ផេកខេក ជាកំពូលតារាដែលលេចធ្លោទាំងរូបសម្រស់ និង ការងារសិល្បៈនៅប្រទេសថៃ ហើយនាងក៏ប្រហែលជាមានអ្នកគាំទ្រនៅស្រុកខ្មែរមិនតិចនាក់ទេមើលទៅ ។ ពេលនេះ នាង ផេនខេក បានមកដល់ស្រុកខ្មែរហើយ ដើម្បីចូលរួមក្នុងកម្មវិធីសប្បុរសធម៌មួយ ក្នុងការស្វែងរកថវិកាជួយដល់មន្ទីរពេទ្យគន្ធបុប្ផា ។ អ្វីដែលរឹតតែរំភើបចិត្តនោះ គឺ នាង ផេនខេក គ្រាន់តែមកដល់ស្រុកខ្មែរភ្លាម ក៏គ្រងឈុតប្រពៃណីខ្មែរភ្លែត មើលទៅឃើញថាស្រស់ស្អាតមិនធម្មតានោះឡើយ ។
អ្នកគាំទ្រជាច្រើនមានអារម្មណ៍រំភើបយ៉ាងខ្លាំងជាមួយវត្តមានតារាសម្ដែងលំដាប់ជួរមុខរបស់ប្រទេសមួយនេះ ដោយគ្រាន់តែនាងបង្ហាញវត្តមានក្នុងស្រុកខ្មែរភ្លាម ក៏ឃើញមានការបង្ហោះរូបភាពតារារូបនេះយ៉ាងផុសផុលក្នុងបណ្ដាញសង្គម ជាពិសេសនោះគឺការថតរូបសែលហ្វីជាមួយតារារូបនេះតែម្ដង ។
កម្មវិធីសប្បុរសធម៌នៅថ្ងៃទី ២៧ ខែ សីហា ឆ្នាំ ២០១៦ នេះក៏មានការចូលរួមពីកំពូលតារាល្បីៗក្នុងស្រុកផងដែរ ដូចជា អ្នកនាង ពេជ្រ សោភា លោក ម៉ា ច័ន្ទបញ្ញា លោក Step លោក ងួន ចាន់ដេវីឌ ជាដើម ។ ទាំងនេះសុទ្ធតែស្ដែងឱ្យឃើញពីទឹកចិត្តសប្បុរសរបស់តារាល្បីៗទាំងក្នុងស្រុក និង ក្រៅស្រុកដើម្បីជាចំណែកមួយជួយដល់សង្គមមនុស្សតាមដែលអាចធ្វើទៅបាន ។ ហើយការលះបង់នេះ ក៏មិនផ្ដោតសំខាន់តែទៅលើនាង ផេកខេក ម្នាក់នោះឡើយ តែវាជាការចូលរួមប្រកបដោយចិត្តសប្បុរសទាំងតារាខ្មែរ និង ថៃដើម្បីទទួលបានសង្គមមួយដែលមានការស្ងប់សុខទាំងផ្លូវកាយ និង ផ្លូវចិត្ត ៕ វង្សា ប្រភព៖ ខ្មែរអង្គរ
