្វើដំណើរលើដី Curiosity របស់អង្គការ NASA ដែលបាននិងកំពុងបំពេញ បេសកកម្មនៅភពអង្គារ អស់រយៈពេលបួនឆ្នាំមកនេះ កំពុងតែធ្វើដំណើរឡើងភ្នំដ៏ខ្ពស់មួយ នៅលើផ្ទៃភពក្រហមនោះ បើទោះបីជាវាមានបញ្ហាផ្នែកកង់របស់វា ដែលមានចំនួន០៦ នោះក៏ដោយ។ នេះបើតាមការ ចេញផ្សាយរបស់ Space.com នៅថ្ងៃពុធ ទី០៤ ខែឧសភា ឆ្នាំ២០១៦។

យាន Curiosity ដែលមានទំហំប៉ុនកូនឡានមួយនោះ ក៏ធ្លាប់ធ្វើការរុករកក្បែរភ្នំមួយឈ្មោះថា Sharp កម្ពស់ ៥ គីឡូម៉ែត្រផងដែរនៅលើផ្ទៃភពអង្គារ កាលពីខែកញ្ញា ឆ្នាំ២០១៤។ ការឡើងភ្នំលើក នេះគឺស្ថិតនៅក្នុងគោលដៅស្វែងរក ជីវិតដែលអាចកើតមានក្នុងទម្រង់ណាមួយ កាលពីអតីតកាល នៅផ្ទៃភពអង្គារ ដែលជាភពទីបួន នៅក្នុងប្រព័ន្ធព្រះអាទិត្យយើងនេះ។

គួរបញ្ជាក់ថាយាន Curiosity ត្រូវបានគេបាញ់បង្ហោះចេញពីផែនដី នឹងធ្វើការចុះចតដោយជោគ ជ័យលើផ្ទៃភពអង្គារ កាលពីខែសីហា ឆ្នាំ២០១២។ យាននេះមានតួនាទីស្វែងរកប្រភពនៃជីវិត និង រូបធាតុនានា ដែលអាចកើតមានកាលពីអតីតកាលលើភពអង្គារ។ សម្រាប់លទ្ធផលដ៏គាប់ ប្រសើរបំផុតសម្រាប់ការរុកភពអង្គារ កន្លងមកនេះ គឺការរកឃើញទឹកលើផ្ទៃភពនេះកាលពីឆ្នាំ ២០១៥ ដែលហេតុនាំឲ្យ ការវិភាគកន្លងមកថាភពអង្គារអាចធ្លាប់មានជីវិត ឬ បរិយាកាស ស្រដៀងនឹងផែនដីនោះ គឺជារឿងត្រឹមត្រូវ៕

ប្រភពៈ freshnewsasia