១០ថ្ងៃមុនពេលលោកប្រធានាធិបតីសហរដ្ឋអាមេរិក បារ៉ាក់ អូបាម៉ា ចាកចេញពីសេតវិមានហើយក្លាយជាពលរដ្ឋធម្មតា លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានធ្វើសុន្ទរកថាលាចេញពីតំណែងទៅកាន់ប្រទេសជាតិ។ លោកប្រធានាធិបតី បានប្រើប្រាស់សុន្ទរកថាកាលពីយប់ថ្ងៃអង្គារដើម្បីសង្កត់ពីសមទ្ធិផលរបស់រដ្ឋបាលលោកក្នុងរយៈពេល៨ឆ្នាំកន្លងមកនេះ ហើយដើម្បីព្រមានអំពីភាពគ្រោះថ្នាក់ដល់លទ្ធិប្រជាធិបតេយ្យអាមេរិកមកពីការបែកបាក់ ហើយនិងការប្រទូស្តរាយខាងនយោបាយ។
វ៉ាស៊ីនតោន —លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ទទួលការស្វាគមន៍ និងការសាទរ ពីហ្វូងមនុស្សដ៏ធំមួយនៅក្នុងទីក្រុងកំណើតទី២របស់លោកក្នុងក្រុងឈីកាហ្គោដែលនៅទីនោះអាជីពនយោបាយរបស់លោកបានចាប់ផ្តើមកាលពីជាង២ទសវត្សរ៍មុន។
«វាជាការល្អដែលបានស្ថិតនៅស្រុកកំណើតវិញ។ អរគុណ»។
លោកប្រធានាធិបតីបានមានប្រសាសន៍ថា សហរដ្ឋអាមេរិក ជាប្រទេសកាន់តែប្រសើរឡើង និងកាន់តែខ្លាំងឡើងជាងពេលលោកចូលកាន់តំណែងនៅឆ្នាំ២០០៩។
«ប្រសិនបើ ខ្ញុំបានប្រាប់អស់លោក អ្នកកាលពី៨ឆ្នាំមុនថា ប្រទេសអាមេរិក នឹងធ្វើការផ្លាស់ប្តូរការមិនរីកចម្រើនសេដ្ឋកិច្ចដ៏ធំមួយ ធ្វើឲ្យឧស្សាហកម្មរថយន្តរបស់យើងមានដំណើរការឡើងវិញ ហើយនិងបង្កើតការងារដ៏ច្រើនបំផុតនៅក្នុងប្រវត្តិសាស្រ្តនៃប្រទេសរបស់យើង។ ប្រសិនបើខ្ញុំប្រាប់លោក អ្នកថា យើងនឹងបើកទំព័រប្រវត្តិសាស្រ្តថ្មីជាមួយប្រជាពលរដ្ឋគុយបា បញ្ចប់កម្មវិធីអាវុធនុយក្លេអ៊ែររបស់ប្រទេសអ៊ីរ៉ង់ដោយគ្មានបាញ់គ្រាប់កាំភ្លើងមួយគ្រាប់ ហើយនិងកំចាត់មេក្លោងនៃការវាយប្រហារថ្ងៃទី១១ ខែកញ្ញា ឆ្នាំ២០០១ ប្រសិនបើខ្ញុំប្រាប់អស់លោក អ្នកថា យើងនឹងធ្វើឲ្យមានសមភាពខាងការរៀបការ ហើយការពារសិទ្ធិដើម្បីឲ្យមានការធានារ៉ាប់រងខាងសុខភាពសម្រាប់ពលរដ្ឋរបស់យើង២០លាននាក់ អស់លោក អ្នក ប្រហែលនិយាយថា ចក្ខុវិស័យរបស់យើងបានត្រូវកំណត់ខ្ពស់បន្តិច»។
ដោយទទួលស្គាល់ពីការបែងចែកខាងនយោបាយនៅពេលបច្ចុប្បន្ននេះនៅក្នុងប្រទេស លោកប្រធានាធិបតីអូបាម៉ា បានជំរុញឲ្យពលរដ្ឋអាមេរិកាំងស្វះស្វែងរកប្រយោជន៍រួមជាមួយមនុស្សផ្សេងទៀត ដោយលោកបានប្រសាសន៍ថា ខណៈដែលលទ្ធិប្រជាធិបតេយ្យមិនតម្រូវឲ្យមានការឯកភាពគ្នា «ការណ៍នេះ តម្រូវឲ្យមានការយល់ដឹងដ៏សំខាន់ពីសាមគ្គីភាព»។
លោកប្រធានាធិបតីអូបាម៉ា បានព្រមានថា សហរដ្ឋអាមេរិកប្រឈមការគំរាមកំហែងជាបន្តបន្ទាប់ដល់លទ្ធិប្រជាធិបតេយ្យ ដូចជាការធ្វើឲ្យប៉ះពាល់ដល់សេដ្ឋកិច្ចហើយអសមភាពខាងជាតិសាសន៍។
«ប្រសិនបើបញ្ហាសេដ្ឋកិច្ចត្រូវបានគេចាត់ទុកជាការតស៊ូរវាងវណ្ណៈថ្នាក់កណ្តាលស្បែកសដែលខិតខំធ្វើការ និងជនជាតិភាគតិចដែលមិនសក្តិសមបានទទួលនោះ ដូច្នេះ ពួកកម្មករគ្រប់ស្រទាប់វណ្ណៈនឹងត្រូវគេទុកឲ្យប្រយុទ្ធគ្នា ខណៈដែលពួកអ្នកមានទ្រព្យសម្បត្តិដកខ្លួនសម្ងំយកសុខផ្ទាល់ខ្លួន»។
ក៏ប៉ុន្តែ លោកប្រធានាធិបតីអូបាម៉ា បានមានប្រសាសន៍បន្តទៀតថា លោកមានសុទ្ធិនិយមកាន់តែខ្លាំងឡើងអំពីប្រទេសអាមេរិកនៅពេលឥឡូវនេះជាងកាលពីពេលលោកចូលកាន់តំណែង ហើយបានអំពាវនាវឲ្យពលរដ្ឋនៅបន្តការចូលរួមក្នុងដំណើរការលទ្ធិប្រជាធិបតេយ្យ។
«ខ្ញុំសូមស្នើសុំអស់លោក អ្នកឲ្យធ្វើការការពារជំនឿដែលបានសរសេរនៅក្នុងឯកសារបង្កើតប្រទេសរបស់យើង គំនិតនេះបានត្រូវនិយាយខ្សឹបដោយទាសករ និងអ្នកលុបបំបាត់ទាសភាព ស្មារតីនេះបានត្រូវធ្វើឲ្យឃើញដោយជនអន្តោប្រវេសន៍ និងម្ចាស់ទឹកដី និងអ្នកដែលបានធ្វើបាតុកម្មដើម្បីស្វែងរកយុត្តិធម៌ ដែលជំនឿនេះត្រូវបានបញ្ជាក់ដោយអ្នកដែលបានដោតទង់ជាតិនៅសមរភូមិបរទេសរហូតដល់លើឋានព្រះច័ន្ទ ជំនឿដ៏សំខាន់របស់ពលរដ្ឋអាមេរិកាំងគ្រប់រូបដែលរឿងរ៉ាវរបស់ពួកគេមិនត្រូវបានគេសរសេរនៅឡើយ។ យើងអាចធ្វើបាន។ យើងបានធ្វើរួចហើយ។ យើងអាចធ្វើបាន»៕
ប្រភព៖ VOA